ရန်ကုန်၊ နိုဝင်ဘာ ၂၃
မကွေးတိုင်း၊ ပခုက္ကူမြို့နယ်နှင့် မြိုင်မြို့နယ်ရှိ အကြမ်းဖက် စစ်တပ် တပ်စွဲထားသော နေရာနှင့် စစ်ကြောင်းကို တိုက်ခိုက်ရာ တပ်စခန်းတချို့ သိမ်းပိုက်ရရှိပြီး စစ်သား ၅ ဦးထိခိုက်သေဆုံးကာ ၂ ဦးအရှင်ဖမ်းမိပြီး စစ်တပ်က ပြည်သူ ၂ ဦးကို ဖမ်းဆီးသတ်ဖြတ်ခဲ့ကြောင်း Earthquake people’s defence force မှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
စက်တင်ဘာလ ၃၀ ရက်နေ့ နံနက် ၅ နာရီ ၃၀ မိနစ်ခန့်တွင် ပခုက္ကမြို့နယ် မြစ်ခြေမြို့၊ လက်ပံချောင်း ကျေးရွာ ဘုန်းကြီးကျောင်းတွင် တပ်စွဲထားသော အကြမ်းဖက် စစ်တပ်ကို တော်လှန်ရေး တပ်ဖွဲ့များက ဝင်ရောက် တိုက်ခိုက်ခဲ့ကြောင်း၊ ထို တိုက်ခိုက်မှုသည် မိနစ် အနည်းငယ်သာကြာမြင့်ခဲ့ပြီး ဘုန်းကြီးကျောင်း အနောက်ဘက်ရှိ အကြမ်းဖက် စစ်တပ်၏ ကာကင်းစခန်းကုန်း၊ စာသင်ကျောင်း ၊ ဂိတ်နှင့် လက်ပံချောင်း စက်လှေဆိပ် တို့ကို သိမ်းပိုက်နိုင်ခဲ့ကြောင်း သိရသည်။
အောက်တိုဘာလ ၁ ရက်နေ့တွင် ပခုက္ကူမြို့နယ် ကံရပ်ရွာနှင့် တန့်ကြည်ရွာကို ဝင်ရောက်လာသော အကြမ်းဖက် စစ်တပ် စစ်ကြောင်းကို တန့်ကြည်ရွာ ဘုန်းကြီးကျောင်းအနီးတွင် တော်လှန်ရေးတပ်ဖွဲ့များက ၂ ကြိမ် ကြားဖြတ်တိုက်ခိုက်ခဲ့ကြောင်း၊ ထိုထိတွေ့တိုက်ပွဲများသည် အောက်တိုဘာလ ၃ ရက်နေ့မှ ၅ရက်နေ့ထိ ထပ်မံဖြစ်ပွားခဲ့ပြီး အကြမ်းဖက် စစ်တပ်ဘက်မှ အထိနာကာ ပါရာမော်တာ ၄ စီး ဖြင့် ဗုံး ၁၂ လုံး ကျဲချ တိုက်ခိုက်ခဲ့ကြောင်း သိရှိရသည်။
အောက်တိုဘာလ ၂၂ ရက်နေ့တွင် ပခုက္ကူမြို့နယ်၊ ညောင်ဂျစ်ပင်ရွာအနီးကို စစ်ကြောင်းထိုး ဝင်ရောက်လာသော အကြမ်းဖက် စစ်တပ်နှင့် တော်လှန်ရေး တပ်ဖွဲ့များ တိုက်ပွဲထပ်မံ ဖြစ်ပွားခဲ့ကြောင်း၊ နိုဝင်ဘာ ၁၂ ရက်နေ့ နံနက် ၉ နာရီ ၄၅ မိနစ်ခန့်တွင် မြိုင်မြို့နယ်၊ စက်မှု ၂ မှ ဝက်ပုပ်ရွာအတွင်းကို ဝင်ရောက်လာသော စစ်တပ် စစ်ကြောင်းနှင့် ထိတွေ့တိုက်ပွဲများ ဖြစ်ပွားခဲ့ပြီး အကြမ်းဖက် စစ်တပ်ဘက်မှ ၅ ဦး ထိခိုက်သေဆုံးကာ တော်လှန်ရေး ရဲဘော် ၂ ဦး ကျဆုံးခဲ့ကြောင်း၊ တိုက်ပွဲအတွင်း အထိနာခဲ့သော စစ်တပ်က မြိုင်စက်မှု ၂ သို့ ပြန်လည် ဆုတ်ခွာသွားချိန် ပြည်သူ အမျိုးသား ၁ ဦးနှ့် အမျိုးသမီး ၁ ဦးတို့ကို ဖမ်းဆီးသတ်ဖြတ်သွားကြောင်း၊ တိုက်ခိုက်ပွဲဖြစ်ပွားရာနေရာများကို တော်လှန်ရေးတပ်ဖွဲ့ဝင်များက နယ်မြေရှင်းလင်းရေး ပြုလုပ်စဉ် စစ်သားအလောင်းတချို့နှင့် စစ်အသုံးအဆောင်ပစ္စည်းတချို့ သိမ်းဆည်းရရှိခဲ့ကြောင်း သိရသည်။
နိုဝင်ဘာ ၁၆ ရက်နေ့တွင် ပခုက္ကူမြို့နယ်၊ တင်းဂတ်ပျူရွာမှ ပျူစောထီး ဒုခေါင်းဆောင် ၁ ဦးနှင့် နောက်လိုက် ၁ ဦးသည် အရပ်သားပြည်သူများကို ပေါ်တာဆွဲ ဖမ်းဆီးရန် ထွက်လာစဉ် တော်လှန်ရေး တပ်ဖွဲ့များက လမ်းပိုင်းတနေရာ၌ အရှင်ဖမ်းဆီးနိုင်ခဲ့ကြောင်းသိရှိရသည်။
“လက်ပံချောင်းလှေဆိပ်က တိုက်စရာမလိုပဲနဲ့ ရခဲ့တာ၊ သူတို့က တန်ကြည်တောင်ပေါ် အထိဆုတ် သွားတယ်။ တန့်ကြည်တောင်အောက်က လက်ပံချောင်း၊ တန့်ကြည်ရွာအဲလိုနဲ့ သူတို့ဂိတ်ဖွင့်ထားတဲ့ ရွာတွေမှာ တိုက်ပွဲဖြစ်တာ။ စခတွေဘက်က ထိခိုက်သေဆုံးမှုကတော့ ရှိတယ်။ ကျနော်တို့ဘက် က တော့ အတိအကျ အတည်ပြုမရဘူး။ ထိခိုက်ဒဏ်ရာရတာလောက်ပဲမြင်ရတယ်။ သူတို့ဘက်က အရေးမသာလို့ နောက်ဆုတ်သွားတာ အောက်တိုဘာ ၂၂ ရက်နေ့ကတော့ မနက်ခင်းတစ်ပိုင်းလောက်တိုက်ပွဲဖြစ်တယ်။ ညောင်ဂျစ်ပင်ကနေထွက်လာလို့ တိုက်ပွဲဖြစ်တာ၊ ကံမဘက်ကို စစ်ကြောင်းထိုးမယ်ဆိုရင် ညောင်ဂျစ်ပင်ကနေထိုးတာ၊ ပခုက္ကူနဲ့ညောင်ဂျစ်ပင်ကြားက သူတို့စိုးမိုးနယ်မြေပေါ့။ အောက်တိုဘာလ ၂၂ ကတည်းကနေ မြစ်ခြေတကြောဘက်ရော၊ ကမ္မဘက်ရော စစ်ကြောင်းပတ်ထိုးရင်းနဲ့ စက်မှု ၂ ထဲကို ရောက်သွားတာ။ ကြားထဲမှာလည်း တိုက်ပွဲဖြစ်တာတွေရှိတယ်။ မြေမြှုပ်ထားတာ အလောင်း ၂ လောင်းတွေ့တယ်။ မီးရှို့ထားတာမျိုးတွေ့တယ်။ အနည်း ၅ ဦးလို့ခန့်မှန်းထားတာပေါ့။ တိုက်ပွဲကတော့ အခုလက်ရှိအချိန်ထိ ဆက်ဖြစ်နေတုန်းပဲ။ စစ်ခွေးစစ်ကြောင်းကလည်း ပြန်မဆုတ်သေးဘူး။ မြိုင်နဲ့ ပေါက်အစပ်မှာရှိသေးတယ်။ နေ့တိုင်းနီးပါးကို ထိတွေ့မှုဖြစ်နေတယ်” ဟု Earthquake people’s defence force မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို Earthquake people’s defence force၊ ပခုက္ကူခရိုင် Local တပ်ရင်း- ၁(PDLB) နှင့် မဟာမိတ်ပူးပေါင်း တပ်ဖွဲ့များက လုပ်ဆောင်ခဲ့ကြောင်း၊ ပြည်သူများအနေဖြင့် အကြမ်းဖက် စစ်တပ်၏ လေကြောင်းအန္တရာယ်ကို အထူးဂရုစိုက်ကြရန်နှင့် စစ်ရေးအသိ၊စစ်ရေးသတိရှိကြရန်တိုက်တွန်းမေတ္တာရပ်ခံထားသည်။
