ရန်ကုန်၊ နိုဝင်ဘာ ၂၃
မကွေးတိုင်း၊ ပေါက်မြို့နယ် နှင့်မြိုင်မြို့နယ်အစပ်တွင် စက်တပ်လေထီး ပျက်ကျခဲ့သော နေရာကို လာရောက်ရှာဖွေသည့် စစ်တပ် စစ်ကြောင်းနှင့် တော်လှန်ရေးတပ်ဖွဲ့များ တိုက်ပွဲဖြစ်ပွားပြီး စစ်သား ၄ ဦး ထိခိုက်သေဆုံးကာ စစ်မှုထမ်း တပ်သားသစ် ၃ ဦးလည်း အလင်းဝင်ရောက်ခဲ့ကြောင်း မြိုင် ပကဖ က ထုတ်ပြန်ထားသည်။
ယနေ့ နိုဝင်ဘာလ ၂၃ ရက်နေ့ နံနက်အစောပိုင်း ၁ နာရီ ၃၀ မိနစ်ခန့်တွင် ပေါက်မြို့နယ်နှင့် မြိုင်မြို့နယ် ထိစပ်နေသော နယ်မြေများဖြစ်သည့် နသတ်ရွာ၊ တဲကြီးရွာ၊ ကံသစ်ရွာ ၊ ကမ္ဘာဖြူရွာ ၊ ကျောက်ခွက်ရွာအနီး စက်တပ်လေထီး ပျက်ကျခဲ့သော နေရာကို လာရောက်ရှာဖွေသည့် အကြမ်းဖက် စစ်တပ်နှင့် တော်လှန်ရေးတပ်ဖွဲ့များ မိနစ် ၂၀ ကြာ ထိတွေ့ တိုက်ပွဲဖြစ်ပွားခဲ့ကြောင်း သိရသည်။
တိုက်ပွဲအတွင်း အကြမ်းဖက် စစ်တပ်ဘက်မှ မျက်မြင် ၄ ဦး လှဲကျသွားပြီး ၁၀ ဦးကျော် ထိခိုက်ဒဏ်ရာရရှိကာ တပ်ပြန်ခေါက်သွားကြောင်း၊ တိုက်ပွဲဖြစ်ပွားရာနေရာကိုလည်း လက်နက်ကြီးများဖြင့် အချက်ရေပေါင်းများစွာ ရမ်းသမ်း ပစ်ခတ်ခဲ့ကြောင်း သိရှိရသည်။
ထို့ပြင် တိုက်ပွဲအတွင်း အထိနာခဲ့သော အကြမ်းဖက် စစ်တပ်သည် ဂျက်ဖိုက်တာဖြင့် ပေါက်မြို့နယ်နှင့် မြိုင်မြို့နယ် ထိစပ်နေသော ကျေးရွာများကို လေကြောင်းဖြင့် ၃ ကြိမ် ဗုံးကျဲ တိုက်ခိုက်ခဲ့ကြောင်း သိရသည်။
ယင်းစစ်ကြောင်းသည် ပေါက်မြိုနယ်၊ ရွှေဘုံသာပျူစောထီးရွာမှ ထွက်ခွာလာပြီး ချိုင့်ဇောက်၊ ထန်းပေါက်ကုန်း၊ ဖလံကိုင်း၊ သစ်ကြီးတော၊ ကျောက်တိုင်ခင်၊ ညောင်ဇင်ရွာများတို့ကိုလည်း ဝင်ရောက် မွှေနှောက်ကာ မီးရှို့ဖျက်စီးပြီး ပြည်သူများကို ဖမ်းဆီးသတ်ဖြတ်ခဲ့ကြောင်း၊ ထို့ပြင် စစ်ကြောင်းသည် ပြည်သူပိုင်ပစ္စည်းများကို ခိုးယူခြင်း၊ ပြည်သူပိုင် ကြက်၊ ဝက်၊နွားများကို မတရားသတ်ဖြတ်စားသုံးခြင်းတို့ လုပ်ဆောင်ခဲ့ပြီး ဖလံကိုင်းကျေးရွာတွင် အခြေပြု၍ လှုပ်ရှားနေခြင်းဖြစ်ကြောင်း သိရှိရသည်။
အလားတူ ထို စစ်တပ် စစ်ကြောင်းမှ တပ်မ ၉၉ လက်အောက်ခံ တပ်ရင်း ခလရ ၄၁၈ ၊ ခလရ ၄၁၉ တပ်ရင်းမှ အပတ်စဥ် ၁၂ တပ်သား သန့်ဇင် ၊ တပ်သား တင်ထွန်း ၊ အပတ်စဥ် ၁၁ မှ တပ်သား အောင်မိုးတို့ ၃ ဦးသည် MA 1 သေနတ် ၃ လက်၊ ကျည်ဘောက် ၃ ခု ၎င်းကျည် ၈၇ တောင့်တို့ဖြင့် ပေါက်ပကဖ နှင့် မြိုင် ပကဖ ထံသို့ ယနေ့ နံနက် ၈ နာရီ၅၅ မိနစ်ခန့်တွင် အလင်းဝင်ရောက်လာကြောင်း၊ ယင်း စစ်မှုထမ်း တပ်သားသစ်များသည် မန္တလေးနှင့် ရှမ်း ပြည်နယ် တို့တွင် ပေါ်တာဆွဲ ဖမ်းဆီး ခံရပြီး စစ်သင်တန်းကျောင်းသို့ ပို့ဆောင်ခံရသူများဖြစ်ကြောင်း သိရသည်။
နိုဝင်ဘာလ ၂၂ ရက်နေ့ နံနက် ၄ နာရီခန့်ကလည်း ဖလံကိုင်းကျေးရွာမှ ထွက်ခွာလာသော အကြမ်းဖက် စစ်တပ် စစ်ကြောင်းသည် ပေါက်မြို့နယ်၊ ကမ္ဘာဖြူကျေးရွာသို့ ဝင်ရောက်လာစဉ် တော်လှန်ရေး တပ်ဖွဲ့များနှင့် တိုက်ပွဲဖြစ်ပွားခဲ့သေးကြောင်း၊ တော်လှန်ရေးတပ်ဖွဲများက ၎င်းစစ်ကြောင်းကို လိုက်လံရှာဖွေ၍ အကြိမ်ပေါင်းများစွာ ထိတွေ့တိုက်ပွဲ ဖော်ဆောင်ခဲ့ရာ စစ်တပ်ဘက်မှ ထိခိုက်ဒဏ်ရာရရှိသူများပြားပြီး ထမ်းစင်များဖြင့် သွားလာနေသည်ကိုလည်း တွေ့မြင်ခဲ့ရကြောင်း မြိုင်ပကဖ က ပြောဆိုထားသည်။
အဆိုပါ တိုက်ခိုက်မှုကို MGY PDF ၊ မြိုင် ပကဖ ၊ ပေါက် ပကဖ၊YDF နှင့် မြိုနယ်များမှ LPDF များနှင့် မဟာမိတ်ပူးပေါင်းအဖွဲ့များက လုပ်ဆောင်ခဲ့ခြင်းဖြစ်ကြောင်း သိရသည်။
