ဇီကုန်းမြို့ပေါ်တွင် KTV သို့ လာရောက် ပျော်ပါးသည့် စစ်သားနှင့်ရဲ ၇ ဦးကို တော်လှန်ရေးတပ်များက စီးနင်းတိုက်ခိုက်မှု စစ်သားနှင့်ရဲ ၇ ဦးသေဆုံးပြီး လက်နက်ခဲယမ်းတချို့ သိမ်းဆည်းရရှိ

ရန်ကုန်၊ နိုဝင်ဘာ ၂၃

ပဲခူးတိုင်း၊ဇီကုန်းမြို့ပေါ်တွင် KTV သို့ လာရောက် ပျော်ပါးသည့် စစ်သားနှင့်ရဲ ၇ ဦးကို တော် လှန်ရေးတပ်များက လျှပ်တပြက် ဝင်ရောက် စီးနင်းတိုက်ခိုက်ခဲ့ရာ စစ်သားနှင့်ရဲ ၇ ဦးသေဆုံးပြီး လက်နက်ခဲယမ်းတချို့ သိမ်းဆည်းရရှိကြောင်း နတ်စစ်သည် တပ်ဖွဲ့မှူး ကိုအောင်က ရန်ကုန်ခေတ်သစ်သတင်းဌာနထံသို့ ပြောဆိုသည်။

နိုဝင်ဘာလ ၂၂ ရက်နေ့ ည ၁၁ နာရီဝန်းကျင်အချိန် ဇီးကုန်းမြို့ပေါ်ရှိ KTV သို့ စစ်သားနှင့်ရဲ ၇ ဦးက လာရောက် သောက်စားမူးယစ်ပျော်ပါးနေကြောင်း သတင်းရရှိသဖြင့် တော်လှန်ရေးတပ်များက အဆိုပါ KTV ကို ဝင်ရောက်စီးနင်းခဲ့ကြောင်း၊ ယင်းသို့ စီးနင်းပြီးနောက် စစ်သားနှင့်ရဲ ၇ ဦးကို ပစ်ခတ်ခဲ့ရာ ၇ ဦးလုံး သေဆုံးသွားကြောင်း၊ လက်နက်နှင့်ခဲယမ်းတချို့ကို ကောက်ယူပြီး အလျှင်အမြန်ပြန်လည် ဆုတ်ခွာနိုင်ခဲ့ကြောင်း သိရှိရသည်။

“မနေ့ညက KTV ကို ရဲနဲ့ စစ်ခွေး ၇ ကောင်လာလို့ သွားပြီး KTV ကို စီးနင်း တိုက်ခိုက်ပါတယ်။ ၇ ဦးလုံး သေဆုံးပါတယ်။ ဓာတ်ပုံကတော့ မရိုက်နိုင်ဘူး။ မြို့ပေါ်ဆိုတော့ စစ်ခွေးကားတွေကလည်း ချက်ချင်းရောက်လာတော့။ ရတဲ့ ပစ္စည်းချက်ချင်း ကောက်ပြီး ဆုတ်ခွာခဲ့ရတာ” ဟု နတ်စစ်သည် တပ်ဖွဲ့မှူး ကိုအောင်က ပြောဆိုသည်။

လတ်တလော သေဆုံးသွားသော စစ်သားနှင့်ရဲများထံမှ G3 ၁ လက်၊ ကျည်ဘောက် ၄ ခု ၊ကျည်တောင့် ၈၀ ၊ ၊အီကွေ့မန့် ၂ ခု၊ ဓား ၃ လက်၊ လက်ထိပ် ၁ ခုတို့ကို သိမ်းဆည်းရရှိခဲ့ကြောင်း သိရှိရသည်။

အဆိုပါ စစ်ဆင်ရေးကို နတ်စစ်သည်တပ်ဖွဲ့နှင့်ကြို့ပင်ကောက် BTZM တို့က ပူးပေါင်းတိုက်ခိုက်ခဲ့ခြင်းဖြစ်ကြောင်း သိရှိရသည်။