ဗိုလ်ချုပ်ဟောင်း ကံမြင့်သန်းနှင့် ဗိုလ်ချုပ် ခင်မောင်သန်းတို့၏ လူရင်း ပို့ကုန်လုပ်ငန်းရှင် စိန်ဝင်းက မြန်မာစစ်တပ်အတွက် လက်နက်အဝယ်တော်ဖြစ်လာပြီး မြန်မာစစ်တပ်က တရုတ် NORINCO ကုမ္ပဏီမှ စစ်လက်နက်ပစ္စည်းများ ဝယ်ယူရာတွင် ငွေကြေးပေးချေမှုအတွက် စိန်ဝင်းက အဓိက တာဝန်ယူပေးနေရကြောင်း စစ်ဘက်သတင်းရင်းမြစ်က ပြောဆိုသည်။
ရန်ကုန်အခြေစိုက် ပိုကုန်လုပ်ငန်းများ လုပ်ကိုင်နေသော စိန်ဝင်းက စစ်အာဏာသိမ်းပြီးနောက် ကာကွယ်ရေးပစ္စည်းထုတ်လုပ်ရေး အရာရှိချုပ် ဒုတိယဗိုလ်ချုပ်ကြီး ကံမြင့်သန်း (ယခု မအူပင်မြိုနယ် ကြံ့ဖွတ် ပြည်သူ့လွှတ်တော်အမတ်လောင်း) ၊ စစ်လက် နက်ပစ္စည်း ဝယ်ယူရေး ညွှန်ကြားရေးမှူးတပ်မှ ဗိုလ်ချုပ်ခင်မောင်သန်းတို၏ စေခိုင်းချက်အရ ပြည်ပသို မြန်မာစစ်တပ်အတွက် နိုင်ငံခြားငွေကြေး လွှဲပြောင်းပေးမှုများ ဆောင်ရွက်ပေးလာရကြောင်း၊ ယင်းနောက် တဖြည်း ဖြည်းဖြင့် စစ်ဗိုလ်ချုပ်များ၏ ယုံကြည်မှုကို ရရှိကာ ငွေပေးချေရေး အတွက် နည်းလမ်းမျိုးစုံဖြင့် ဆောင်ရွက်ပေးလာရကြောင်း သိရှိရသည်။
ယခုနောက်ဆုံးမြန်မာစစ်တပ်က တရုတ် NORINCO ကုမ္ပဏီမှ စစ်လက်နက် ပစ္စည်းများ ဝယ်ယူရန် ငွေပေးချေရာတွင် စိန်ဝင်းက ကြားခံ အဖြစ် ဆောင်ရွက်ပေးရပြီး ယင်းသို ငွေပေးချမှုများဆောင်ရွက်ပေးရင်း ငွေလဲနှုန်း အဟပေါ် မူတည်၍ ဒေါ်လာ သန်းချီ အမြတ်ရကြောင်း သိရှိရသည်။
“သူတိုရဲ့ မူလလက်ရင်းအလုပ်က ပဲလောက လာတယ်။ အဲဒီမှာ စစ်တပ်အတွက် လိုအပ်တဲ့ Export Earning တွေကို ရှာဖွေပေးရင်းနဲ့ တပ်ရဲ့ ဒေါ်လာအဝယ်တော်နဲ့ ငွေပေးချေရသူတွေ ဖြစ်လာတာ။ စိန်ဝင်း က ပဲလောကမှာ နာမည်တလုံးရှိတယ်။ အခုကတော့ စစ်တပ်အတွက် လက်နက် အဝယ်တော်ဖြစ်လာတယ်။ အထူးသဖြင့်တော့ တရုတ် NORINCO နဲ့ သူတို အဓိက အလုပ်လုပ်တယ်။ ကပစ မှ ဗိုလ်ချုပ်ကံမြင့်သန်းနဲ့ ကကဝယ် မှ ဗိုလ်ချုပ်ခင်မောင်သန်းတိုရဲ့ လူရင်းဖြစ်လာတာ” ဟု စစ်ဘက်သတင်းရင်းမြစ်က ပြောဆိုသည်။
စိန်ဝင်း(ခ) စိန်ဝင်းကလေးက နေပြည်တော်တွင်လည်း ပိတောက်အမည်ဖြင့် စားသောက်တစ်ဆိုင်ကို ဖွင့်လှစ်ထားကြောင်း၊ လက်ရှိ မြန်မာပြည်အတွက် တရုတ်နိုင်ငံ လက်နက်ထုတ်လုပ်ရေး ကုမ္ပဏီဖြစ်သော Norinco ပစ္စည်းများကို အဝယ်တော်အဖြစ် ငွေပေးချေရေးနှင့် တင်သွင်းခွင့်ရရှိကြောင်း၊ ၎င်း နှင့်အတူ မြန်မာစစ်တပ်အတွက် စစ်လက်နက်များ ဝယ်ယူရေးတွင် တွဲဖက်အလုပ်လုပ်နေသောသူမှာ နီပေါ နိုင်ငံသားတစ်ဦး၏ ချိတ်ဆက်ပေးမှုဖြင့် လုပ်ကိုင်လျက်ရှိကြောင်း သိရှိရသည်။
