ရန်ကုန်၊ နိုဝင်ဘာ ၂၀
မကွေးတိုင်း၊ ပေါက်မြို့နယ်တွင် စစ်ကြောင်းထိုးနေသော အကြမ်းဖက် စစ်တပ်က ကျေးရွာ၊ လယ်တောနှင့် ဗုံးခိုကျင်းများထဲတွင် မိုင်းထောင်ခဲ့၍ ပြည်သူ ၃ ဦး မိုင်းနင်းမိပြီး ပြင်းထန်ဒဏ်ရာရကာ ကျေးရွာများကိုလည်း ဆက်တိုက် မီးရှို့နေကြောင်း ပေါက်မြို့နယ် လူသားစာနာဌာနမှ တာဝန်ရှိသူနှင့် ဒေသပြည်သူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၁၆ ရက်နေ့မှ စတင်ပြီး ပေါက်မြို့နယ်မြောက်ပိုင်းရှိ ကျေးရွာများကို အကြမ်းဖက် စစ်တပ်က စစ်ကြောင်း ၄ ကြောင်းခွဲပြီး စစ်ကြောင်းထိုးနေ၍ ကျေးရွာ ၄၂ ရွာမှ ပြည်သူ ၃၅၀၀၀ ခန့် နီးစပ်ရာ တောတောင်များအတွင်း စစ်ဘေးတိမ်းရှောင်နေရကာ ပေါက် ကပစ ၂၄ လက်နက်စက်ရုံမှလည်း လက်နက်ကြီးများဖြင့် ရမ်းသမ်းပစ်ခတ်များ အပြင် လေကြောင်းဖြင့် ဗုံးကျဲ တိုက်ခိုက်မှုများပါ လုပ်ဆောင်နေခြင်းဖြစ်ကြောင်း သိရသည်။
ထို့ပြင် အကြမ်းဖက် စစ်တပ် စစ်ကြောင်းသည် ကျေးရွာများအတွင်း စစ်ကြောင်းထိုးဝင်ရောက်လာစဉ် ပြည်သူပိုင် နေအိမ်ခြံဝင်းများ၊ ဗုံးခိုကျင်းများ နှင့် လယ်ယာတောသွားရာလမ်းများတွင် နင်းမိုင်းများ ထောင်ထားခဲ့သောကြောင့် ပေါက်မြို့နယ် တောင်ပိုင်းရှိ ကျေးရွာ ၂ ခုမှ ပြည်သူ ၃ ဦး မိုင်းနင်းမိပြီး ခြေထောက်ပြတ်တောက်ကာ ပြင်းထန်ဒဏ်ရာရရှိခဲ့ကြောင်း သိရှိရသည်။
ထိုစစ်ကြောင်းသည် ယနေ့ နိုဝင်ဘာလ ၂၀ ရက်နေ့တွင် ကျောက်တိုင်ခင်းရွာ၊ ပေါက်ကုန်းရွာ၊ ဖလံကိုင်းရွာနှင့် ထန်းပေါက်ကုန်းရွာ အနီးအနားရှိ တောတဲများ၊ နေအိမ်များကို ဆက်တိုက် မီးရှို့နေကြောင်း၊ နိုဝင်ဘာလ ၁၉ ရက်နေ့တွင်လည်း တယ်ပင်ရွာမှ ပြည်သူပိုင် နေအိမ် ၆ လုံး ၊ ကားဂိုဒေါင်နှင့် စျေးဆိုင်ခန်းများကို မီးရှို့ဖျက်ဆီးခဲ့ကြောင်း၊ နိုဝင်ဘာလ ၁၈ ရက်နေ့ကလည်း ကျောက္ကာရွာမှ ကာလရှည် စစ်ဘေးရှောင်များ နေထိုင်သော တဲအလုံး ၃၀ ကို မီးရှို့ဖျက်ဆီးသွားကြောင်း သိရှိရသည်။
အဆိုပါ အကြမ်းဖက် စစ်တပ် စစ်ကြောင်းသည် ပေါက်မြို့နယ်အတွင်း စစ်ကြောင်းထိုးလာချိန်မှ စ၍ လက်ရှိအချိန်ထိ လမ်းပြအဖြစ် ဖမ်းဆီးလာသော ပြည်သူ ၂ ဦး အပါအဝင် ကျေးရွာများအတွင်းမှ ပြည်သူ ၈ ဦးကို ဖမ်းဆီးသတ်ဖြတ်ခဲ့ပြီး ပြည်သူ ၂၀ ကျော်ကိုလည်း ဖမ်းဆီးခေါ်ဆောင်သွားကြောင်း သိရသည်။
“စစ်ခွေးစစ်ကြောင်းက အခုထိရှိနေသေးတယ်။ ရွာတွေကို ဆက်တိုက်ကို ဝင်ရောက်စီးနင်း မီးရှို့နေတာနောက်ပြီး စစ်ခွေးတွေက ရွာတွေထဲမှာ မိုင်းတွေ ထောင်ခဲ့လို့ ပြည်သူတွေ မိုင်းနင်းမိတာ ထိခိုက်ဒဏ်ရာရတဲ့သူတွေရှိတယ်။ ပြည်သူတွေလည်း ဆက်လက် တိမ်းရှောင်နေရတုန်းပဲ” ဟု ဒေသပြည်သူတစ်ဦးက ပြောဆိုသည်။
