ရန်ကုန်၊ နိုဝင်ဘာ ၂၃
ပဲခူးတိုင်း၊ ဖြူးမြို့နယ်နှင့် ကျောက်တံခါးမြို့နယ်အစပ်မှ စစ်တောင်းမြစ်ဝှမ်း ပင်လယ်ဝထိ သွားလာနေသော စက်လှေများကို ရှောင်တခင် ဝင်ရောက် စစ်ဆေးရာ စစ်တပ်ထံသို့ ရိက္ခာ ပို့ဆောင်မည့် စက်လှေတချို့ ဖမ်းဆီးရမိခဲ့ကြောင်း Bago District People’s Defense Organization – ပဲခူးခရိုင် ပကဖ မှတာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံ ပြောဆိုသည်။
အောက်တိုဘာလပိုင်းမှ စတင်၍ ဖြူးမြို့နယ်နှင့် ကျောက်တံခါးမြို့နယ် အစပ်တွင်ရှိသော ညောင်လေးပင်-ရွှေကျင်-ဝေါ-ကဝ ထိစပ်နေသော ပင်လယ်ဝ အထိ စစ်တောင်းမြစ်ဝှမ်းအတွင်း ကုန်ပစ္စည်းတင်ဆောင်သည့် စက်လှေများ ၊ ခရီးသည်တင် စက်လှေများ၊ ငါးဖမ်းလှေများ၊ သဲတင်စက်လှေများနှင့် ဝါးဖောင်တင် စက်လှေများကို PDF တပ်ဖွဲ့က ရှောင်တခင် ဝင်ရောက် စစ်ဆေးမှုများ လုပ်ဆောင်နေခြင်းဖြစ်ကြောင်း သိရသည်။
ထိုသို့ ရှောင်တခင် ဝင်ရောက်စစ်ဆေးစဉ် စစ်တောင်းမြစ်ဝှမ်းအနီးအနားရှိ အကြမ်းဖက် စစ်တပ် တပ်စွဲထားသော နေရာများကို ပို့ဆောင်မည့် ရိက္ခာများ တင်ဆောင်လာသော စက်လှေ တချို့ကို PDF တပ်ဖွဲ့က ဖမ်းဆီးရရှိခဲ့ခြင်းဖြစ်ကြောင်း သိရှိရသည်။
“ကျနော်တို့ မြစ်ကြောင်း အသွားအလာစောင့်ကြည့်တယ်။ သတင်းအချက်အလက် ရရှိမှုပေါ်မူတည်ပြီး စစ်ဆေးတာပါ။ စက်လှေပေါ်က စကစ ရိက္ခာ ဆန် ဆီ ရခဲ့တာ ရှိပါတယ်။ အောက်တိုဘာလကနေ နိုဝင်ဘာလအတွင်း လုပ်ဆောင်ခဲ့တာပါ။ ဆက်လက်ပြီးတော့လဲ လုပ်ဆောင်နေမှာပါ။ စစ်ခွေး ဒလန် ငါးဖမ်းလှေတွေလည်း ရှိတတ်တယ်။ ဖမ်းဆီရမိသူတွေကို စစ်ဆေးပေါ်ပေါက်ချက်အရ အပစ်ပေး အရေးယူလုပ် ဆောင်တာတွေလုပ်ဆောင်ပါတယ်။ တချို့က ဆက်နွယ်ရုံဆို ဖမ်းဆီးစစ်ဆေး ပညာပေး ပြန်လွှတ်တယ်။ တစ်ချို့က ပြစ်ဒဏ် ပေးထားတယ်” ဟု Bago District People’s Defense Organization – ပဲခူးခရိုင် ပကဖ မှတာဝန်ရှိသူက ပြောဆိုသည်။
အလားတူ နိုဝင်ဘာလ ၇ ရက်နေ့ကလည်း ပဲခူးခရိုင် ပကဖ ရဲဘော်များက စစ်တောင်းမြစ်ဝှမ်းအတွင်း ဖြတ်သန်းမောင်းနှင်လာသော ကုန်တင်ခရီးသည်တင် စက်လှေများ၊ ငါးဖမ်းလှေများ၊ သဲတင်လှေများ၊ ဝါးဖောင်များကို ရှောင်တခင်ဝင်ရောက် စစ်ဆေးစဉ် အကြမ်းဖက် စစ်တပ် ထုတ်ပြန် မြန်မာ ဘီယာများ တင်ဆောင်လာသည့် စက်လှေကိုလည်း ဖမ်းဆီးရရှိခဲ့ပြီး ဘီယာအားလုံးကို ဖျက်ဆီးခဲ့ကြောင် ပဲခူးခရိုင် ပကဖ က ထုတ်ပြန်ထားသည်။
စစ်တောင်းမြစ်ဝှမ်းအတွင်း ပဲခူးခရိုင် ပကဖ ရဲဘော်များ၏ စုံစမ်းမေးမြန်းမှုကို ကြည်ဖြူစွာ စစ်ဆေးခံပေးပါရန်နှင့် စုံစမ်း စစ်ဆေးချိန် ပဲခူးခရိုင် ပကဖ ရဲဘော်များကို ငွေကြေးကောက်ခံမှု တစုံတရာ ပေးစရာမလိုကြောင်း တောင်းခံမှုရှိလာပါက ပဲခူးခရိုင် ပကဖ သို့ တိုင်ကြားနိုင်ကြောင်း၊ စုံစမ်းစစ်ဆေးမှု မခံသော မောင်းပြေးလှော်ခတ်သွား သောလှေများကိုလည်း အကြမ်းဖက် စစ်တပ်၏ စက်လှေအဖြစ်သက်မှတ်ကာ အပစ်ပေးအရေးယူမှုများ လုပ်ဆောင်သွားပါမည်ဖြစ်ကြောင်း ပဲခူးခရိုင် ပကဖ မှတာဝန်ရှိသူက ဆက်လက်ပြောဆိုသည်။
ထို့ပြင် အကြမ်းဖက် စစ်တပ်သည် အောက်တိုဘာလပိုင်းမှ စတင်ပြီး ရေတာရှည်မြို့နယ် စစ်တောင်းမြစ်အရှေ့ဘက်ကိုလည်း စစ်ကြောင်းထိုးပြီး ပိနွဲပင်ရွာ၊ ရွေသောင်ရွာသစ်ရွာနှင့် ကဲလင်းဆိပ်ရွာ တို့ကို ဆက်တိုက် မီးရှို့ဖျက်ဆီးခဲ့ကာ ပြည်သူ ၅၀ ကျော်ကိုလည်း လူသားဒိုင်းအဖြစ် ဖမ်းဆီးသွားကြောင်း သိရသည်။
