မကွေးတိုင်း၊ ပခုက္ကူမြို့နယ်၊ အင်ပင်ရွာတောင်ဘက်၌ တပ်စွဲထားသော အကြမ်းဖက် စစ်တပ်ဂိတ် စခန်းကို ရော့ကတ်များဖြင့် ပစ်ခတ် တိုက်ခိုက်ခဲ့ရာ စစ်သားများ ထိခိုက်သေဆုံးမှုရှိကြောင်း Cobra One တပ်ဖွဲ့တာဝန်ခံ ဗိုလ်မြွေဟောက်က ရန်ကုန်ခေတ်သစ်သတင်းဌာနထံသို့ ပြောကြား သည်။
ယမန်နေ့ စက်တင်ဘာလ ၂၂ ရက်နေ့ မွန်းတည့် ၁၂ နာရီခန့်က ပခုက္ကူမြို့နယ် ၊ အင်ပင်ကျေးရွာ တောင် ဘက်၌ ဂိတ်စခန်းဖွင့်ကာ အထိုင်ချတပ်စွဲထားသည့် စစ်သားများသည် အင်အား ဖြည့်တင်းထားပြီး စစ်ကြောင်းထိုးရန် ပြင်ဆင်နေစဉ် တော်လှန်ရေး တပ်ဖွဲ့များက Rocket ၃ လုံး ပစ်ခတ် တိုက်ခိုက်ခဲ့ကြောင်း သိရသည်။
ထို တိုက်ခိုက်မှု အတွင်း စစ်သားများရှိရာ နေရာကို ကျရောက် ပေါက်ကွဲခဲ့ခြင်းကြောင့် စစ်တပ်ဘက်မှ ထိခိုက်မှုရှိကာ အရေအတွက်ကို အတည်ပြုနိုင်ခြင်းမရှိသေးကြောင်း၊ တိုက်ခိုက်မှု အတွင်း အထိနာခဲ့သော အကြမ်းဖက် စစ်သားများသည် လက်နက်ကြီးများဖြင့် ရမ်းသမ်းပစ်ခတ်ခဲ့သော်လည်း ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
အဆိုပါ တိုက်ခိုက်မှုကို ပခုက္ကူမြို့နယ်-ပကဖ တပ်ရင်း ၁ ၊ပခုက္ကူမြို့နယ်-ပကဖ လက်နက်ကြီးတပ်ဖွဲ့ COBRA ONE နှင့် BURMA REVOLUTION RUNGERS တပ်ဖွဲ့တို့ ပူးပေါင်းကာ တိုက်ခိုက်ခဲ့ခြင်းဖြစ် ကြောင်း သိရသည်။
ယင်းနေ့ ညနေပိုင်းတွင် ထိုဂိတ်စခန်းမှ စစ်တပ် စစ်ကြောင်းထွက်လာပြီး စစ်ဘေးရှောင်တဲများကို မီးရှို့ဖျက်ဆီးသွားကြောင်း၊ ထို့ပြင် ယနေ့ စက်တင်ဘာလ ၂၃ ရက် နံနက်ပိုင်းတွင်လည်း အင်ပင်ရွာ စစ်တပ်စခန်းမှ လက်နက်ကြီး ၂ လုံးဖြင့် ရမ်းသမ်းပစ်ခတ်ခဲ့သည့်အပြင် စက်တပ်လေထီး ၂ စီးဖြင့် ဗုံးသီး ၂ လုံး ကျဲချခဲ့ကြောင်း သိရသည်။
အကြမ်းဖက် စစ်တပ်က အပြစ်မဲ့ ပြည်သူများကို ပစ်မှတ်ထား၍ လေကြောင်း၊ လက်နက်ကြီးများ ဖြင့် တိုက်ခိုက်နေခြင်းကြောင့် ပြည်သူများအနေဖြင့် စစ်ရေးသတင်းများ အထူးဂရုစိုက်၍ နေထိုင်ပေးကြန် Cobra One တပ်ဖွဲ့က အသိပေးနှိုးဆော်ထားသည်။
