ထိုင်းနိုင်ငံ Rayong ရှိ ကားအပိုပစ္စည်းထုတ်လုပ်သည့် စက်ရုံတွင် တရားဝင် မြန်မာလုပ်သား ၂၇ ဦးကို လုပ်အားခ မပေးဘဲ အလုပ်မှ ထုတ်ပယ်မှုအတွက် အလုပ်ရှင်ကို အမှုဖွင့်တိုင်ကြားလိုက်ကြောင်း အဆိုပါ အလုပ်သမားများကို ကူညီပေးနေသည့် M.H.A.C မဟာမိတ်အဖွဲ့မှ အမှုနှင့် ပြန်ကြားရေးတာဝန်ခံ Zin က ရန်ကုန်ခေတ်သစ်သတင်းဌာနသို့ ပြောကြားသည်။
အဆိုပါ စက်ရုံက မြန်မာ လုပ်သား ၂၇ ဦးကို အလုပ်ခိုင်းစေပြီး လုပ်အားခ မပေးသည့်အပြင် လက်မှတ်ထိုးခိုင်း၍ အလုပ်မှ မတရားနားခိုင်းခဲ့ကြောင်း၊ ထိုသို့ မတရားခံရမှုအတွက် M.H.A.C မဟာမိတ်အဖွဲ့ကို အကူအညီတောင်းခံလာ၍ နိုဝင်ဘာလ ၁၈ ရက်နေ့တွင် နယ်မြေခံအလုပ်သမားကာကွယ်စောင့်ရှောက်ရေးရုံးတွင် တိုင်ချက်ဖွင့်ခဲ့ကြောင်း သိရှိရသည်။
“လောလောဆယ်တော့ အမှုဖွင့်ထားတယ် သူဌေးကိုလာရောက် ဖြေရှင်းပေးဖို့အတွက် တာဝန်ရှိသူတွေက ဆက်သွယ်ထားပါတယ် အခြေနေကတော့ စောင့်ကြည့်ရဦးမှာ ကျွန်တော်တို့MHACဘက်ကတော့ အလုပ်သမားတွေနဲ့အတူ အဆုံးထိဆက်လက်ရပ်တည်ပေးသွားမှာပါ” ဟု M.H.A.C မဟာမိတ်အဖွဲ့မှ အမှုနှင့် ပြန်ကြားရေးတာဝန်ခံ Zin က ရန်ကုန်ခေတ်သစ်သတင်းဌာနသို့ ပြောဆိုသည်။
ထိုင်းနိုင်ငံတွင်း အလုပ်သမားများ မတရားအလုပ်သမားအခွင့်အရေးချိုးဖောက်ခံရပါက ငြိမ်ခံမနေဘဲ သက်ဆိုင်ရာ ထိုင်းအစိုးရ ရုံးများသို့ တိုင်ကြားနိုင်သည့်အပြင် မြန်မာ့အလုပ်သမားရေးကူညီပေးနေသည့် အရပ်ဖက်အဖွဲ့အစည်းများထံ ဆက်သွယ်အကူအညီတောင်းခံရန်လည်း ထိုင်းရောက် ရွှေ့ပြောင်းအလုပ်သမားအရေးကူညီပေးနေသူများက တိုက်တွန်းထားသည်။
“သက်ဆိုင်ရာအစိုးရရုံးတွေမှာတိုင်ကြားတာမျိုး သို့မဟုတ် မြန်မာအလုပ်သမားရေးဆိုင်ရာ ကိုယ်ယုံကြည်တဲ့ အရပ်ဖက်အဖွဲ့စည်းတွေထံ ဆက်သွယ်အကူညီတောင်းခံတာမျိုးတွေလုပ်စေချင်ပါတယ်” ဟု M.H.A.C မဟာမိတ်အဖွဲ့မှ အမှုနှင့် ပြန်ကြားရေးတာဝန်ခံ Zin က ပြောကြားသည်။
