ကရင်နီပြည်နယ်၊ ဖရူဆိုမြို့နယ် ရှေ့တန်းသို့ ပို့ဆောင်ခံရသော ခမရ ၅၃၁ တပ်ရင်းမှ စစ်သား ၁ ဦး သေနတ် ၁ လက်ယူဆောင်လာပြီး အလင်းဝင်ရောက်ခဲ့ကြောင်း Karenni Army BA-5 မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
နိုဝင်ဘာလ ၇ ရက်နေ့တွင် ဖရူဆိုမြို့ရှိ ခမရ ၅၃၁ တပ်ရင်းမှ စစ်သား ၁ ဦးသည် ရှေ့တန်းသို့ ပို့ဆောင်ခံရသောကြောင့် Karenni Army BA-5 ထံသို့ ချိတ်ဆက်ပြီး အလင်းဝင်ရောက်လာခဲ့ခြင်းဖြစ်ကြောင်း သိရှိရသည်။
ထိုသို့ အလင်းဝင်ရောက်လာသော စစ်သားသည် MA – 1 သေနတ် ၁ လက်၊ လက်ပစ်ဗုံး ၁ လုံး ၊ ဓား ၁ ချောင်း နှင့် လက်ကိုင်ဖုန်း တို့ယူဆောင်လာသောကြောင့် ဆုကြေးငွေချီးမြှင့်နိုင်ရန် CDM ဌာန သို့ ပို့ဆောင်ထားကြောင်း သိရသည်။
“သူက ရှေ့တန်း တစ်နေရာကနေ အလင်း၀င်လာတာပါ။ ဖရူဆိုကနေ ဘောလခဲကို ထိုးဆင်းတဲ့ စစ်ကြောင်းကနေ ထွက်လာတာပါ။ အလင်းဝင်ရောက်လာတဲ့သူ တပ်ရင်းက ခမရ ၅၁၃ ဖရူဆိုကပါ။ အလင်းဝင်ရာက်လာတဲ့သူက စစ်မှုထမ်းတပ်သားသစ် မဟုတ်ပါဘူး ရိုးရိုး စစ်သားပါ” ဟု Karenni Army BA-5 မှ တာဝန်ရှိသူက ပြောဆိုသည်။
လက်ရှိကာလ အလင်းဝင်ရောက်လိုသော စစ်သားများ၊ စစ်မှုထမ်း တပ်သားသစ်များ အနေဖြင့် နယ်မြေအတွင်းရှိ တော်လှန်ရေး တပ်ဖွဲ့များကို ချိတ်ဆက်၍ အမြန်ဆုံး အလင်းဝင်ရောက်ကြရန် တိုက်တွန်းလိုကြောင်း Karenni Army BA-5 မှ တာဝန်ရှိသူက ဖိတ်ခေါ်သည်။
