စစ်ကိုင်းတိုင်း၊ ကလေးမြို့နယ်နှင့် ချင်းပြည်နယ်၊ တီးတိန်မြို့နယ်တို့တွင် စစ် တပ်စစ်ကြောင်းကို တိုက်ခိုက်ချေမှုန်းခဲ့ရာ စစ်သား ၅၀ ကျော်သေဆုံးပြီး စစ်သုံ့ပန်းနှင့်လက်နက်ခဲယမ်းများ သိမ်းဆည်း ရရှိခဲ့ကြောင်း ချင်းပြည်နယ်အစိုးရ၊ ကာကွယ်ရေးဝန်ကြီးဌာန၏ ပြန်ကြားရေးတာဝန်ခံအဖြစ် Salai Nai John Kim ကရန်ကုန်ခေတ်သစ်သတင်းဌာနထံသို့ ပြောဆိုသည်။
နိုဝင်ဘာလ ၁၈ ရက်၊ ၁၉ ရက်နှင့် ၂၂ ရက်နေ့တို့တွင် ကလေးမြို့နှင့် ဂန့်ဂေါမြို့အကြားသို့ ဝင်ရောက် လာသော အကြမ်းဖက်စစ်တပ်စစ်ကြောင်းကို ချင်း ပြည်နယ်အစိုးရ၊ ကာကွယ်ရေးဝန်ကြီးဌာန၊ စစ် ကြောင်း ၁ မှ မိတ်ဖက် Vakok PDF အပါအဝင် ကျောင်းသားတပ်မတော် (ABSDF) ၊ PDF ခရိုင်တပ် ရင်းများ၊ ပကဖများ၊ Kalay Revolution Force (KRF)၊ Ranger Kalay Defense Force (RKDF)၊ Yaw Defense Force (YDF) စ သည့် မဟာမိတ်အဖွဲ့များပူးပေါင်းကာတိုက်ခိုက်ခဲ့ကြောင်း သိရသည်။
ယင်းတိုက်ပွဲအတွင်း အကြမ်းဖက်စစ်ကောင်စီတပ်က နိုဝင်ဘာလ ၁၈ ရက်တွင် Fighter Jet ဖြင့် ဗုံး ၈ လုံး၊ Y-12 ဖြင့် ဗုံးအလုံး ၁၅၀ ကျော်၊ နိုဝင်ဘာလ ၁၉ ရက်တွင် Fighter Jet ဖြင့် တစ်ကြိမ်၊ နိုဝင် ဘာလ ၂၂ ရက်တွင် Y-12 ဖြင့် ဗုံးအလုံး ၆၀ ကျော် လေကြောင်းတိုက်ခိုက်မှုများ ပြုလုပ်ခဲ့ကြောင်း သိရသည်။
“အခု ဂန့်ဂေါ၊ ဟံသာ၀တီနဲ့ ကြံသာတို့ဘက်မှာ တိုက်ပွဲတွေ ဆက်လက်ပြင်းထန်နေပါတယ်။ စစ်တပ်စစ်ကြောင်းတွေက ချင်းပြည်၊ ဟားခါးကို ဦးတည်လာနေတာပါ” ဟု ချင်းပြည်နယ်အစိုးရ၊ ကာကွယ်ရေးဝန်ကြီးဌာန၏ ပြန်ကြားရေးတာဝန်ခံအဖြစ် Salai Nai John Kim ကရန်ကုန်ခေတ်သစ်သတင်းဌာနထံသို့ ပြောဆိုသည်။
အလားတူ ချင်းပြည်နယ်အစိုးရ၊ ကာကွယ်ရေးဝန်ကြီးဌာနအောက်ရှိ စစ်ကြောင်း (၂) သည် မဟာ မိတ် Kalay Revolution Force (KRF) အပါအဝင် Chin National Defense Force (CNDF) ၊ PDF Zoland စသည့် မိတ်ဖက်အဖွဲ့များနှင့် လက်တွဲ၍ တီးတိန်မြို့နှင့်ခိုင်ကမ်းမြို့အကြားတွင် ဝင်ရောက် လာသော စစ်ကောင်စီတပ်ကို တိုက်ခိုက်လျက်ရှိပြီး စစ်တပ်က နိုဝင်ဘာလ ၂၂ ရက်တွင် Fighter Jet ဖြင့် ၂ ကြိမ် ဗုံးကျဲ တိုက်ခိုက်ခဲ့ကြောင်း သိရသည်။
“အခု ချင်းပြည်ဘက်ကို စစ်တပ်က စစ်ကြောင်းတွေ ခွဲပြီး တောက်လျှောက်ကို တက်လာနေပါတယ်။ မကွေးဘက်ကရော ကလေးမြို့ဘက်ကရော တက်လာတာပါ။ လေကြောင်းတိုက်ခိုက်မှုကို အားယူပြီး မြေပြင်က ခြေလျင်စစ် ကြောင်းတွေက စစ်မှုထမ်းအသစ်တွေနဲ့ အင်အား အလုံးအရင်းကို အားယူပြီး တက်လာတာ။ ချင်းပြည်တော်လှန်ရေးတပ်တွေက စုပေါင်းခုခံနေပါတယ်” ဟု ချင်းတော်လှန်ရေးတပ်မှ တပ်ရင်းမှူးတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
အဆိုပါတိုက်ခိုက်ပွဲများအတွင်း အကြမ်းဖက်စစ်တပ်က စစ်သား ၅၀ ကျော် သေဆုံးခဲ့ပြီး ထိခိုက်ဒဏ် ရာရရှိသော စစ်သားများကို Mi 17 ရဟတ်ယာဉ်ဖြင့် သယ်ဆောင်သွားကြောင်း၊ ထို့အပြင် စစ်သုံ့ပန်း အချို့နှင့် လက်နက်ခဲယမ်းများလည်း သိမ်းဆည်းရရှိခဲ့ပြီး အကြမ်းဖက်စစ်ကောင်စီတပ်ဖွဲ့မှ တိုက် ခိုက် လာသော ဒရုန်းအချို့ကိုလည်း ပစ်ချနိုင်ခဲ့ကြောင်း သိရသည်။
