တနင်္သာရီတိုင်း၊ ထားဝယ်မြို့နယ် မေတ္တာမြို့ နယ်မြေရဲစခန်းမှ ဒုရဲအုပ် ၁ ဦး သေနတ် ၁ လက်ယူဆောင်လာပြီး အလင်းဝင်လာ၍ ငွေကျပ်သိန်း ၅၀ ချီးမြှင့်ခဲ့ကြောင်း ဒူရက စစ်ကြောင်း အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
ဩဂုတ် ၂၉ ရက်နေ့တွင် ထားဝယ်မြို့နယ်၊ မေတ္တာ နယ်မြေရဲစခန်းမှ ဒုရဲအုပ် ကိုသန်းနိုင်ထွန်းသည် အကြမ်းဖက် စစ်တပ် လက်အောက်တွင် ဆက်လက် တာဝန် မထမ်းဆောင်လိုသောကြောင့် သေနတ် ၁ လက် ယူဆောင်လာပြီး ဓဝယ်အမျိုးသားလွတ်မြောက်ရေးတပ်တော် (DNLA)ထံသို့ အလင်းဝင်ရောက်လာခဲ့ကြောင်းသိရှိရသည်။
ထိုသို့ အလင်းဝင်ရောက်လာသော ဒုရဲအုပ် ကိုသန်းနိုင်ထွန်းသည် G-3 သေနတ် ၁ လက် ၊ ကျည်ဘောက် ၂ ခု၊ ကျည် ၂၂၅ တောင့်နှင့်အတူ လက်နက်ချ အလင်းဝင်ရောက်လာသောကြောင့် ငွေကျပ်သိန်း ၅၀ ဂုဏ်ပြု ချီးမြှင့်ပေးအပ်ခဲ့ကြောင်း၊ ထိုနောက် ၎င်းသွားလိုသည့် လွတ်မြောက်နေရာ တစ်ခုသို့ ပို့ဆောင်ပေးခဲ့ကြောင်းသိရှိရသည်။
“တပ်ရင်းက သတ်မှတ်ထားတဲ့ ဆုကြေးငွေ ပေးအပ်ပြီး သူတို့သွားလိုတဲ့ လွတ်မြောက်နယ်မြေတစ်ခုခုဆီပို့ပေးမှာပါ “ဟု ဒူရက စစ်ကြောင်း အဖွဲ့မှ တာဝန်ရှိသူတစ်ဦးက ပြောဆိုသည်။
တော်လှန်ရေးနှင့် စစ်ရေးအရှိန် မြင့်လာသည်နှင့်အမျှ ပြည်သူ့ဘက်၊ အမှန်တရားဘက် ရပ်တည်လိုသော စစ်သားများ၊ ရဲတပ်ဖွဲ့ဝင်များကို ပြည်သူ့ရင်ခွင် ခိုလှုံ၍ အမြန်ဆုံး ပူးပေါင်းပေးကြပါရန် ဒူရက စစ်ကြောင်းက အသိပေး ပြောဆိုထားသည်။
