ရန်ကုန်၊ နိုဝင်ဘာ ၈
မကွေးတိုင်း၊ ရေစကြိုမြို့အနီးတွင် လမ်းကင်းထွက်ယူသည့် စစ်တပ်ကို မိုင်းဆွဲတိုက်ခိုက်ခဲ့ရာ ဗိုလ် ၁ ဦးအပါအဝင် စစ်သား ၃ ဦးသေဆုံးခဲ့ကြောင်း ရေစကြိုမြို့နယ်ပြည်သူ့ကာကွယ်ရေးအဖွဲ့ -ပကဖ မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ နိုဝင်ဘာလ ၇ ရက် မွန်းလွဲ ၂ နာရီဝန်းကျင်ခန့်အချိန် ရေစကြိုမြို့နယ်အခြေစိုက် ခလရ ၂၅၆ ၊ ၂၅၇ ၊ ၂၅၈ တပ်ရင်း ၃ ခုမှ ပူးပေါင်းကာ အင်အား ၅၀ ခန့်ဖြင့် ရေစကြို့မြို့နှင့် တပ်ရင်း ၃ ခုကြားရှိ ပေကုန်းကျေးရွာ၊ ရေ တံခါးအနီး၌ လမ်းကင်းယူနေစဉ် မိုင်းကွင်းအတွင်း ဝင်ရောက်လာသည့် စစ် သား ၁၀ ဦးကို မိုင်းဆွဲတိုက်ခိုက်ခဲ့ရာ ၂ ပွင့်ဗိုလ်တစ်ဦးနှင့် တပ်သား ၂ ဦး စုစုပေါင်း ၃ ဦးသေဆုံးပြီး ထိခိုက်ဒဏ်ရာရရှိသူများလည်းရှိကြောင်း သိရသည်။
“ခလရ ၂၅၆၊ ၂၅၇ ၊ ၂၅၈ တပ် ၃ တပ်ကနေပေါင်းပြီးတော့ လမ်းကင်းယူတာ၊ ရေစကြိုမြို့နဲ့ တပ်တွေ ကြားထဲမှာ ပေကုန်းရွာဆိုတာ ရှိတယ်။ ကားလမ်းဘေးပဲ၊ အဲဒီရွာနားမှာ ရေတံခါးရှိတယ်။ အဲဒီနေရာ မှာ စခ ၅၀ လောက်က လမ်းကင်းလာယူတာ၊ အဲဒီထဲကမှ ၁၀ ယောက်လောက်က ကျနော်တို့ မိုင်း နားကို ရပ်နေတာ၊ အဲဒီရပ်နေတဲ့ ၁၀ ယောက်ကို မိုင်းဆွဲလိုက်တာ၊ ၂ ပွင့်ဗိုလ်နဲ့တပ်သား ၂ ယောက် အားလုံးပေါင်း ၃ ယောက်သေတာ၊ အဲဒီလမ်းက မကြာခဏယူတယ်။ မြို့အထွက်နဲ့တပ်ကြားထဲကို ကျနော်တို့အမြဲတမ်းလုပ်နေကြဆိုတော့ လမ်းကင်းမကြာခဏထွက်တယ်။ မြို့ပေါ်နဲ့တပ်ကို အကြီး အကဲတစ်ယောက်ကူးမယ်ဆိုရင် လမ်းကင်းယူနေကြ” ဟု ရေစကြိုမြို့နယ်ပြည်သူ့ကာကွယ်ရေးအဖွဲ့ -ပကဖ မှ တာဝန်ရှိသူက ရန်ကုန်ခေတ်သစ်သတင်းဌာနထံသို့ ပြောကြားသည်။
အဆိုပါ တိုက်ခိုက်မှုကို ရေစကြိုမြို့နယ် ပြည်သူ့ကာကွယ်ရေးအဖွဲ့ -ပကဖမှ ရဲဘော်များက လုပ် ဆောင်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ ကြောင်း သိရသည်။
ထိုသို့ မိုင်းဆွဲတိုက်ခိုက်ခံရပြီး ၁၅ မိနစ်ခန့်ကြာပြီးနောက်အကြမ်းဖက်စစ်ကောင်စီတပ်က လက်နက်ကြီး၊ လက်နက်ငယ်များဖြင့် အနီးအနားပတ်ဝန်းကျင်ကို ရမ်းသမ်းပစ်ခတ်ခဲ့ရာ ပြည်သူ ၂ ဦးမစိုးရိမ်ရ ထိခိုက်ဒဏ်ရာရရှိခဲ့ကြောင်း၊ ထို့အပြင် မိုင်းဆွဲခံရသည့်နေရာအနီးရှိ ပြည်သူ့နေအိမ် ၃ လုံးကိုလည်း အကြမ်းဖက်စစ်သားများက မီးရှို့ဖျက်ဆီးခဲ့ကြောင်း သိရသည်
