မကွေးတိုင်း၊ ပေါက်မြို့နယ်နှင့် မြိုင်မြို့နယ် အတွင်း စစ်ကြောင်းထိုးနေသော အကြမ်းဖက် စစ်တပ်မှ စစ်မှုထမ်း တပ်သားသစ် ၄ ဦး အလင်းဝင်ရောက်လာကာ စစ်တပ်က ကျေးရွာများကို ဆက်တိုက် စီးနင်း မီးရှို့နေကြောင်း အညာမြေတပ်ပေါင်းစုမှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၃ ရက်နေ့တွင် ပေါက်မြို့နယ်နှင့် မြိုင်မြို့နယ် အတွင်း စစ်ကြောင်းထိုးနေသော အင်အား ၃၀၀ ခန့်ပါ စစ်တပ် စစ်ကြောင်းတွင် လိုက်ပါလာသော တပ်မ ၉၉ လက်အောက်ခံ ခလရ ၄၁၈ တပ်ရင်းမှ စစ်မှုထမ်း အပတ်စဉ် ၁၅ တပ်သားသစ် ပြည့်စုံဟိန်းသည် အညာမြေတပ်ပေါင်းစုထံ အလင်းဝင်ရောက်လာခဲ့ခြင်းဖြစ်ကြောင်း သိရသည်။
ထိုစစ်မှုထမ်း တပ်သားသစ်သည် MA-1 သေနတ် ၁ လက် ၊ 5.56 ကျည် ၄၂၀ တောင့်၊ ၄၀ မမ ဗုံး ၆ လုံး ၊ MA-1 ကျည်ဘောက် ၇ ခု၊ အီနာဂါဗုံး ၂ လုံး နှင့် လက်ပစ်ဗုံး ၂ လုံးတို့ ယူဆောင်လာကြောင်း၊ ထိုသို့ အလင်းဝင်ရောက်လာသော စစ်မှုထမ်း တပ်သားသစ်ကို စစ်ဆေးမေးမြန်းမှုများ လုပ်ဆောင်နေပြီး ကောင်းမွန်စွာ ထိန်းသိမ်းစောင့်ရှောက်ထားကြောင်း၊ စစ်မှုထမ်း တပ်သားသစ် ပြည့်စုံဟိန်း၏ ဝန်ခံထွက်ဆိုချက်များတွင် စစ်ရေးအရ အရေးပါသော အချက်အလက်များပါဝင်ကြောင်း သိရှိရသည်။
“အခုလို အလင်းဝင်လာဖို့ စစ်မှုထမ်းတွေ အကုန်လုံးနဲ့ စစ်သားတွေ အကုန်လုံးကို အလင်းဝင်ရောက်ကျဖို့ ကျနော်တို့ ဆက်လက် ဖိတ်ခေါ်နေပါတယ်။ အလင်းဝင်ရောက်ပြီးရင်လည်း လူ့အခွင့်အရေး စံနှုန်းတွေနဲ့ အညီ ကျနော်တို့ စောင့်ရှောက်ထားပါတယ်။ အခုအလင်းဝင်ရောက်လာတဲ့ စစ်မှုထမ်း တပ်သားကိုလည်း ဥပဒေနဲ့ အညီစောင့်ရှောက်ထားပါတယ်။ သူ့ရဲ့ လုံခြုံမှုကိုလည်း အပြည့်အဝ ကာကွယ်ပေးထားပါတယ်။ တခြား စစ်မှုထမ်း တပ်သားတွေနဲ့ စစ်သားတွေကို ပြောချင်တာက ရဲရဲကြီးသား အလင်းဝင်ခဲ့ပါ။ ကျနော်တို့ဘက်က လုံခြုံမှု အပြည့်ပေးပါတယ်” ဟု အညာမြေတပ်ပေါင်းစုမှ တာဝန်ရှိသူတစ်ဦးက ပြောဆိုသည်။
အလားတူ ပေါက်မြို့နယ်နှင့် မြိုင်မြို့နယ် အတွင်း စစ်ကြောင်းထိုးနေသော စစ်တပ်တွင် လိုက်ပါလာသော ခလရ ၄၁၈ ၊ ၄၁၉ တပ်ရင်းတို့မှ စစ်မှုထမ်း အပတ်စဉ် ၁၂ တပ်သားသစ်များဖြစ်သော သန့်ဇင် ၊ တင်ထွန်းနှင့် အပတ်စဉ် ၁၁ မှ အောင်မိုးတို့သည်လည်း လက်နက်ခဲယမ်းများ ယူဆောင်လာပြီး နိုဝင်ဘာလ ၂၃ ရက်နေ့က မြိုင် ပကဖ ထံ အလင်းဝင်ရောက်ခဲ့ကြောင်း သိရသည်။
အဆိုပါ အကြမ်းဖက် စစ်တပ် ကြောင်းသည် ပခုက္ကူမြို့နယ်နှင့် မြိုင်မြို့နယ်တို့တွင် ကျေးရွာများကို မီးရှို့ဖျက်ဆီးခြင်း၊ ပြည်သူများကို ဖမ်းဆီးသတ်ဖြတ်ခြင်းများ ကျူးလွန်ခဲ့ကြောင်း အညာမြေတပ်ပေါင်းစုမှ တာဝန်ရှိသူ တစ်ဦးက ဆက်လက်ပြောဆိုသည်။
ထို့ပြင် နိုဝင်ဘာလ ၂၃ ရက်နေ့ကလည်း အကြမ်းဖက် စစ်တပ် စစ်ကြောင်းသည် ပေါက်မြို့နယ်၊ ကမ္ဘားဖြူကျေးရွာမှ ထွက်ခွာလာပြီး မြိုင်မြို့နယ်နှင့် ပေါက်မြို့နယ်အစပ်ရှိ တဲကြီးရွာနှင့် နသတ်ရွာအနီးရှိ ပြည်သူပိုင် နေအိမ်များကိုလည်း မီးရှို့ဖျက်ဆီးခဲ့ကြောင်း၊ ထို စစ်တပ် စစ်ကြောင်းကြောင့် ကျေးရွာ ၅ ရွာကျော်မှ ပြည်သူများ ဘေးလွတ်ရာ ထွက်ပြေးတိမ်းရှောင်နေရကြောင်း အညာမြေတပ်ပေါင်းစုထံမှ သိရသည်။
