ကရင်ပြည်နယ်၊ မြ၀တီမြို့နယ်အတွင်း ဖြစ်ပွားသော တိုက်ပွဲများအတွင်း မြန်မာဘက်မှ ပစ်ခတ်သော လက်နက်ကြီးကျည် ၅ လုံးသည် ထိုင်းဘက်အခြမ်းသို့ ကျရောက်ပြီး ကလေးငယ် ၁ ဦး အပါအဝင် မြန်မာနိုင်ငံသား ၂ ဦးထိခိုက်ဒဏ်ရရှိကြောင်း ထိုင်းမြန်မာနယ်စပ်သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ နိုဝင်ဘာလ ၃၀ ရက်နေ့ နံနက် ၉ နာရီ ၁၂ မိနစ်အချိန် မြန်မာဘက်မှ ပစ်ခတ်လိုက်သော ၆၀ မမ လက်နက်ကြီးကျည် ၅ လုံးမှာ ထိုင်းနိုင်ငံ၊ တာ့ခ်ခရိုင်၊ မဲဆောက်မြို့နယ်အတွင်းရှိ နယ်စပ်အတွင်းသို့ ကျရောက်ခဲ့ကြောင်း၊ လတ်တလော နယ်စပ်မှ နေအိမ်များ ထိမှန်ပြီး မြန်မာ ကလေးငယ် ၁ ဦးနှင့် မြန်မာရွှေ့ပြောင်း လုပ်သား ၁ ဦး ထိခိုက်ဒဏ်ရာရရှိကြောင်း သိရှိရသည်။
“မြ၀တီဘက်မှာ တိုက်ပွဲပြင်းထန်နေတော့ လက်နက်ကြီးကျည်တွေက ဒီဘက်ကို ကျတာ။ မြန်မာကလေးငယ် ၁ ဦးနဲ့ လူကြီး ၁ ဦး ဒဏ်ရာရရှိထားတယ်” ဟု ထိုင်း-မြန်မာနယ်စပ် သတင်းရင်းမြစ်က ပြောဆိုသည်။
မြ၀တီမြို့နယ်၊ မင်းလက်ပံကျေးရွာအနီးတွင် စစ်တပ်နှင့် KNLA တပ်များအကြား တိုက်ပွဲများ ဆက်လက် ပြင်းထန်နေပြီး စစ်တပ်က မင်းလက်ပံကျေးရွာအနီးရှိ ကျားဖြန့် နေရာများကို တိုက်ခိုက်သိမ်းပိုက်နိုင်ရန် အပြင်းအထန် ထိုးစစ်ဆင်နေခြင်းဖြစ်ကြောင်း၊ အဆိုပါနေရာများရှိ ကျားဖြန့် အလုပ်ရုံနှင့် ဝင်းများကို KNU က သိမ်းပိုက်ပြီး စုံစမ်းစစ်ဆေးရေးများ လုပ်ဆောင်နေချိန် စစ်တပ်က ထိုးစစ်များ အရှိန်အဟုန်မြှင့်လာခြင်းဖြစ်ကြောင်း သိရှိရသည်။
