ကရင်ပြည်နယ်၊ ဘားအံမြို့တွင် ရောက်ရှိနေသည့် အကြမ်းဖက် မင်းအောင်လှိုင်မှာ ခရီးစဉ် သတင်းပေါက်ကြားမှုနှင့် လုံခြုံရေး စိုးရိမ်ရသည့် အခြေအနေများကြောင့် ဘားအံတွင် ညမအိပ်တော့ဘဲ မော်လမြိုင်သို့ ရဟတ်ယာဉ်ဖြင့် ထွက်ခွာပြီး အရှေ့တောင်တိုင်းစစ်ဌာနချုပ်တွင် ညအိပ်ခဲ့ကြောင်း စစ်တပ်သတင်းရင်းမြစ်တချို့ထံမှ သိရှိရသည်။
ယမန်နေ့ နိုဝင်ဘာလ ၁၅ ရက်နေ့ ဘားအံမြို့သို့ ရောက်ရှိခဲ့သော အကြမ်းဖက် မင်းအောင်လှိုင်မှာ ဘားအံတွင် ဌာနဆိုင်ရာ တွေ့ဆုံပွဲနှင့် လုပ်ဆောင်ခဲ့ပြီးနောက် လူငယ်စင်တာနှင့် ဇွဲကပင်မိုးလုံ လေလုံအားကစားကွင်း တည်ဆောက်မှုကို သွားရောက် စစ်ဆေးခဲ့ကြောင်း၊ မူလအစီအစဉ်ဖြစ်သည့် ဘားအံတပ်နယ် တွေ့ဆုံပွဲနှင့် တောင်ကလေး စစ်ဆေးရုံသို့ သွားရောက်မည့် အစီအစဉ်များကို ဖျက်သိမ်းခဲ့ကြောင်း၊ယင်းနောက် ဘားအံတွင် ညမအိပ်တော့ဘဲ ရဟတ်ယာဉ်ဖြင့် မော်လမြိုင်မြို့သို့ ထွက်ခွာကာ အရှေ့တောင်တိုင်းစစ်ဌာနချုပ်တွင် ညအိပ်ခဲ့ကြောင်း သိရှိရသည်။
“ဘားအံမှာ တပ်နယ်တွေ့ဆုံပွဲနဲ့ စစ်ဆေးရုံကိုသွားမယ့် အစီအစဉ်တွေ မလုပ်တော့ဘဲ လုံခြုံရေး အခြေ အနေကြောင့် ဖျက်သိမ်းတာရှိတယ်။ ဘားအံတပ်နယ်တွေ့ဆုံပွဲနဲ့ တောင်ကလေးစစ်ဆေးရုံသွားပြီး ဒဏ်ရာရ တပ်မတော်သားတွေကို တွေ့မယ့် အစီအစဉ်ကို ဖျက်လိုက်တယ်။ ခရီးစဉ်သတင်း ကြိုတင်ပေါက်ကြားလို့” ဟု စစ်တပ်သတင်းရင်းမြစ်က ပြောဆိုသည်။
ယမန်နေ့ ညနေ ၅ နာရီအချိန် မင်းအောင်လှိုင်မှာ ဘားအံမှ မော်လမြိုင်သို့ ရဟတ်ယာဉ်ဖြင့် မော်လမြိုင်လေဆိပ်သို့ ရောက်ရှိလာကြောင်း၊ ယင်းနောက် မော်လမြိုင် ကမ်းနားလမ်း၊ ညစျေးသို့ သွားရောက်ခဲ့ပြီး ကျိုက်သလ္လံဘုရားဖူးခဲ့ကြောင်း၊ ယနေ့ နံနက်ပိုင်း မော်လမြိုင်ရှိ ပြည်နယ်ခန်းမတွင် အကြမ်း ဖက် မင်းအောင်လှိုင်က ဌာနဆိုင်ရာ တွေ့ဆုံပွဲနှင့် အရှေ့တောင်တိုင်းစစ်ဌာနချုပ် တပ်နယ်တွေ့ဆုံပွဲ ပြုလုပ်မည်ဖြစ်ကြောင်း သိရှိရသည်။
