စစ်ခေါင်းဆောင်များနှင့် ဒေသ နိုင်ငံရေးသမားများ၏ ကျောထောက်နောက်ခံပေးမှုဖြင့် မြန်မာနိုင်ငံမြောက်ပိုင်းမှ ရာဇဝတ်ဂိုဏ်းများက တရုတ်နိုင်ငံသားများကို ပစ်မှတ်ထားခဲ့ဟု ကိုးကန့် ပြည်သူ့စစ်ခေါင်းဆောင် ဝေဆန်းက ထွက်ဆို

ရန်ကုန်၊ အောက်တိုဘာ ၁၆

စစ်ခေါင်းဆောင်များနှင့် ဒေသ နိုင်ငံရေးသမားများ၏ ကျောထောက်နောက်ခံပေးမှုဖြင့် မြန်မာနိုင်ငံမြောက်ပိုင်းမှ ရာဇဝတ်ဂိုဏ်းများက တရုတ်နိုင်ငံသားများကို ပစ်မှတ်ထားခဲ့ကြောင်း ဖမ်းဆီးခံထားရသော ကိုးကန့် ပြည်သူ့စစ်ခေါင်းဆောင် ဝေဆန်းက ထွက်ဆိုသည်။

အောက်တိုဘာလ ၁၅ ရက်နေ့ တရုတ်အစိုးရပိုင် CCTV ရုပ်သံက ဖမ်းဆီးထားသော အွန်လိုင်းကျားဖြန့်နှင့် ရာဇဝတ်မှုများအတွက် သံသယရှိသူ ကိုးကန့် ပြည်သူ့စစ်ခေါင်းဟောင်း ဝေဆန်းနှင့် အင်တာဗျူးကို ထုတ်လွှင့်ပြသခဲ့ပြီး ယင်းအင်တာဗျူးတွင် ၎င်းက အထက်ပါအတိုင်း ဝန်ခံလိုက်ခြင်းဖြစ်သည်။

ကိုးကန့်ဒေသတွင် ကိုးကန့် ပြည်သူ့စစ်ခေါင်းဆောင်ဟောင်း “ဝေ” မိသားစုက ကျူးလွန်သော ရာဇဝတ်မှုများမှာ သက်ဆိုင်ရာ နိုင်ငံက ခွင့်ပြုချက်နှင့် လုပ်ပိုင်ခွင့်ပေးခဲ့ခြင်းဖြစ်ကြောင်း၊ ဝေမိသားစုသည် ကိုးကန့် ဒေသမှ အခြားရာဇ၀တ်ဂိုဏ်းများနှင့် မတူကြောင်း၊ ဝေမိသားစုက လက်နက်ကိုင်တပ်ကို တိုက်ရိုက် ကွပ်ကဲပြီး အခြားဂိုဏ်းများက ပြည်သူ့စစ်များကို ငှားရမ်းအသုံးပြုရကြောင်း သိရှိရသည်။

၂၀၀၉ ခုနှစ်တွင် မြန်မာစစ်တပ်က တိုင်းရင်းသားလက်နက်ကိုင်အဖွဲ့တချို့နှင့်ညှိနှိုင်းကာ နယ်ခြားစောင့်တပ်များအဖြစ် ဖွဲ့စည်းရန်နှင့် စစ်တပ်အောက်တွင် အောက်တွင် အလုပ်လုပ်ရန် သဘောတူညီခဲ့ကြပြီး ကိုးကန့်ပြည်သူ့စစ်အဖွဲ့ ပေါ်ပေါက်လာကြောင်း သိရှိရသည်။

“အများအမြင်မှာ သူတို့က အစိုးရဆီက လစာထုတ်ပြီး နယ်ခြားစောင့်ရှောက်ရေးလုပ်ကြသူတွေဖြစ်ပေမယ့် နိုင်ငံရဲ့ အာဏာဖွဲ့စည်းပုံကို မိသားစုအကျိုးစီးပွားအတွက် အသုံးပြုခဲ့ကြတယ်” ဟု တရုတ် အစိုးရပိုင် CCTV သတင်းဌာနက ဖော်ထုတ်ထားသည်။

ဖမ်းဆီးခံ ဝေဆန်းက “ကိုးကန့်မှာ ကျနော်က အာဏာအရှိဆုံး နယ်ခြားစောင့်တပ်ရဲ့ ခေါင်းဆောင်တပ်မှူးချုပ်ပါ။”ဟု ထွက်ဆိုသည်။

Fujian ပြည်နယ် Quanzhou မှ ရဲအရာရှိတစ်ဦးကမူ ကိုးကန့်မှ ဝေ မိသားစုအနေဖြင့် ရာဇဝတ်မှုများကို “နိုင်ငံတော် ၏ခွင့် ပြုချက်ဖြင့်” လုပ်ဆောင်ခဲ့ကြောင်း CCTV အစိုးရရုပ်သံသို့ ပြောကြားခဲ့သည်။

ဝေမိသားစုက ကနဦးတွင် လောင်းကစားနှင့် ပြည့်တန်ဆာလုပ်ငန်းဖြင့် ငွေရှာခဲ့သော်လည်း ၂၀၁၇ ခုနှစ်တွင် အွန်လိုင်းကျားဖြန့်လိမ်လည်မှုတို့ဖြင့် ငွေရှာရန် ပုံစံပြောင်းလဲခဲ့သည်ဟု သိရှိရသည်။

ဝေဆန်း၏တူဖြစ်သူ Chen Dawei ကို ဝေဆန်းက ဆက်ခံသူအဖြစ် ရွေးချယ်ခဲ့ပြီး Chen Dawei မှာ အနည်းဆုံး လူသတ်မှုတစ်ခုကို ကျူးလွန်ခဲ့ကြောင်း သိရှိရသည်။

ဝေဆန်းနှင့် မိသားစုကို လူသတ်မှု၊ လိမ်လည်မှု၊ ပြန်ပေးဆွဲမှု၊ လောင်းကစားလုပ်ငန်းများ လည်ပတ်မှု၊ ပြည့်တန်ဆာ စည်းရုံးမှုနှင့် မူးယစ်ဆေးဝါး ရောင်းဝယ်ဖောက်ကားမှုတို့အတွက် သံသယရှိကြောင်း တရုတ်အစိုးရက အောက်တိုဘာလ ၁၅ ရက်နေ့တွင် ထုတ်ပြန်ခဲ့သည်။

ဝေဆန်းနှင့်မိသားစု တို့၏ ဂိုဏ်းက အနည်းဆုံး တရုတ် နိုင်ငံသား ရှစ်ဦး သေဆုံးမှုအတွက် တာဝန်ရှိကြောင်းနှင့် ၎င်း၏ ရာဇ၀တ်မှု လှုပ်ရှားမှုများသည် ဒေါ်လာ သန်းပေါင်းများစွာနှင့် ညီမျှသော အမြတ်ငွေများ ထုတ်ယူခဲ့ကြောင်း သိရှိရသည်။

လွန်ခဲ့သည့် နှစ်နှစ်အတွင်းတွင် တရုတ်နိုင်ငံက ကျားဖြန့် အွန်လိုင်းလိမ်လည်မှုနှင့် အခြားသော ရာဇ၀တ်မှုများအား နှိမ်နင်းရန် မြန်မာအာဏာပိုင်များနှင့် ပူးပေါင်းဆောင်ရွက်ခဲ့ပြီး တရုတ်နိုင်ငံသား ၅၇,၀၀၀ ကျော်ကို ဖမ်းဆီးခဲ့သည်။

အောက်တိုဘာလ ၁၁ ရက်နေ့တွင် တရုတ်နိုင်ငံသားများကို ပစ်မှတ်ထား လိမ်လည်သော အွန်လိုင်းကျားဖြန့် လိမ်လည်မှုအတွက် ကိုးကန့်ပြည်သူ့စစ်ခေါင်းဆောင် ဝေဆန်း အပါအဝင် ၃ ဦးကို Fujian ပြည်နယ်၊ Quanzhou မြို့ တွင် လူသတ်မှုအပါအဝင် ရာဇဝတ်ပုဒ်မများစွာဖြင့် ထပ်မံ တရားစွဲခဲ့သည်။

မြန်မာနိုင်ငံမြောက်ပိုင်း ကိုးကန့်ကို အခြေပြုကာ ကျားဖြန့်ဂိုဏ်းများ ထူထောင်၍ တရုတ်နိုင်ငံသားများကို ပစ်မှတ်ထား လိမ်လည်ခြင်း၊ ရာဇ၀တ်မှုများ လုပ်ဆောင်ရန် လက်နက်ကိုင်တပ်ဖွဲ့များကို အသုံးချခဲ့ခြင်းတို့အတွက် ဝေဆန်း အပါအဝင် ၃ ဦးကို တရားစွဲလိုက်ခြင်းဖြစ်ကြောင်း အစိုးရရှေ့နေများက ထုတ်ပြန်ကြေညာခဲ့ကြသည်။

Fujian ပြည်နယ်၊ Quanzhou မြို့ တရားရုံးတွင် တရားစွဲဆိုရာတွင် အသုံးပြုသည့် ပုဒ်မများမှာ လိမ်လည်မှု၊ ရည်ရွယ်ချက်ရှိရှိ လူသတ်မှု၊ တရားမဝင် နယ်စပ်ဖြတ်ကျော်မှုများ စီစဉ်မှုနှင့် ငွေညှစ်မှုတို့ ပါဝင်သည်ဟု အစိုးရရှေ့နေများက ပြောကြားခဲ့ပြီး တရားစွဲခံလိုက်ရသော ဝေဆန်း (ခ) ဝေဝှိုင်ရန် Wei Huairenမှာ စစ်တပ်လက်အောက်ခံ ကိုးကန့် နယ်ခြားစောင့်တပ်ရင်း (၁၀၀၆) ဥက္ကဌဖြစ်သည်။

စက်တင်ဘာလ ၂၉ ရက်နေ့ Zhejiang ပြည်နယ်ရှိ တရာရုံးက ကိုးကန့်ဒေသမှ မြီရှောက်ချန်း၏ မိသားစုဝင်များကို ပထမဆုံးအကြိမ် အဖြစ် စီရင်ချက်များ ချမှတ်ခဲ့ပြီး မြီရှောက်ချန်း၏ သားဖြစ်သူ Ming Guoping (Mg Myin Shaut Phyin)၊ မြေးမလေး Ming Zhenzhen(သီရိမောင်)၊ ဝေကော်ချန်း Zhou Weichang ၊ ဝူဟုန်မင် Wu Hongming ၊ ဝူစိန်လုံ Wu Senlong ၊ ဖုယွီပင်း Fu Yubin အပါအဝင် ၁၁ ဦး တို့ကို သေဒဏ် ချမှတ်ခဲ့သည်။

ရန်ကျိန့်ရှီ Yang Zhengxi၊ ဖုချိန်ဇစ် Fu Chengzhi အပါအဝင် ၅ ဦးကို ဆိုင်းငံ့ ၂ နှစ် သေဒဏ် ချမှတ်လိုက်ကြောင်း၊ လော်ကျန်းကျမ်း Luo Jianzhang ၊ ချိုးဇစ် Qiu Zhi အပါအဝင် ၁၁ ဦးကို ထောင်ဒဏ်တသက် ချမှတ်လိုက်ကြောင်း၊ ပိဟွေ့ကျွင်း Bi Huijun ၊ ကျန်းကျိ Jiang Ji အပါအဝင် ၁၂ ဦးကို ထောင်ဒဏ် ၅ နှစ်မှ ၂၄ နှစ်အထိ သတ်မှတ်ထောင်ဒဏ် အသီးသီးကိုလည်း ကောင်း ၊ငွေဒဏ် ၊ ပိုင်ဆိုင်မှု ပစ္စည်းများ သိမ်းယူခြင်း ၊ ပြည်နှင်ဒဏ်ပေးခြင်း ပြစ်ဒဏ်များကိုလည်း ချမှတ်ခဲ့သည်။

တရုတ်နိုင်ငံ၊ Zhejiang အရှေ့ပိုင်းခရိုင်တွင် ကျားဖြန့် ငွေလိမ်လည်မှု အပါအဝင် ပြစ်မှု ကျူးလွန်သူ တရားခံ ၃၉ ဦးကို စွဲချက် တင်ခဲ့ပြီး ၎င်းတို့အနက် ၁၆ ဦးမှာ မြန်မာနိုင်ငံသားများဖြစ်ပြီး ၎င်းတို့ကို လူသတ်မှု၊ လိမ်လည်မှု၊ ဥပဒေမဲ့ ထိန်းသိမ်းမှု၊ စနစ် တကျ လောင်းကစားမှုနှင့် ပြည့်တန်ဆာမှု၊ မူးယစ်ဆေးဝါး ရောင်းဝယ်ဖောက်ကားမှုတို့ အပါအဝင် ပြစ်မှုများဖြင့် အမိန့်ချမှတ်ခဲ့ခြင်းဖြစ်သည်။

တရုတ်နိုင်ငံ နယ်နိမိတ်ပြင်ပ ကိုးကန့်ဒေသတွင် ဖြစ်ပွားခဲ့သော ရာဇ၀တ်မှုများဖြစ်သော်လည်း တရုတ်နိုင်ငံသားများ၏ ကိုယ်ပိုင်အခွင့်အရေးများကို ချိုးဖောက်ခြင်းကြောင့် တရုတ်အာဏာပိုင်များက ယင်းအမှုကို စီရင်ပိုင်ခွင့်ရှိသည်ဟုဆိုကာ တရုတ်အစိုးရက ဖမ်းဆီး အမိန့်ချမှတ်ခဲ့ခြင်းဖြစ်သည်။

မြန်မာစစ်တပ်က ၂၀၂၄ ခုနှစ် ဇန်နဝါရီလအတွင်းတွင် ရှမ်းပြည်နယ်မြောက်ပိုင်း၊ လောက်ကိုင်ဒေသမှ ကျားဖျန့် အွန်လိုင်းငွေလိမ်လည် ဂိုဏ်း၏ အဓိက တရားခံဖြစ်သောစစ်တပ်က ကိုးကန့်ပြည်သူ့စစ် ခေါင်းဆောင် ပယ်ဆောက်ချိန် Bai Suocheng၊ ပယ်ရင့်ဆန်း Bai Yingcang (ပယ် ဆောက် ချိန်၏ သား) ၊ဝေဆန်း (ခ) ဝေဝှိုင်ရန် Wei Huairen နယ်ခြားစောင့်တပ်ရင်း (၁၀၀၆) ဥက္ကဌ ၊ လျှိုအားပေါက် (ခ) လျိုကျိန့်ရှန်း Liu Zhengxiang Fully Light ဖူလီလိုက် လုပ်ငန်းစု သူဌေး ၊လျှိုကျိန့် မောက် Liu Zhengmao ၊ ရွှီလောက်ဖား Xu Laofa တို့ကို အခြား အရေးကြီး တရားခံ ၄ ဦး စုစုပေါင်း ၁၀ ဦးတို့ကို နေပြည်တော်လေဆိပ်မှ တစ်ဆင့် တရုတ်ထံသို့ လွှဲပြောင်းပေးအပ်ခဲ့ခြင်းဖြစ်သည်။