မကွေးတိုင်း၊ ပခုက္ကူမြို့နယ်၊ မြစ်ခြေ -ကျွန်းချောင်းဘက်သို့ ဝင်ရောက်လာသည့် အကြမ်းဖက်စစ် တပ် စစ်ကြောင်းကို တိုက်ခိုက်ခဲ့ရာ စစ်သား ၁၀ ဦးသေဆုံးပြီး ၂၀ ခန့်ထိခိုက်ဒဏ်ရာရရှိခဲ့ကြောင်း ဒေါင်းရင်သွေးပြောက်ကျားတပ်ဖွဲ့မှ ရဲဘော် တစ်ဦးကရန်ကုန်ခေတ်သစ်သတင်းဌာနထံသို့ ပြော ကြားသည်။
အောက်တိုဘာလ ၃၀ ရက်နေ့ ပုဂံ-ညောင်ဦးဘက်မှ ဧရာဝတီမြစ်အနောက်ဘက်ကမ်း၊ ပခုက္ကူမြို့ နယ်၊ မြစ်ခြေ-ကျွန်းချောင်းဒေသ၊ ဆိက္ခဝကျေးရွာသို့ စက်လှေများဖြင့် ကူးလာသော အင်အား ၂၀၀ ခန့်ပါ တပ်မ ၉၉ လက်အောက်ခံ စစ်ကြောင်းကို ပြည်သူ့ကာကွယ် ရေးတပ်ဖွဲ့များက တိုက်ခိုက်ခဲ့ရာ စစ်သား ၁၀ ဦးသေဆုံးပြီး ၂၀ ဦးခန့် ထိခိုက်ဒဏ်ရာရရှိခဲ့ကြောင်း သိရသည်။
“ အောက်တိုဘာ ၃၀ ရက်နေ့ စစ်ကြောင်း စထွက်တဲ့နေ့က တိုက်ပွဲဖြစ်တာ၊ ဆိက္ခဝကျေးရွာနားမှာပဲဖြစ်ခဲ့တာ၊ သူတို့ဘက် Icon လာငြိပြီး သတင်းသိရတာက သူတို့ဘက်က ၁၀ ယောက်သေတယ်။ ၂၀ လောက်ဒဏ်ရာရတယ်။ အင်အားက ၃၀၀ လောက်ရှိတယ်။ ၂၀၀ က ရှေ့ပြေးထိုးလာပြီးတော့ နောက်ချန်က အင်အား ၁၀၀ နဲ့ ပေါင်းထိုးတာ၊” ဟု ဒေါင်းရင်သွေးပြောက်ကျားတပ်ဖွဲ့မှ တော်လှန်ရေးရဲဘော်ကရန်ကုန်ခေတ်သစ်သတင်း ဌာနထံသို့ ပြောကြားသည်။
တိုက်ပွဲဖြစ်ပြီးနောက် နယ်မြေရှင်းလင်းစဉ် အကြမ်းဖက်စစ်တပ်ကင်းပုန်းမှ ပစ်ခတ်သည့် ကျည် ထိမှန်၍ ပြည်သူ့ကာကွယ်ရေးအဖွဲ့ -ပကဖ ရဲဘော်တစ်ဦး ကျဆုံးခဲ့ကြောင်း၊ ယင်းအကြမ်းဖက်စစ် တပ်စစ်ကြောင်းမှာ လက်ရှိတွင် ကျွန်းချောင်းတောင်ဘက်ရှိ ဓာတ်မြေဩဇာစက်ရုံ၌ တပ်စွဲထားပြီး ကင်းပုန်းများလည်းချထားကြောင်း သိရသည်။
“တိုက်ပွဲမှာ ရဲဘော်တွေအားလုံးဘေးကင်းခဲ့တယ်။ စစ်ကြောင်းငြိမ်လို့ နယ်မြေရှင်းလင်းရေးလုပ်တဲ့ အချိန်မှာ စခကင်းပုန်းနဲ့တွေ့ပြီး နယ်မြေခံ ပကဖအဖွဲ့ထဲက ရဲဘော်တစ်ယောက် ကျခဲ့တယ်။ ခေါင်း ကိုထိမှန်သွားတာ၊ အလောင်းတော့ ပြန်ရခဲ့တယ်။ အသက်ကတော့ ပေးလိုက်ရတယ်။ စစ်ကြောင်း ကလည်း ပြန်မဆုတ်သေးဘူး။ သူတို့က နယ်မြေရှေ့တိုးယူထားတာ” ဟု ဒေါင်းရင်သွေးပြောက်ကျား တပ်ဖွဲ့မှ ရဲဘော် တစ်ဦးက ပြောဆိုသည်။
ယင်းအကြမ်းဖက်စစ်တပ်စစ်ကြောင်း နိုဝင်ဘာလ ၂ ရက်နေ့တွင် ညောင်လှကျေးရွာမှ အထက်တန်း ပြကျောင်းဆရာတစ်ဦးကို ပစ်ခတ်သတ်ဖြတ်ခဲ့သည့်အပြင် မြို့စိုးကျေးရွာမှ ပြည်သူ့နေအိမ် ၁၅ လုံး ကိုလည်း မီးရှို့ဖျက်ဆီးခဲ့ကြောင်း၊ အလားတူ ပေါက်တောကျေးရွာ၊ ကျွန်း ချောင်းလေးကျေးရွာတို့ကို ထပ်မံမီးရှို့ဖျက်ဆီးခဲ့ပြီး နေအိမ်မည်မျှ ဆုံးရှုံးခဲ့သည်ကို သိရှိရခြင်း မရှိသေးကြောင်း သိရသည်။
