ရန်ကုန်၊ နိုဝင်ဘာ ၂၃
စစ်ကိုင်းတိုင်း၊ မင်းကင်းမြို့နယ်၊ လောင်းပြည့်ရွာရွှေမှော်ကို အကြမ်းဖက် စစ်တပ်က လေယာဉ်၊ Gyrocopter များဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၂ ဦးသေဆုံးပြီး ၁၀ ဦးကျော် ထိခိုက်ဒဏ်ရာရကာ ရွာလုံးကျွတ် ထွက်ပြေးတိမ်းရှောင်နေရကြောင်း ဒေသပြည်သူများနှင့် မင်းကင်းနွေဦးတော်လှန်ရေးအဖွဲ့မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၂ ရက်နေ့ မွန်းလွဲ ၁ နာရီကျော်ခန့်မှ စတင်ပြီး အကြမ်းဖက် စစ်တပ်က မင်းကင်းမြို့နယ်၊ လောင်းပြည့်ရွာရွှေမှော်ကို တံတားဦး လေတပ်မှ တက်လာသော K-8W လေယာဉ် ၁ စီးနှင့် Gyrocopter ၃ စီးက ၈ ကြိမ်ထက်မနည်း ဗုံးကျဲ တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ်၏ ဗုံးကျဲ တိုက်ခိုက်မှုအတွင်း ရွှေမှော်တွင် လုပ်ကိုင်နေသော ပြည်သူ ၂ ဦး သေဆုံးပြီး ၁၀ ဦးကျော် ထိခိုက်ဒဏ်ရာရရှိကာ ပျောက်ဆုံးသူများလည်းရှိကြောင်း၊ ထို့ပြင် ဖလက် ၁ စီးနှင့် မျောဖောင် ၁ စီးလည်း မီးလောင် နစ်မြုပ်ခဲ့ကြောင်း သိရှိရသည်။
” ဖလက်တစ်စီးမြုပ်တယ်။ မျောဖောင် ၁ စီးလည် မီးလောင်တယ်လို့ သိရတယ်။ ၂ ဦးသေဆုံးပြီး ၁၀ ဦးကျော် ထိခိုက် ဒဏ်ရာရတယ်လို့ သိထားရတယ်။ ကျနော်တို့ အသေးစိတ် အခြေအနေတော့ မသိရသေးဘူး။ ပြည်သူတွေလည်း အကုန်လုံး ပြေးနေရတော့ အဆက်အသွယ် မရတာလဲ ပါတယ်” ဟု မင်းကင်းနွေဦးတော်လှန်ရေးအဖွဲ့မှ တာဝန်ရှိသူက ပြောဆိုသည်။
လက်ရှိချိန်တွင် လောင်းပြည့်ရွာတွင် နေထိုင်သော ပြည်သူများသည် အကြမ်းဖက် စစ်တပ်က လေကြောင်း တိုက်ခိုက်မှုများ ထပ်မံ ပြုလုပ်လာမည်ကို စိုးရိမ်သောကြောင့် ရွာလုံးကျွတ် ထွက်ပြေးတိမ်းရှောင်နေရကြောင်း သိရှိရသည်။
