တနင်္သာရီတိုင်း၊လောင်းလုံးမြို့ ကြံ့ဖွတ်ရုံးတွင် ပေါက်ကွဲမှု ဖြစ်ပွားပြီး မီးလောင်မှုဖြစ်ပွားခဲ့ကာ အကြမ်းဖက် စစ်တပ်က လာရောက် မီးငြိမ်းခြင်းမရှိသောကြောင့် တစ်ရုံးလုံး ပြာကျသွားကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၈ ရက်နေ့ နံနက် ၇ နာရီခန့်တွင် လောင်းလုံးမြို့ ကြံ့ဖွတ်ပါတီရုံးတွင် ပေါက်ကွဲသံ ၂ ချက်ထွက်ပေါ်လာပြီးနောက် မီးလောင်မှုဖြစ်ပွားခဲ့ကြောင်း၊ ထိုသို့ မီးလောင်မှုဖြစ်ပွားခဲ့သော်လည်း လောင်းလုံးရဲစခန်းတွင် တပ်စွဲထားသော စစ်သားများက လာရောက် မီးငြိမ်းခြင်းမရှိသောကြောင့် တစ်ရုံးလုံး ပြကျသွားကြောင်း သိရသည်။
ထိုကြံ့ဖွတ်ပါတီရုံး ပေါက်ကွဲမှုအတွင်း ပြည်သူများ ထိခိုက်မရှိဘဲ အကြမ်းဖက် စစ်တပ်ကလည်း တပ်စွဲထားခြင်းမရှိသောကြောင့် ထိခိုက်မှုမရှိကြောင်း သိရှိရသည်။
လက်ရှိချိန်တွင် လောင်းလုံးမြို့ရဲစခန်းမှ အကြမ်းဖက် စစ်သားများသည် အင်အားအလုံးအရင်းဖြင့် ထွက်လာပြီး ကြံ့ဖွတ်ရုံးအနီးအနားတွင် လှည့်လည်သွားလာနေကာ ဓာတ်ပုံရိုက်ခြင်းများ လုပ်ဆောင်နေကြောင်း သိရသည်။
“မနက်က ပေါက်ကွဲသံ ၂ ချက်ကြားလိုက်ရပြီး မီးခိုးလုံးတွေ ထွက်လာတာကို တွေ့လိုက်ရတယ်။ တော်တော်ကြာတော့ လိုက်မေးကြည့်တော့ ကြံ့ဖွတ်ရုံးမှာ ပေါက်ကွဲပြီး မီးလောင်တာလို့သိရတယ်။ စစ်ခွေးတွေ ရဲစခန်းထဲမှာရှိတာပဲ အဲတာကို ထွက်လာပြီး မီးမငြိမ်ဘူး။ သူတို့ဘာသာဖောက်ခွဲပြီး ပြန်လုပ်တာလားတော့မသိဘူး။ တစ်ရုံးလုံး ပြာကျသွားပြီးမှ ရဲစခန်းထဲက ထွက်လာပြီး ဓာတ်ပုံရိုက်တာတွေ လုပ်နေတယ်လို့ သိရတယ်” ဟု ဒေသပြည်သူတစ်ဦးက ပြောဆိုသည်။
