စစ်တပ်ကို ထောက်ခံသော ရုပ်ရှင်အစည်းအရုံး ဥက္ကဋ္ဌ ကြည်စိုးထွန်းနှင့်ချမ်းသာကြည်စိုး၊ ဒိန်းဒေါင်၊ ဒါရိုက်တာမီးပွား၊ မင်္ဂလာရုပ်ရှင်ရုံပိုင်ရှင် ဇော်မင်းတို့ကို ပြန်ကြားရေး ညွှန်ချုပ် အေးကြွယ်နှင့်အတူ တရုတ်ရုပ်ရှင်ပွဲတော်သို့ စေလွှတ်

ရန်ကုန်၊ နိုဝင်ဘာ ၂၉

အကြမ်းဖက် စစ်တပ်ကို ထောက်ခံသော ရုပ်ရှင်အစည်းအရုံးဥက္ကဋ္ဌ ခေတ်ပျက် ကြည်စိုးထွန်းနှင့်ချမ်းသာကြည်စိုး၊ ဒိန်းဒေါင်၊ ဒါရိုက်တာမီးပွား၊ မင်္ဂလာရုပ်ရှင်ပိုင်ရှင် ဇော်မင်းတို့ကို ပြန်ကြားရေး ညွှန်ချုပ် အေးကြွယ်နှင့်အတူ တရုတ်ရုပ်ရှင်ပွဲတော်သို့ စေလွှတ်ကြောင်း ရန်ကုန်ခေတ်သစ်၏ သတင်းရင်းမြစ်တချို့ထံမှ သိရှိရသည်။

တရုတ်နိုင်ငံ၊ ယူနန်ပြည်နယ်တွင် နိုဝင်ဘာ ၂၇ ရက်နေ့မှ ဒီဇင်ဘာ ၁ ရက်နေ့အထိ လျန်ချန်း-မဲခေါင် အပြည်ပြည် ဆိုင်ရာရုပ်ရှင် ရက် သတ္တပတ်ပွဲတော်ပြုလုပ်လျက်ရှိပြီး ယင်းပွဲသို့ စစ်တပ်က ရုပ်ရှင်အစည်းအရုံး ဥက္ကဋ္ဌ ခေတ်ပျက် ကြည်စိုးထွန်း၊ ချမ်းသာကြည်စိုး၊ ဒါရိုက်တာ မီးပွား ၊ ဟာသရုပ်ဆောင် ဒိန်းဒေါင် ၊ မင်္ဂလာရုပ်ရှင်ရုံပိုင်ရှင် ဇော်မင်း တို့ကို စေလွှတ်ကြောင်း၊ ယင်းအပြင် ပြန်ကြားရေးဝန်ကြီးဌာနမှ ညွှန်ချုပ် အေးကြွယ်က ဦးဆောင်၍ ရုပ်ရှင်ပွဲတော်သို့ လာတက်ကြောင်း၊ ယင်းပွဲတော်တွင် စစ်တပ်က ဇတ်ကား ၂ ကား ပါဝင်ပြသပြီး ယင်းဇတ်ကားများမှာ “သဘင်သည် မြနှင်းဆီ” နှင့် “ချစ်သူသာ ပန်းတစ်ပွင့်ဖြစ်ခဲ့လျှင်” ဆိုသည့် ရုပ်ရှင်ကား ၂ ကားဖြစ်ကြောင်း သိရှိရသည်။

စစ်တပ်က နိုင်ငံခြားအခွင့်အလမ်း ဖြစ်သော တရုတ်ရုပ်ရှင်ပွဲတော်သို့ စေလွှတ်ရာတွင် ၎င်းတို့အတွက် ဝါဒဖြန့်ပေးပြီး စစ်တပ်ထောက်ခံ သော လှုပ်ရှားမှုနှင့် ရွေးကောက်ပွဲ မဲပေးရေး စည်းရုံးလှုပ်ရှားမှုများတွင် ပါဝင်သူများကိုသာ အဓိက ခေါ်ဆောင်ကြောင်း၊ စစ်တပ်က ခေါ်ဆောင်သွားသူများမှာ တရုတ်ရုပ်ရှင်ပွဲတော်တွင် ၎င်းတို့နှင့်ပတ်သက်သော အနုပညာချပြစရာမရှိဘဲ စစ်တပ်ထောက်ခံမှုအတွက် ဆုလာဘ်အဖြစ် တက်ခွင့်ပေးခြင်းဖြစ်ကြောင်း သိရှိရသည်။

“ဒါရိုက်တာ မီးပွားက အခုက မင်းအောင်လှိုင် သား အောင်ပြည့်စုံ ကုမ္ပဏီက လုပ်နေတဲံ show Like မှာလည်း ပင်တိုင် ရုပ်ရှင်ဒါရိုက်တာဖြစ်လာတယ်။ ဘာလို့လဲဆိုတော့ အတုအရောင် ရွေးကောက်ပွဲအတွက် ကမ်ပိန်းတွေကို သူက ပြန်ကြားရေးဝန်ကြီး မောင်မောင်အုန်းကို အဓိက အကြံပေးတဲ့အပြင် မြေပြင်မှာလည်း ပြန်ကြားရေးညွှန်ချုပ် အေးကြွယ် နဲ့အတူတူလုပ်ဆောင်ခဲ့လို့ အခုလိုမျိုး နိုင်ငံခြားသွားခွင့်ရ၊ မင်းအောင်လှိုင်သား ကုမ္ပဏီမှာ ပင်တိုင် ဒါရိုက်တာဖြစ်လာတာ” ဟု ရန်ကုန်ခေတ်သစ်၏ သတင်းရင်းမြစ်က ပြောဆိုသည်။

တရုတ်ရုပ်ရှင်ပွဲတော်တွင် ပြသနေသော မြန်မာဇတ်ကား ၂ ခုမှာလည်း ချစ်သူသာပန်းတစ်ပွင့်ဖြစ်ခဲ့လျှင် ရုပ်ရှင်ဇာတ်ကားဖြစ်ပြီး ဒါရိုက်တာ ကောင်းဇံ၊ ဝတ္တု ပုညခင်၊ မင်းသားစိုင်းစိုင်းခမ်းလှိုင်နှင့် မင်းသမီး ဝတ်မှုန်ရွှေရည်တို့က ပါဝင်သရုပ်ဆောင်ထား​ကြောင်း၊ “သဘင်သည် မြနှင်းဆီ”ရုပ်ရှင်မှာမူ ဒါရိုက်တာ မင်းဆက်သစ် ရိုက်ကူးပြီး သရုပ်ဆောင် မေမီကိုကိုက ပါဝင် သရုပ်ဆောင်ထားကြောင်း သိရှိရသည်။