ရန်ကုန်၊ နိုဝင်ဘာ ၁၉
ချင်းပြည်နယ်၊ တီးတိန်မြို့အနီးတိုက်ပွဲတွင် ဆေးတပ်ဗိုလ် ၁ ဦးအပါအဝင် ၇ ဦးပွဲချင်းပြီး သေဆုံး ပြီး ခလရ ၅၀ တပ်ရင်းမှ ပြောင်းရွှေ့သွားသည့် ဗိုလ်မှူး လှမျိုးထွဋ် အပါအဝင် ၄ ဦးအပြင်းအထန် ဒဏ်ရာရရှိခဲ့ကြောင်း ယောအလင်းတန်းမှ ကိုမင်းဒဿက ရန်ကုန်ခေတ်သစ်သတင်းဌာနထံသို့ ပြော ကြားသည်။
နိုဝင်ဘာလ ၁၀ ရက်နေ့က တီးတိန်မြို့မှ ထွက်လာသော အကြမ်းဖက်စစ်တပ် စစ်ကြောင်းကို ချင်း တော်လှန်ရေး ပူးပေါင်းတပ်ဖွဲ့များက တိုက်ခိုက်ခဲ့ရာ ဗျူဟာမှူး လှမျိုးထွဋ်အပါအဝင် တပ်စိပ်တစ်ခု လုံး တိုက်ခိုက်ခံရပြီး ဆေးတပ်မှ ဗိုလ် ၁ ဦးအပါအဝင် ၇ ဦးပွဲချင်းပြီးသေဆုံးကာ ဗျူဟာမှူးလှမျိုး ထွဋ် အပါအဝင် ၄ ဦးအပြင်းအထန်ဒဏ်ရာရရှိခဲ့ကြောင်း၊ ဒဏ်ရာအပြင်းအထန်ရရှိသည့် ဗျူဟာမှူး လှမျိုးထွဋ်အပါအဝင် စစ်သား ၄ ဦးကို တီးတိန်မြို့ဆေးရုံ၌ တင်ပို့ကုသထားကြောင်း သိရသည်။
“သတင်းက အတည်ဖြစ်ပါတယ်။ တီးတိန်ဆေးရုံမှာ တက်နေတာပါ။ ရှေ့တန်းထွက်တာက သူနဲ့ အတူတူက တပ်စိပ်တစ်စိပ်၊ သူအပါအဝင် ၁၁ ဦး၊ အဲဒီမှာ ၇ ယောက်က ပွဲချင်းပြီးကျတာ၊ သေတဲ့ အထဲမှာ ဆေးတပ်က ဗိုလ်တစ်ဦးပါတယ်လို့ သိရပါတယ်။ တီးတိန်မြို့နားက တိုက်ပွဲမှာပါပဲ။ နောက် ဆက်တွဲ သေလား၊ ဆက်ရှင်နေသေးလားတော့ အတည်ပြုမရသေးဘူး၊ သူ့ Facebook အကောင့်က တော့ မတွေ့ရတော့ဘူး” ဟု ယောအလင်းတန်းမှ ကိုမင်းဒဿက ရန်ကုန်ခေတ်သစ်သတင်းဌာနထံ သို့ ပြောကြားသည်။
ဝမ်းဗိုက်ကျည်ထိမှန် ဒဏ်ရာ၊ ညာဘက်ပေါင် ကျည်ထိမှန် ဒဏ်ရာတို့ဖြင့် တီးတိန်မြို့ဆေးရုံ၌ တက် ရောက်ကုသမှုခံယူနေရသည့် ဗျူဟာမှူး ဗိုလ်မှူး လှမျိုးထွဋ်သည် အနောက်မြောက်တိုင်း စစ်ဌာန ချုပ် -နမခ တိုင်းမှူးအမိန့်ဖြင့် ဂန့်ဂေါမြို့အခြေစိုက် ခလရ ၅၀ တပ်ရင်းမှ ချင်းပြည်နယ်၊ တီးတိန်မြို့ အခြေစိုက် ခလရ ၂၆၉ တပ်ရင်းသို့ အောက်တိုဘာ လအတွင်း ပြောင်းရွှေ့ရသူဖြစ်ကြောင်း သိရ သည်။
“မိသားစုက ပါမယ်မထင်ဘူးဗျ။ ဂန့်ဂေါမှာလည်း သူတစ်ယောက်ပဲ၊ မိသားစုက တခြားမှာ။ သူ့မိခင် တပ်ရင်းက တပ်မ ၇၇ ကပါ၊ ရခိုင် ပြည်နယ်၊ နခခ ၅ မှာလည်း တာဝန်ကျဖူးတယ်။ နခခ ၅ မကျမီ သူက မကွေးကိုပြောင်းတယ်။ မကွေးကနေမှ ဂန့်ဂေါကိုရောက်တာ။ ယောဒေသကို ကလောတပ် ၅၅ နဲ့ တပ်မ ၇၇ က တပ်သားတွေ ရောပို့ထားတာ။ တပ်မ ၅၅ ကို ပြန်ခေါ်ပြီးရင် တပ်မ ၇၇ကို ပြန်ပို့ တယ်။ အဲလိုမျိုးပေါ့၊ ချင်းပြည်နယ်ပြောင်းကာစက ချင်းစာမိတော့မယ်လို့ ကျနော်တို့က ပြောခဲ့ဖူး တယ်။ ပြီးခဲ့တဲ့ မေလ ၁၂ ရက်နေ့က လယ်မရွာ လူသတ်မှုက သူ့လက်ချက်ပဲ” ဟု ယောအလင်းတန်း မှ ကိုမင်းဒဿက ရှင်းပြသည်။
ပြီးခဲ့သည့် မေလ ၁၂ ရက်နေ့ နံနက် ၂ နာရီ ခန့်တွင် ဂန့်ဂေါမြို့နယ်၊ ခလရ ၅၀ တပ်ရင်းမှ ထွက်လာ သော အကြမ်းဖက် စစ်ကောင်စီ တပ်သားများသည် လယ်မရွာကို ဝင်ရောက် စီးနင်းခဲ့ပြီး ကျေးရွာနေ ကလေးငယ်များအပါအဝင် လူငယ် ၁၁ ဦးကို ပစ်သတ်ကာ ပြည်သူများကိုလည်း ဖမ်းဆီးခေါ်ဆောင် သွားကြောင်း သိရှိရသည်။
အကြမ်းဖက် စစ်ကောင်စီ တပ်သားများ သတ်ဖြတ်သွားသော ပြည်သူ ၁၁ ဦးမှာ အသက် ၂၄ နှစ် အရွယ် ကျော်စန်းခိုင် ၊ အသက် ၂၃ နှစ်အရွယ် သက်ပိုင်ဦး ၊ အသက် ၃၉ နှစ်အရွယ် အောင်ကြည်မင်း ၊ အသက် ၂၅ နှစ်အရွယ် နေလင်းဦး ၊ အသက် ၂၇ နှစ်အရွယ် ညီလေး ၊ အသက် ၁၉ နှစ်အရွယ် ဂျွန် ကိုဝင်း ၊ အသက် ၁၅ နှစ်အရွယ် သီဟလင်း ၊ အသက် ၁၅ နှစ်အရွယ် မျိုးသီဟ ၊ အသက် ၁၂ နှစ်အ ရွယ် လျှံထွန်း ၊ အသက် ၁၉ နှစ်အရွယ် ကျော်မြတ်သူ နှင့် အသက် ၁၃ နှစ်အရွယ် မှိုင်းဝေ တို့ဖြစ် ကြောင်း သိရသည်။
ဓာတ်ပုံ- တော်လှန်ရေးတပ်များ၏ တိုက်ခိုက်မှုကြောင့် သေဆုံးခဲ့ရသော စစ်သားတစ်ဦး။ (ပုံအဟောင်းကို အသုံးပြုထားပါသည်။)
