တနင်္သာရီတိုင်း၊ ပုလောမြို့တွင် အမှတ် ၄ ရပ်ကွက် အုပ်ချုပ်ရေးမှူး စိုးဝေနှင့် စစ်သား ၁ ဦး တို့ ပစ်ခတ်ခံရကာ သေဆုံးပြီးနောက် စစ်တပ်က သင်္ကန်းတောရွာကို ဝင်ရောက် စီးနင်း မီးရှို့နေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
အောက်တိုဘာလ ၂၃ ရက်နေ့ နံနက်ပိုင်းတွင် အမှတ် ၄ ရပ်ကွက် အုပ်ချုပ်ရေးမှူး စိုးဝေနှင့် စစ်သား ၁ ဦးကို အမည်မသိ သေနတ်သမားများက အမက ၈ ကျောင်းအနီးတွင် ပစ်ခတ် တိုက်ခိုက်ခဲ့ရာ ၂ ဦးလုံးသေဆုံးခဲ့ကြောင်း သိရသည်။
ထိုသို့ တိုက်ခိုက်မှုဖြစ်ပွားပြီးနောက် မိနစ်ပိုင်းအကြာတွင် အကြမ်းဖက် စစ်သားများ ရောက်ရှိလာပြီး အုပ်ချုပ်ရေးမှူး စိုးဝေနှင့် စစ်သား ၁ ဦး၏ အလောင်းများကို လာရောက် ကောက်ယူသွားကြောင်း၊ ထို့ပြင် အမက ၈ ကျောင်းအနီးတဝိုက်ကိုလည်း စစ်သားများက ပိတ်ဆို့ စစ်ဆေးမှုများ လုပ်ဆောင်သွားကြောင်း သိရှိရသည်။
“စစ်ခွေးအုပ်ကြီးနဲ့ စစ်ခွေး ၁ ကောင်က ဘယ်ကနေ ပြန်လာတာလဲတော့ မသိဘူး။ သူတို့ ၂ ကောင်လုံး ပစ်ခံရပြီး သေတယ်လို့ သိရတယ်။ ပစ်ခတ်မှုဖြစ်ပြီး သိပ်မကြာဘူး။ စစ်ခွေးတွေ ရောက်လာပြီး ကျောင်းနားတဝိုက်ကို ပိတ်ဆို့ စစ်ဆေးတာတွေ လုပ်ဆောင်သွားတယ်” ဟု ဒေသပြည်သူတစ်ဦးက ပြောဆိုသည်။
ထို့ပြင် ယနေ့ အောက်တိုဘာလ ၂၄ ရက်နေ့ မွန်းလွဲ ၃ နာရီ ၃၀ မိနစ်ခန့်တွင်လည်း အကြမ်းဖက် စစ်တပ်က ပုလောမြို့နယ်၊ သင်္ကန်းတောရွာကို ဝင်ရောက် စီးနင်းပြီး နေအိမ်များကို မီးရှို့ဖျက်ဆီးနေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
အကြမ်းဖက် စစ်တပ်၏ မီးရှို့ဖျက်ဆီးခြင်းကြောင့် နေအိမ်မည်မျှ မီးလောင်ပြာကျသည်ကို အတည်ပြုနိုင်ခြင်းမရှိသေးဘဲ အကြမ်းဖက် စစ်သားများက လက်ရှိချိန်ထိ ကျေးရွာအတွင်း၌ ရှိနေသေးကြောင်း သိရသည်။
“သင်္ကန်းတောရွာလေးကို စစ်ခွေးတွေ ဝင်ရောက် စီးနင်းမီးရှို့နေတာပါ။ အိမ်ဘယ်နှလုံး မီးရှို့ ဖျက်ဆီးခံရလဲဆိုတာတော့ မသိသေးဘူး။ ပြည်သူတွေလည်း တိမ်းရှောင်နေရတယ်” ဟု ဒေသပြည်သူတစ်ဦးက ပြောဆိုသည်။
ဓာတ်ပုံ – စစ်ကိုင်းတိုင်း အတွင်းရှိ ကျေးရွာတစ်ရွာကို အကြမ်းဖက် စစ်တပ်က ညအချိန် ဝင်ရောက်စီးနင်းမီးရှို့ဖျက်ဆီးနေစဉ် (ပုံအဟောင်းဖြစ်သည်)
