ရန်ကုန်၊ နိုဝင်ဘာ ၂၃
ရှမ်းပြည်နယ်မြောက်ပိုင်းတွင် AA ။ MNDAA နှင့် TNLA တို့ပါဝင်သော မြောက်ပိုင်းမဟာမိတ်ညီနောင် ၃ ဖွဲ့ ထိန်းချုပ်ထားသော မူဆယ် ၁၀၅ မိုင်မှ ထွက်လာသော ကုန်ကားမှန်သမျှကို ဖမ်းဆီးရန်နှင့် အဆိုပါ နယ်စပ်ကုန်သွယ်ရေးဂိတ်မှ မည်သည့် ကုန်သွယ်ရေးမှ လုပ်ဆောင်ခြင်းမပြုရေး တားဆီး ဆောင်ရွက်ရန် စစ်တပ်က အထူး ညွှန်ကြားချက်ထုတ်ပြန်ထားကြောင်း နေပြည်တော်စစ်ဘက်သတင်းရင်းမြစ်ထံမှ သိရှိရသည်။
ယခုနိုဝင်ဘာလလယ်ပိုင်းမှစတင်၍ မြောက်ပိုင်းမဟာမိတ်ညီနောင် ၃ ဖွဲ့ ထိန်းချုပ်ထားသော မူဆယ် ၁၀၅ မိုင် ကုန်သွယ်ရေးဇုန်အတွင်းမှ ပြည်တွင်းသို့ တရုတ်ကုန်ပစ္စည်းများ တင်ဆောင်လာသော ကုန်ကားမှန်သမျှကို လမ်းပိုင်းအားလုံးတွင် မဖြစ်မနေ တားဆီး ဖမ်းဆီး ဆောင်ရွက်ရန် ညွှန်ကြားချက် တစ်ရပ် ထုတ်ပြန်လာကြောင်း သိရှိရသည်။
“တပ်မတော်ရဲ့ ထိန်းချုပ်မှု မရှိတဲ့ ၊ နိုင်ငံတော်ကို အခွန်မဆောင်တဲ့ ကုန်သွယ်ရေးဂိတ်တွေအားလုံးက တရားမဝင် ကုန်သွယ်ရေး အဖြစ် သတ်မှတ်တယ်။ တရားမဝင် ကုန်သွယ်ရေးဂိတ်တွေကနေ ကုန်သွယ်တဲ့ ကုန်ကားတွေရော၊ ကုန်သည်တွေရော အကုန်လုံးကို ထိထိရောက်ရောက် တားဆီး အရေးယူဖို့ ညွှန်ကြားချက် ထပ်ထုတ်ပါတယ်။ အဓိက ကုန်ကားတွေ လွတ်နေလို့ ညွှန်ကြားချက် ထပ်ထုတ်တဲ့သဘော။ တရားမဝင်ကုန်သွယ်ရေးကြောင့် ဒီနယ်စပ်ကို အခြေပြုပြီး နိုင်ငံတော်ကို ဆန့် ကျင်တဲ့ လက်နက်ကိုင်အဖွဲ့အစည်းတွေ ဘဏ္ဍာအင်အားတောင့်တင်းပြီး တပ်မတော်ကို ဆန့်ကျင်တိုက်ခိုက်နေတာ။။ အဲဒါကြောင့် မြောက်ပိုင်းမဟာမိတ်တွေ ထိန်းချုပ်တဲ့ ၁၀၅ မိုင် ကုန်သွယ်ရေးဇုန်က လာတဲ့ ကုန်ကားတွေနဲ့ အဲဒီကုန်သွယ်ရေးဇုန်ကို သွားတဲ့ ကုန်ကားတွေမှန်သမျှ တားဆီးပြီး ထိထိရောက်ရောက် အရေးယူဖို့ ၊ ကုန်သည်တွေကို တရားမဝင် ကုန်သွယ်ရေးဂိတ်တွေကနေ ကုန်သွယ်မှုတွေ မလုပ်ဖို့ တားဆီးမိန့် ထွက်လာတာ” ဟု နေပြည်တော်စစ်ဘက်သတင်းရင်းမြစ်က ပြောဆိုသည်။
ရှမ်းပြည်နယ်မြောက်ပိုင်းတွင် မြောက်ပိုင်းညီ နောင် မဟာ မိတ် ၃ ဖွဲ့ က သိမ်းပိုက်ထိန်းချုပ်ထားသော မူဆယ် ၁၀၅ မိုင် ကုန်သွယ်ရေးဂိတ်ကို ပြန်လည်ရရှိရေးအတွက် တရုတ်အစိုးရထံသို့ စစ်တပ်က ယခုနှစ် ဩဂုတ်လအတွင်း အဆိုပြု တင်ပြခဲ့သော်လည်း တရုတ်ဘက်က တစ်စုံတစ်ရာ အကြောင်းပြန်ကြားခြင်းမရှိကြောင်း ၊အကြမ်းဖက်စစ်တပ်က တရုတ်အစိုးရထံသို့ နှစ်နိုင်ငံကုန်သွယ်မှု လမ်းကြောင်းများ ပြန်လည် ဖွင့်လှစ်ရေးနှင့် နယ်စပ်ဒေသ တည်ငြိမ်အေးချမ်းရေးအတွက် ကူညီဆောင်ရွက်ပေးရန် အဆိုပြုခဲ့ပြီး ယင်းအဆိုပြုချက်တွင် တရုတ်-မြန်မာနယ်စပ်ကုန်သွယ်ရေးအတွက် အဓိက ကျသော မူဆယ် ၁၀၅ မိုင်ကုန်သွယ်ရေးဇုန်ကို မြောက်ပိုင်း မဟာမိတ်ညီနောင် ၃ ဖွဲ့က စစ်တပ်ထံသို့ ပြန်လည်ပေးရန် ကူညီဆောင် ရွက်ပေးရေးကို တရားဝင် တင်ပြ တောင်းဆိုခဲ့ကြောင်း သိရှိရသည်။
စက်တင်ဘာလ ၁၆ ရက်နေ့ တရုတ်ခရီးစဉ်တွင်လည်း မင်းအောင်လှိုင်က တရုတ်နှင့်မြန်မာနိုင်ငံသည် နယ်နမိတ်ချင်းထိစပ်နေသည့်အတွက် ကုန်သွယ်မှုပြုလုပ်ရာတွင် နယ်စပ်ဂိတ်များက အရေးပါသေား ကဏ္ဍမှ ပါဝင်နေကြောင်း၊ နှစ်နိုင်ငံအကြား နယ်စပ်ဒေသများ စီမံခန့်ခွဲရေးနှင့် ပူးပေါင်းဆောင် ရွက်ရေး သဘောတူစာချု့်အရ မြန်မာ-တရုတ်နယ်စပ်တစ်လျှောက်တွင် စုစုပေါင်း နယ်စပ်ဂိတ် ၈ ခုရှိကြောင်း၊ လက်ရှိအချိန်တွင် နယ်မြေလုံခြုံရေးအခြေအနေအရ အဆိုပါ နယ်စပ်ဂိတ် ၈ ခုအနက်မှ မူဆယ်- ရွှေလီ နယ်စပ်ဂိတ် ၁ ခုသာ ဖွင့်လှစ်ထားရှိနိုင်ပြီး ကျန်နယ်စပ်ကုန်သွယ်ရေးဂိတ်များမှာ တိုင်းရင်သားလက်နက်ကိုင်အဖွဲ့များ၏ တိုက်ခိုက်မှုများကြောင့် ရပ်တန့်ထားရကြောင်း ထုတ်ဖော်ပြောဆိုခဲ့သည်။
မြောက်ပိုင်းမဟာမိတ်ညီနောင် ၃ ဖွဲ့ကလည်း ယခုနှစ် ဇူလိုင်လ ၁ ရက်နေ့မှစတင်၍ မူဆယ် ၁၀၅ မိုင် ကျင်းစန်းကျော်ဂိတ်တွင် ကုန်သွယ်မှုအသွင်းအထုတ် ဂျူတီဆောင်နှုန်းများကို စီမံခန့်ခွဲ၍ အခွန်များ ကောက်ခံလျက်ရှိသည်။
