အကြမ်းဖက်စစ်တပ်က KNU ကို နည်းမျိုးစုံဖြင့် ဖျက်ဆီးရန် ထောင်ချောက်ဆင် ကြံစည်ပြီး ငွေလိမ်ဂိုဏ်းနှင့် ငြိစွန်းသည်ဟု အသည်းအသန် သွပ်သွင်းနေမှုအပေါ် KNLA ဗဟိုဌာနချုပ်က သတိပေးချက်တစ်ရပ် ထုတ်ပြန်သည်။
ယမန်နေ့နိုဝင်ဘာလ ၂၉ ရက်နေ့ ညသန်းခေါင်အချိန် KNLA က စစ်တပ်က KNU အပေါ် အပြင်းအထန် တိုက်ခိုက်လာမှုနှင့်ပတ်သက်၍ သတိပေး ကြေညာချက် တစ်ရပ်ထုတ်ပြန်ခဲ့ပြီး အဆိုပါ ကြေညာချက်တွင် KNU ၏ နိုင်ငံရေးမူဝါဒမှာ ခိုင်မာပြီး တစ်နိုင်ငံလုံးလွှမ်းခြုံနေသည်ဟုဆိုလျှင် မှားမည်မဟုတ်ကြောင်း၊ KNU က အာဏာရှင်စနစ် ချုပ်ငြိမ်းရေးအတွက် တစိုက်မတ်မတ် တိုက်ပွဲဝင်လျက်ရှိသဖြင့် KNU ခေါင်း မထောင်နိုင်စေရန် နည်းလမ်းပေါင်းစုံဖြင့် တိုက်ခိုက်ချေမှုန်းလျက်ရှိကြောင်း၊ KNU ကို ခေတ်အဆက်ဆက် စစ်တပ်က ဖြိုခွဲရန် ကြိုးစားခဲ့ကြောင်း KNLA ဗဟိုဌာနချုပ်၏ ကြေညာချက်တွင် ဖော်ပြထားသည်။
KNU က ကမကထပြု ဦးဆောင်သော NDF တပ်ပေါင်းစုကို ၁၉၉၃ ခုနှစ် န၀တခေတ်တွင် ဖြိုခွဲဖျက်ဆီးပြီး KNU ၏ မဟာမိတ်များနှင့်အပစ်ရပ်ကာ KNU ကို အထီးကျန်အောင် လုပ်ဆောင်ခဲ့ကြောင်း၊ ထို့ပြင် KNLA ၏ အောက်ခြေပိုင်းတွင် သပ်လျှိုဖြိုခွဲပြီး မိခင် KNU ကို ၁၉၉၅ ခုနှစ်တွင် တော်လှန်ပုန်ကန်စေကာ ရှိသမျှ အင်အားဖြင့် စုပြုံတိုက်ခိုက်လျက်ရှိသဖြင့် KNU အထိနာခဲ့ရကြောင်း သိရှိရသည်။
အပစ်အခတ်ရပ်စဲရေးကာလတွင်လည်း KNU ကို နည်းလမ်းမျိုးစုံဖြင့် ဖျက်ဆီးရန် ထောင်ချောက်ဆင် ကြံစည်ခဲ့သော်လည်း မအောင်မြင်ခဲ့ကြောင်း၊ ယခုအခါတွင်လည်း KNU ကို ငွေလိမ်ဂိုဏ်းနှင့်ငြိစွန်းသည်ဟု အသည်းအသန် သွပ်သွင်းနေကြောင်း၊ နိုဝင်ဘာလ ၂၈ ရက်နေ့ အကြမ်းဖက်စစ်တပ်၏ ပြောရေးဆိုခွင့်ရှိသူ ဇော်မင်းထွန်းက KNU အား DKBA နှင့် ပေါင်းစည်းထားသည့်ပုံစံ ထင်ယောင်ထင်မှား အချက်အလက်များကို အခြေခံပြီး မှားယွင်းစွာ ဖော်ပြထားကြောင်း သိရှိရသည်။
DKBA/KKO ၏ ဥက္ကဋ္ဌ မန်းရောဘဇန်အမည်နာမကို ညွှန်းဆိုခြင်းသည် KNU ၏ တာဝန်ပေးချက်အရ ဖြစ်သည်ဟု ဇော်မင်းထွန်းက ဆိုပြီး အမှန်တကယ် KNU နှင့်ပတ်သက်ခြင်း လုံး၀ မရှိကြောင်း၊ ၁၉၉၇ ခုနှစ် KNU က စစ်တပ်၏ ထိုးစစ်ကြီးကို ရင်ဆိုင်နေရချိန် စစ်ရှောင်ပြည်သူများ အလုံးအရင်းထွက်ပြေးနေရချိန် အခြေအနေအား တည်ငြိမ်အောင် ကြိုးပမ်းနေရသည့်ကာလတွင် KNU နှင့်အပြိုင် မန်းရောဘဇန်က KKO ကို ဖွဲ့စည်းတည်ထောင်သဖြင့် ၎င်းကို KNU အဖွဲ့အစည်းမှ ထုတ်ပယ်ခဲ့ကြောင်း သိရှိရသည်။
DKBA/ KKO၏မိခင်အဖွဲ့အစည်းမှာ KNU ဖြစ်သည်ဟု ဇော်မင်းထွန်းက ညွှန်းဆိုထားသဖြင့် DKBA/KKO ၏ လုပ်ရပ်သည် KNU က တာဝန်ခံရမည်ဟု ပြောဆိုဟန်ရှိသည်ဟု ယူဆရကြောင်း၊ ယင်းမှာ ယုတ္တိမရှိကြောင်း၊ DKBAနေ့ သည် စစ်အာဏာရှင်၏ ထိုးခွဲမှုကြောင့် စစ်တပ်နှင့်ပူးပေါင်းကာ KNU ကို တရားဝင် တော်လှန်ပုန်ကန်သော နေ့ဖြစ်ကြောင်း၊ DKBA မှာ KNUနှင့်အတူ မရပ်တည်ဘဲ အခြေအနေအရ စစ်တပ်ဘက်သို့ ယိမ်းလျက်ရှိကြောင်း၊ စစ်အာဏာသိမ်းပြီးသည့်နောက်ပိုင်းတွင်လည်း KNU နှင့် မရပ်တည်ဘဲ NCA အပစ်ရပ်အခမ်း အနားသို့ တက်မြဲတက်နေကြောင်း၊ အနီးစပ်ဆုံး ၂၀၂၅ ခုနှစ် ဩဂုတ်လ ၂၆ ရက်နေ့ KNU က စစ်ကော်မရှင်၏ ရွေးကောက်အပေါ် ဆန့်ကျင်ရေး တိုက်တွန်းရာသော်လည်း DKBA က စစ်တပ်ရွေးကောက်ပွဲကို ကူညီသွားမည်ဟု ထုတ်ပြန်ထားကြောင်း သိရှိရသည်။
DKBA မှာ သူ့ရပ်တည်ချက်နှင့်သူသွားနေသော်လည်း ဇော်မင်းထွန်းက KNU မှာ DKBA နှင့်အတူ အွနလိုင်းငွေလိမ်လုပ်ငန်းတွင် ငြိစွန်းနေသည်ဟု ကြိုးပမ်းပုံဖော်နေကြောင်း၊ KNU ၏ နိုင်ငံရေးရပ်တည်ချက်မှာ စစ်တပ်၏ရွေးကောက်ပွဲ ကျင်းပနိုင်ရေး ထိခိုက်လာခြင်းနှင့် တစ်သက်လုံး ဗိုလ်ကျစိုးမိုးနိုင်ရေးအတွက် မကောင်းမှုမှန်သမျှကို ကျူးလွန်သော စစ်တပ်၏ လက်မဲကြီး ပေါ်သွားမည်ကို စိုးရိမ်လာခြင်းကြောင့် KNU ကို သွေးရူးသွေးတမ်းတိုက်ခိုက်နေခြင်းဖြစ်ကြောင်း၊ KNU အနေဖြင့် မူဝါဒအရ အွန်လိုင်းငွေလိမ်လုပ်ငန်းနှင့် စိတ်ကြွမူးယစ်ဆေးဝါး သည် ကရင်တစ်မျိုးသားလုံး၏ ရန်သူသာဖြစ်ကြောင်း KNLA ဗဟိုဌာနချုပ်က ထုတ်ပြန်ထားသည်။
