မကွေးတိုင်း၊ ပေါက်မြို့နယ်အတွင်း စစ်ကြောင်းထိုးနေသည့် အကြမ်းဖက် စစ်တပ်က ကျေးရွာများက ဆက်တိုက်မီးရှို့ဖျက်ဆီး၍ သောင်းနှင့်ချီသော ပြည်သူများ ဘေးလွတ်ရာ ထွက်ပြေးတိမ်းရှောင်နေရကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
အောက်တိုဘာလ ၂၉ ရက်နေ့တွင် အကြမ်းဖက် စစ်တပ်၏ ကပစ ၂၂ မှ ထွက်လာသော တပ်မ ၉၉ လက်အောက်ခံ တပ်ရင်း ၁၀၉ ၊ ၄၁၉ ၊ ၁၄ တို့ ပူးပေါင်းထားသော အင်အား ၃၀၀ ကျော်ပါ စစ်ကြောင်းသည် ရိုးကြီးရွာအနောက်ဘက်တွင် ရှားပင်ရေရွာ မိုးကောင်းချောင်းမှ အသက် ၃၀ ကျော်အရွယ် ကိုရွှေမင်းနှင့် ရိုကြီးတောမှ အသက် ၄၀ အရွယ် ကိုကျော်နိုင်ထွန်းတို့ကို ဖမ်းဆီးသတ်ဖြတ်ခဲ့ကြောင်း သိရသည်။
အောက်တိုဘာလ ၃၁ ရက်နေ့တွင် ထို စစ်ကြောင်းသည် ချက်ကန်ရွာစာသင်ကျောင်းကို ဝင်ရောက် စီးနင်းပြီး နေအိမ် ၇ လုံးကို မီးရှို့ဖျက်ဆီးခဲ့ကြောင်း၊ နိုဝင်ဘာလ ၁ ရက်နေ့တွင် ချက်ကန်ရွာမှတဆင့် ပင်တောင် ပျူစောထီးရွာနှင့် ဒီးဒုတ်ကွင်းရွာ ပျူစောထီးရွာကို စစ်ကြောင်း ၂ ကြောင်းခွဲ၍ ထွက်ခွာသွားကြောင်း၊ ထို့နောက် နိုဝင်ဘာလ ၃ ရက်နေ့တွင် ယင်းစစ်ကြောင်းသည် ပျူစောထီးများနှင့် ပူးပေါင်းကာ အင်အား ၅၀၀ ခန့်ဖြင့် ကျေးရွာများကို ထပ်မံ စစ်ကြောင်းထိုးနေခြင်းဖြစ်ကြောင်း သိရှိရသည်။
ယင်းစစ်ကြောင်းသည် နိုဝင်ဘာလ ၆ ရက်နေ့တွင် သရဖီရွာကို မီးရှို့ဖျက်ဆီးခဲ့ကြောင်း၊ ယနေ့ နိုဝင်ဘာလ ၈ ရက်နေ့တွင် လယ်လမ်းကျေးရွာနှင့် မြေခြားကျေးရွာရှိ စစ်ရှောင်များနေထိုင်သော တောတဲများကို ထပ်မံ မီးရှို့ဖျက်ဆီးနေကြောင်း သိရသည်။
ထိုအကြမ်းဖက် စစ်တပ် စစ်ကြောင်းကြောင့် ပေါက်မြို့နယ်အတွင်းရှိ ကျေးရွာ ၁၉ ရွာမှ အိမ်ထောင်စု ၃၀၀၀ ကျော် ပြည်သူ ၁၂၀၀၀ ကျော်သည် ဘေးလွတ်ရာ တောတောင်များအတွင်း ထွတ်ပြေးတိမ်းရှောင်နေရပြီး စားနပ်ရိက္ခာများလည်း အရေးပေါ် လိုအပ်လျက်ရှိကြောင်း ပေါက်မြို့နယ် လူသားစာနာဌာနက ပြောဆိုထားသည်။
“ပေါက်နယ်ထဲကို ထိုးနေတဲ့ စစ်ကြောင်းက အင်အားလည်းများတယ်။ သူတို့ ပျူစောထီးရွာထဲကနေ စထွက်လာတည်းက ရွာတွေကို စိတ်ကြိုက်ဝင်စီးပြီးမီးရှို့နေတာ အခုထိ ခွေးစစ်ကြောင်းက စစ်ကြောင်းထိုးနေတုန်းဆိုတော့ ပျက်စီးမှုအခြေအနေကို အတည်မပြုနိုင်သေးဘူး။ ဒီနေ့လည်း လယ်လမ်းကျေးရွာနဲ့ မြေခြားကျေးရွာက စစ်ရှောင် တောတဲတွေကို မီးဆက်ရှို့နေတယ် ပြည်သူတွေလည်း သူတို့ စပြီးဝင်လာတည်းက ရှောင်နေရတာ အခုထိပဲ စားနပ်ရိက္ခာတွေလည်း အရေးပေါ် လိုအပ်နေပါတယ်” ဟု ဒေသပြည်သူတစ်ဦးက ပြောဆိုသည်။
အလားတူ စစ်ကိုင်းတိုင်း၊ ရွှေဘိုမြို့နယ်အတွင်းရှိ နှောပင်ရွာကိုလည်း အကြမ်းဖက် စစ်တပ်က စစ်ကြောင်းထိုး ဝင်ရောက်ပြီး နေအိမ်များကို မီးရှို့ဖျက်ဆီးခဲ့ကြောင်း Wetlet Informational Network တာဝန်ခံ ကိုမုန်တိုင်းက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၈ ရက်နေ့ နံနက်အစောပိုင်း ၅ နာရီခန့်တွင် ရွှေဘိုမြို့နယ်၊ ဇီးတောရွာထဲတွင် ရောက်ရှိနေသော အကြမ်းဖက် စစ်တပ်သားများက နှောပင်ရွာကို ဝင်ရောက်စီးနင်းပြီး နေအိမ်များကို မီးရှို့ဖျက်ဆီးခဲ့ခြင်းဖြစ်ကြောင်း၊ လက်ရှိချိန်တွင် အကြမ်းဖက် စစ်တပ် စစ်ကြောင်းသည် စိုင်နိုင်လေးရွာကို ပြန်လည်ဝင်ရောက် သွားကြောင်း သိရသည်။
“စိုင်နိုင်လေးရွာကနေ စစ်ခွေးတွေ နံနက် အစောပိုင်း ၃ နာရီလောက်ထွက်လာပြီး နှောပင်ရွာကို ၅ နာရီလောက်မှာ ဝင်ရောက်စီးနင်းမီးရှို့တာ အဲစစ်ခွေးစစ်ကြောင်းက မီးရှို့ပြီးတော့ စိုင်နိုင်လေးရွာထဲကို ပြန်ဝင်သွားတယ်” ဟု Wetlet Informational Network တာဝန်ခံ ကိုမုန်တိုင်းက ပြောဆိုသည်။
အကြမ်းဖက် စစ်တပ်သည် ရွှေဘိုမြို့နယ် အတွင်းရှိ ရွှေဘို-မန္တလေး လမ်းပိုင်းကို နိုဝင်ဘာလ ၆ ရက်နေ့က စတင်စစ်ကြောင်းထိုး မီးရှို့နေခြင်းကြောင့် တိုက်ပွဲများလည်း ဖြစ်ပွားနေပြီး လက်ရှိချိန်တွင် အကြမ်းဖက် စစ်တပ် စစ်ကြောင်းကြောင့် ဇီးတောရွာ၊ တဂဏန်းရွာ၊ နှောပင်ရွာ၊ ဘုန်းဘွတ်ရွာ၊ စိုင်နိုင်ကြီးရွာနှင့် စိုင်နိုင်လေးရွာမှ သောင်းနှင့်ချီသော ပြည်သူများ ဘေးလွတ်ရာ ထွက်ပြေးတိမ်းရှောင်နေရကြောင်း သိရသည်။
