ရှမ်းပြည်နယ်၊ ရွာငံမြို့နယ်၊ မြင်းကျဒိုးရွာမှ ပျူစောထီးခေါင်းဆောင် ဝင်းမြင့် လိုက်ပါလာသော ကားကို ပစ်ခတ် တိုက်ခိုက်ရာ ၂ ဦး သေဆုံးပြီး သေနတ် ၁ လက် သိမ်းဆည်းရရှိခဲ့ကြောင်း DSNDA မှ သတင်းနှင့်ပြန်ကြားရေးတာဝန်ခံ ကိုကျားပျံ က ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၉ ရက်နေ့ နံနက် ၉ နာရိခန့်တွင် ရွာငံမြို့နယ်အတွင်း ပြည်သူများအပေါ် ရက်စက် ယုတ်မာမှု များစွာ ကျူးလွန်ခဲ့သော ပျူစောထီးခေါင်းဆောင် ဝင်းမြင့် နှင့် ၎င်း လက်အောက်ခံ ပျူစောထီး ၁ ဦး လိုက်ပါလာသော အိမ်စီးကားကို ပစ်ခတ်တိုက်ခိုက်ရာ ၂ ဦး လုံးပွဲချင်းပြီးသေဆုံးခဲ့ကြောင်း သိရသည်။
သေဆုံးသွားသော ပျူစောထီးခေါင်းဆောင် ဝင်းမြင့်ထံမှ ပစ္စတို သေနတ် ၁ လက် ၊ ၉ မမ ကျည် ၁၆ တောင့်နှင့် အခြားသော သက်သေခံ ပစ္စည်းများ သိမ်းဆည်းရရှိခဲ့ကြောင်း၊ ထိုသို့ ပစ်ခတ် တိုက်ခိုက်နိုင်ရန် ဝင်းမြင့်နှင့် အနီးကပ်နေထိုင်သူ တစ်ဦးက သတင်းပေးပို့ခြင်းကြောင့် စောင့်ကြို တိုက်ခိုက်ခဲ့ခြင်းဖြစ်ကြောင်း သိရှိရသည်။
ပျူစောထီး ခေါင်းဆောင် ဝင်းမြင့်သည် ၂၀၂၁ ခုနှစ် ၇ လပိုင်း၌ ပဲရင်းတောင်ရွာကို မီးရှို့ပြီး ပြည်သူ ၇ ဦးကို ရက်ရက်စက်စက်သတ်ဖြတ်ခဲ့ရာတွင် ပါဝင်ခဲ့ကြောင်း၊ ၂၀၂၂ ခုနှစ် ၆ လပိုင်း၌ လွှစင်ကျေးရွာမှ ပြည်သူပိုင် နေအိမ် ၄ လုံးကို မီးရှို့ဖျက်ဆီးရာတွင် ပါဝင်ခဲ့ကြောင်း၊ ၂၀၂၃ ခုနှစ် ၅ လပိုင်းမှ ၇ လပိုင်း အထိ မြက်ခါးအင်းရွာမှ ပြည်သူပိုင် နေအိမ် ၃၇ လုံး ၊ ကျောက်ပချုပ်ရွာမှ ပြည်သူပိုင် နေအိမ် ၅ လုံးနှင့် ၁၅ နှစ်အရွယ် မိန်းကလေး ၁ ဦးကို မုဒိမ်းကျင့်ခဲ့သော ပြစ်မှု အပါအဝင် မင်းပလောင်ကျေးရွာကို ရွာလုံးကျွတ်မီးရှို့ ဖျက်ဆီးမှုတို့တွင် တပ်မ ၅၅ လက်အောက်ခံ အကြမ်းဖက် စစ်သားများနှင့် ပူးပေါင်းပြီး ဦးဆောင် ပါဝင် လုပ်ကိုင်ခဲ့သူဖြစ်ကြောင်း သိရသည်။
ထို့ပြင် ဝင်းမြင့်သည် ရွာငံမြို့နယ်တွင် သစ်တောများကို စစ်တပ်နှင့် ပူးပေါင်းပြီး တရားမဝင် ထုတ်ယူနေခြင်း၊ အသားလိုင်စင်အကြောင်းပြကာ သာရေးနာရေးမကျန် ပွဲလမ်းသဘင်များ ပြုလုပ်ရာတွင် အခွန်ငွေများကို အဆမတန် အတင်းအဓမ္မ တောင်းယူခြင်း၊ ပြည်သူများကိုလည်း PDF နှင့် အဆက်အသွယ်ရှိသည်ဟုဆိုကာ ဖမ်းဆီးခြင်းများလုပ်ဆောင်နေသူဖြစ်ကြောင်း သိရှိရသည်။
“ဝင်းမြင့် အိမ်စီးကားနဲ့ လာမယ်ဆိုတာကို ကျနော်တို့ ကြိုပြီး သတင်းရလို့ စောင့်ဆိုင်း တိုက်ခိုက်ခဲ့တာပါ။ ဝင်းမြင့်နဲ့ သူ့နောက်လိုက် ၁ ကောင် သေဆုံးပါတယ်။ ဝင်းမြင့်ကိုင်ဆောင်တဲ့ သေနတ် ၁ လက်၊ ကျည်နဲ့ သက်သေခံ ပစ္စည်းတွေလည်း သိမ်းဆည်းရရှိခဲ့ပါတယ်။ ကျနော်တို့သာ ပြည့်စုံမှုရှိရင် ပိုပြီးတော့ ရှေ့ရောက်ပါတယ်” ဟု DSNDA မှ သတင်းနှင့်ပြန်ကြားရေးတာဝန်ခံ ကိုကျားပျံ က ပြောဆိုသည်။
ဆက်လက်၍ ဝင်းမြင့်လက်အောက်ခံ ပျူစောထီးများနှင့် စစ်တပ် ဒေါက်တိုင်များသည်လည်း ပြည်သူအပေါ် ယုတ်မာမှုများကျူးလွန်လာပါက ထပ်မံ တိုက်ခိုက်သွားမည်ဖြစ်ကြောင်း DSNDA မှ သတင်းနှင့်ပြန်ကြားရေးတာဝန်ခံ ကိုကျားပျံ က ဆက်လက်ပြောဆိုသည်။
