မြ၀တီမြို့နယ်တွင် တိုက်ပွဲဖြစ်ပြီး မြန်မာဘက်မှ လက်နက်ကျည်များ ထိုင်းဘက်သို့ ကျရောက်ပြီး နေအိမ်နှင့်ကားများ ပျက်စီး၊ ထိုင်းစစ်တပ်ကလည်း လက်နက်ကြီးကျည်ဖြင့် မြန်မာဘက်သို့ သတိပေး ပြန်လည်ပစ်ခတ်

ရန်ကုန်၊ နိုဝင်ဘာလ ၂၂

ကရင်ပြည်နယ်၊ မြဝတီမြို့နယ်၊ မင်းလက်ပံကျေးရွာတွင် ယနေ့ အကြမ်းဖက်စစ်တပ်နှင့် KNLA တပ်များ ထိတွေ့တိုက်ပွဲဖြစ်ပွားခဲ့ပြီး စစ်တပ်က ပစ်ခတ်သော ကျည်များမှာ ထိုင်းနိုင်ငံဘက်အခြမ်းကျရောက်ခဲ့ကာ လူနေအိမ် ၄ လုံးပျက်စီးခြင်းနှင့် ကား ၁ စီးပျက်စီးခဲ့သည်။

ယင်းကဲ့သို့ ထိုင်းနယ်မြေပေါ်သို့ မြန်မာဘက်မှ လက်နက်ကြီးကျည်များ ကျရောက်မှုကို ထိုင်းစစ်တပ်က သတိပေးသည့်အနေဖြင့် ၁၂၀ မမ လက်နက်ကြီး(ကျည်အလွတ်)ဖြင့် သတိပေး ပြန်လည် ပစ်ခတ်ခဲ့ကြောင်း ထိုင်းသတင်းဌာနများက သတင်းဖော်ပြသည်။

ယနေ့ နိုဝင်ဘာလ ၂၂ ရက် နံနက်ပိုင်း မြဝတီမြို့နယ်၊ မင်းလက်ပံကျေးရွာရှိ ကျားဖြန့်ခြံဝင်းအတွင်း တပ်စွဲထားသော အကြမ်းဖက်စစ်တပ်လက်အောက်ခံ DKBA ဗိုလ်စောဆန်းအောင်နှင့်အဖွဲ့က ၈၁ မမ၊ ၆၀ မမ၊ စနိုက်ပါတို့ဖြင့် ပစ်ခတ်ခဲ့ရာ ထိုင်းနိုင်ငံ၊ မဲဆောက်ခရိုင်အတွင်းရှိ ကျေးရွာများပေါ်သို့ ကျရောက်ပေါက်ကွဲခဲ့ပြီး လူနေအိမ် ၄ လုံးနှင့် မော်တော်ယာဉ်တစ်စီးပျက်စီးခဲ့ကြောင်း၊ လူထိခိုက်သေဆုံးမှုမရှိ ကြောင်း၊ စစ်တပ်နှင့် KNLA တပ်များအကြားလည်း ပစ်ခတ်မှုများဖြစ်ပေါ်ခဲ့ကြောင်း၊ ထိုင်းဘက်သို့ လက်နက်ကြီးများ ကျရောက်သည့်အတွက် ထိုင်းတော်ဝင်စစ်တပ်က ဒေသနေပြည်သူများကို အရေးပေါ် ရွှေ့ပြောင်းပေးခဲ့ရကြောင်း သိရှိရသည်။

ယင်းအပြင် ယမန်နေ့ နိုဝင်ဘာလ ၂၁ ရက်နေ့က မြဝတီမြို့နယ်၊ မင်းလက်ပံကျေးရွာနှင့် အင်ကြင်းမြိုင်ကျေးရွာ တို့ဘက်တွင် DKBA လက်အောက်ခံ ကျားဖြန့်ရုံစောင့် စစ်သားများနှင့် KNLA ၃၂ ဗျူဟာ စစ်ကြောင်း တို့ကြား တိုက်ပွဲဖြစ်ခဲ့ပြီး DKBA စစ်သား ၂၀ ဦးနှင့်အတူ လက်နက်ခဲယမ်းများကို KNLA က ခေါ်ဆောင် သိမ်းဆည်းသွားကြောင်း သိရှိရသည်။

“မနေ့က မင်းလက်ပံနဲ့ အင်ကြင်းမြိုင်ရွာမှာ တိုက်ပွဲဖြစ်နေတုန်း ကျားဖြန့်ခြံဝန်းမှာစောင့်နေတဲ့ DKBA ရဲဘော်တွေက မြင်းဆေးတွေ၊ အရက်တွေမူးပြီး သေနတ်တွေပစ်ဖောက်တာ လုပ်ကြတယ်။ မင်းလက်ပံရွာပြင်လမ်းပိုင်းမှာ DKBA ဗိုလ်ဆန်းအောင်အဖွဲ့က လုံခြုံရေးပေးထားတာ၊ မနေ့ကနဲ့ ဒီနေ့ ဖြစ်တဲ့ တိုက်ပွဲတွေကြောင့် မင်းလက်ပံရွာသားတွေ သောင်ရင်းမြစ်ဘက်ကို ရှောင်နေရတယ်။ စော ဆန်းအောင်ရဲ့ ကျားဖြန့်တိုက်တွေကနေ ပစ်တဲ့ ၈၁ မမတွေ၊ ၆၀ မမတွေ၊ စနိုက်ဘာကျည်တွေ ထိုင်းရပ်ကွက်နဲ့ တောင်ယာတွေထဲကိုကျတာ။ လူတော့ထိခိုက်မှုမရှိဘူး။ အိမ်တွေ၊ ကားတွေ ထိခိုက်တယ်” ဟု ကရင်စစ်ရေး သတင်းရင်းမြစ်က ပြောဆိုသည်။

မြ၀တီမြို့နယ်၊ မင်းလက်ပံကျေးရွာတွင် ထိတွေ့တိုက်ပွဲများကြောင့် အဆိုပါကျေးရွာမှ ပြည်သူ ၃၀၀ ကျော်မှာ ထိုင်း-မြန်မာနယ်စပ်၊ သောင်ရင်းမြစ်ကမ်းဘေးသို့ ထွက်ပြေးတိမ်းရှောင်ခဲ့ရကြောင်း သိရှိရသည်။