စစ်ကိုင်းတိုင်း၊ ကနီမြို့နယ်တွင် အကြမ်းဖက် စစ်တပ်က ချောင်းမရွာကို မီးရှို့ စစ်ကြောင်းထိုးနေ၍ ထောင်နှင့်ချီသော ပြည်သူများ ဘေးလွတ်ရာ ထွက်ပြေး တိမ်းရှောင်နေရကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
စက်တင်ဘာလပိုင်းမှ စတင်၍ ယင်းမာပင်မြို့နယ် ဘန့်ဘွေး ပျူစောထီးရွာမှ ထွက်လာသော အကြမ်းဖက် စစ်တပ်သည် ကနီမြို့နယ် အတွင်းသို့ စစ်ကြောင်းထိုး ဝင်ရောက် ကျေးရွာများကို မီးရှို့ဖျက်ဆီးနေခြင်းဖြစ်ကြောင်း သိရသည်။
ထို စစ်ကြောင်းသည် စက်တင်ဘာလ ၄ ရက်နေ့ ည ၈ နာရီ ၅၀ မိနစ်ခန့်တွင် ကနီမြို့နယ်၊ ချောင်းမရွာကို ဝင်ရောက် စီးနင်းပြီး ပြည်သူပိုင် နေအိမ်များကို မီးရှို့ဖျက်ဆီးခဲ့ကြောင်း သိရှိရသည်။
ယင်း စစ်ကြောင်းကြောင့် လက်ရှိချိန်တွင် မုံရွာ- ယာကြီး – ကလေးဝ ကားလမ်းပိုင်း နှင့် ချောင်းမ – ကနီ လမ်းပိုင်းရှိ ကျေးရွာများမှ ထောင်နှင့် ချီသော ပြည်သူများသည် ဘေးလွတ်ရာ ထွက်ပြေး တိမ်းရှောင်နေရကြောင်း သိရသည်။
“ကနီမြို့နယ်မှာ မြေပြင် စစ်ခွေးစစ်ကြောင်းလည်းရှိသလို လေကြောင်းနဲ့လည်း ဗုံးကျဲနေလို့ ပြည်သူတွေက ဘေးလွတ်ရာကို ထွက်ပြေး တိမ်းရှောင်နေရတယ်။ စစ်ခွေး စစ်ကြောင်းကလည်း ကနီမြို့နယ်၊ ချောင်းမရွာကို ရောက်ရှိပြီး နေအိမ်တွေကို မီးရှို့ဖျက်ဆီးနေတယ်။ လေကြောင်းကလည်း နေ့စဉ်ကို ဗုံးကျဲ တိုက်ခိုက်နေတယ်” ဟု ဒေသပြည်သူ တစ်ဦးက ပြောဆိုသည်။
အလားတူ စက်တင်ဘာလ ၃ ရက်နေ့ကလည်း အကြမ်းဖက် စစ်တပ်က ကနီမြို့နယ်၊ သမင်ခြံကျေးရွာကို လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၁ ဦး သေဆုံးခဲ့ပြီး ထိခိုက်ဒဏ်ရာရရှိသူ များပြားကြောင်း သိရသည်။
ဓာတ်ပုံ- စစ်ကိုင်းတိုင်း၊ ယင်းမာပင်မြို့နယ်ရှိ ကျေးရွာ ၁ ရွာကို စစ်တပ်က ညအချိန် မီးရှို့ဖျက်ဆီးနေစဉ် (ပုံအဟောင်းဖြစ်သည်)
