ရန်ကုန်၊ နိုဝင်ဘာ ၂၂
ပဲခူးတိုင်း၊ ပြည်မြို့နယ်၊ ကွင်းကြီးကျေးရွာအုပ်စုတွင် ရွေးကောက်ပွဲ မဲပေးစနစ် သရုပ်ပြရန် လူစုနိုင်ခြင်းမရှိ၍ အုပ်ချုပ်ရေးမှူး စန်းလွင်ကို အကြမ်းဖက် စစ်တပ်က ဖမ်းဆီးရန် လုပ်ဆောင်နေကြောင်း ဒေသတွင်း သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၁ ရက်နေ့တွင် ပြည်မြို့နယ် အတွင်းရှိ ကွင်းကြီးကျေးရွာအုပ်စု၌ အကြမ်းဖက် စစ်တပ်ကပြုလုပ်မည့် အတုအယောင်ရွေးကောက်ပွဲအတွက် မဲပေးစနစ် သရုပ်ပြရန် ကျေးရွာအုပ်စု အုပ်ချုပ်ရေးမှူး စန်းလွင်ကို အကြမ်းဖက် စစ်တပ်က လူစုခိုင်းထားခြင်းဖြစ်ကြောင်း သိရသည်။
ထိုသို့ လူစုခိုင်းထားသော်လည်း အုပ်ချုပ်ရေးမှူး စန်းလွင်က လူစုပေးနိုင်ခြင်းမရှိသောကြောင့် ထုချေလွှာတောင်းခံပြီး ဖမ်းဆီး အရေးယူရန် လုပ်ဆောင်နေခြင်းဖြစ်ကြောင်း၊ ထို့ပြင် ကျန်ရှိနေသော ကျေးရွာအုပ်စုများမှ အုပ်ချုပ်ရေးမှူးများကလည်း ထိုသို့ အရေးယူခံရမည်ကို ကြောက်လန့်နေကြောင်း သိရှိရသည်။
အကြမ်းဖက် စစ်တပ်သည် ပြည်မြို့နယ်အတွင်းရှိ ရပ်ကွက်/ကျေးရွာအုပ်စုများတွင် မဲပေးစနစ် သရုပ်ပြရန် ဌာနဆိုင်ရာ ဝန်ထမ်းများဖြင့် အဖွဲ့ ၆ ခု ဖွဲ့စည်းထားပြီး ရပ်ကွက်/ကျေးရွာအုပ်စုများတွင် မဲပေးစနစ် သရုပ်ပြရေး လုပ်ငန်းများ လုပ်ဆောင်နေခြင်းဖြစ်ကြောင်း သိရသည်။
ယင်းအဖွဲ့ ၆ ခုမှာ အဖွဲ့ (၁) စံရှိန် ဥက္ကဌ (ရွေးကော်) ၊ သိန်းဇော် ပညာရေးမှူး (ပညာရေး)၊ တင်ဆွေဦး အင်ဂျင်နီယာမှူး (လျှပ်စစ်)၊ အဖွဲ့ (၂) စိုးလွင် အဖွဲ့ဝင် (ရွေးကော်) ၊ စိုးဝင်းဦးလ/ထဦးစီးမှူး (လဝက) ၊ အဖွဲ့ (၃) သန်းဆွေ အဖွဲ့ဝင် (ရွေးကော်)၊ Dr ကေခိုင်ဝင်း ဦးစီးဌာနမှူး (ကျန်းဦးစီး) ၊ အောင်ကိုသန့် ဦးစီးမှူး (ပြန်ဆက်) ၊ အဖွဲ့ (၄) နေလွင် အဖွဲ့ဝင် (ရွေးကော်) ၊ အောင်ဆန်းဝင်း မန်နေဂျာ (စိုက်ပျိုးရေး)၊ အောင်ကိုဦး ဥပဒေအရာရှိ (ဥပဒေ) ၊ အဖွဲ့ (၅) ရဲနီထွန်း ဒုမြို့နယ်(ထွေအုပ်) ၊ ခင်မိုးရီ လက်/ညွှန် (စာရင်းစစ်)၊ အဖွဲ့(၆) အောင်ခိုင် အမှုဆောင်အရာရှိ (စည်ပင်) ၊ ကျော်လင်းစိုး ဦးစီးအရာရှိ (မီးသတ်) တို့ ပါဝင်ကြောင်း သိရှိရသည်။
“ကွင်းကြီးကျေးရွာအုပ်စု အုပ်ကြီးကတော့ တိမ်းရှောင်နေတယ်လို့တော့ သိရတယ်။ စစ်ခွေးတွေကလည်း ဖိအားပေး ခိုင်းစေနေတာ ထုချေလွှာ မရရင် ဖမ်းမယ်လို့တော့ သိရတယ်။ ကျန်တဲ့ ကျေးရွာ အုပ်စုက အုပ်ကြီးတွေလည်း ကြောက်လန့်နေကြတယ်” ဟု ဒေသတွင်း သတင်းရင်းမြစ်က ပြောဆိုသည်။
