မန္တလေးတိုင်း၊ မိုးကုတ်မြို့နယ်တွင် အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ ကြက်မွေးမြူရေးခြံများကို လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း TNLA က ထုတ်ပြန်ထားသည်။
ယနေ့ အောက်တိုဘာလ ၁၆ ရက်နေ့ နံနက် ၇ နာရီ ၃၀ မိနစ်ခန့်တွင် မိုးကုတ်မြို့နယ်၊ ညောင်ကုန်း(ထက်)ကျေးရွာရှိ ကြက်မွေးမြူရေးခြံများကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ပေါင် ၂၅၀ ဗုံး ၂ လုံးကျဲချ တိုက်ခိုက်ခဲ့ကြောင်း သိရသည်။
အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း ပြည်သူများ ထိခိုက်မှုမရှိသော်လည်း ကြက်မွေးမြူရေးခြံများ ထိခိုက်ပျက်စီးခဲ့ကြောင်း သိရှိရသည်။
အောက်တိုဘာလ ၁၄ ရက်နေ့ကလည်း နမ့်ဆန်မြို့နယ်၊ အုမ်းစွမ်ကျေးရွာကို အကြမ်းဖက် စစ်တပ်က ဂျက်ဖိုက်တာဖြင့် ဗုံး ၁၁ လုံးလာရောက် ကျဲချ တိုက်ခိုက်ခဲ့ပြီး အမျိုးသမီး ၂ ဦးသေဆုံးကာ ကလေးငယ်အပါအဝင် ပြည်သူ ၄ ဦးထိခိုက် ဒဏ်ရာရရှိခဲ့ပြီး ဆိုင်ကယ် ၆ စီး၊ ကလေးမူကြိုကျောင်း အပါအဝင် နေအိမ် ၈ လုံး ထိမှန်ပျက်စီးခဲ့ကြောင်း သိရသည်။
ပြည်သူများအနေဖြင့် အကြမ်းဖက် စစ်ကောင်စီ၏ ဗုံးကျဲ တိုက်ခိုက်မှုများရှောင်ရှားနိုင်ရန် စစ်ရေးသတိအမြဲရှိရန်လိုအပ်ပြီး လေကြောင်းရန်မှကာကွယ်နိုင်ရန် လေကြောင်းရန် ကာကွယ်ရေးဆိုင်ရာနည်းလမ်းများ လိုက်နာဆောင်ရွက်ရန်လိုအပ်ကြောင်း၊ အကြမ်းဖက် စစ်ကောင်စီတပ်သည် တအာင်းပြည်အတွင်းသာမက တိုင်းရင်းသားလက်နက် ကိုင်များ၊ ပြည်သူ့ကာကွယ်ရေးတပ်ဖွဲ့များက တိုက်ခိုက်သိမ်းပိုက်ရရှိခဲ့သော နေရာများတွင် လူဖြင့်သော်လည်းကောင်း၊ လက်နက်ကြီးဖြင့်သော်လည်းကောင်း၊ ဒရုန်းဖြင့်သော်လည်းကောင်း၊ လေကြောင်းဖြင့်သော်လည်းကောင်း အပြစ်မဲ့ပြည်သူလူထုများအပေါ် စစ်ရာဇဝတ်မှု ကျူးလွန်နေလျက်ရှိကြောင်း ပြောဆိုထားသည်။
အလားတူ မကွေးတိုင်း၊ နတ်မောက်မြို့နယ်၊ ဆည်လည်ကျေးရွာနှင့် ရှမ်းဘုရားကျေးရွာ အကြားကိုလည်း တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်က လေယာဉ်ဖြင့် ဗုံးကျဲတိုက်ခိုက်ခဲ့ကြောင်း People’s Defense Organization – Natmauk မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
အောက်တိုဘာလ ၁၂ ရက်နေ့ မွန်းလွဲ ၁ နာရီ၀န်းကျင်ခန့်တွင် နတ်မောက်မြို့နယ် ဆည်လည်ကျေးရွာနှင့် ရှမ်းဘုရားကျေးရွာ အကြားကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်တပ်က လေယာဉ်ဖြင့် ဗုံးကျဲ ပစ်ခတ် တိုက်ခိုက်ခဲ့ခြင်းဖြစ်ကြောင်း၊ အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း ပြည်သူများ ထိခိုက်မှုမရှိကြောင်း သိရသည်။
“စစ်ခွေးတွေက ဘာထိတွေ့မှုမှ မရှိဘဲ စစ်ကြောင်းထိုးတာလည်းမရှိဘဲ လာပြီး လေယာဥ်နဲ့ချသွားတာပါ။ ဆည်လည်ကျေးရွာနဲ့ ရှမ်းဘုရားကျေးရွာ အကြားကို လာကျဲချသွားတာပါ။ ရဟတ်ယာဉ် ၁ စီး ၊ ဂျက်ဖိုက်တာ ၂ စီးနဲ့ ဗုံးသီး ၂ လုံးချပြီး ရော့ကတ်တွေနဲ့ ပစ်သွားတာပါ။ ပြည်သူထိခိုက်မှုမရှိပါဘူး။ နေအိမ်ပျက်စီးတာမျိုး မရှိပါဘူး”ဟု People’s Defense Organization – Natmauk မှ တာဝန်ရှိသူတစ်ဦးက ပြောဆိုသည်။
အောက်တိုဘာလ ၁၃ ရက်နေ့ကလည်း နတ်မောက်မြို့နယ် အရှေ့ခြမ်း စမ်းကုန်းကျေးရွာအနီးကို အကြမ်းဖက် စစ်တပ်က ဂျက်ဖိုက်တာ ၂ စီး၊ ရဟတ်ယာဉ် ၁ စီးတို့ဖြင့် ဗုံး ၈ လုံးကျဲချကာ ပစ်ခတ်တိုက်ခိုက်ခဲ့ကြောင်း ၊ အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း ပြည်သူများ ထိခိုက်မှုမရှိကြောင်း သိရသည်။
