ရန်ကုန်၊ နိုဝင်ဘာ ၃၀
မန္တလေးတိုင်း၊ မြင်းခြံမြို့နယ်တွင် ပြည်သူ့စစ်ခေါင်းဆောင် သီတာယုမွန်အဖွဲ့မှ ပျူစောထီးများ လိုက်ပါလာသည့် ကားကို ကြားဖြတ်တိုက်ခိုက်ရာ ၅ ဦးပွဲချင်းပြီး သေဆုံးပြီး သေနတ် ၃ လက်နှင့် ခဲယမ်းများ သိမ်းဆည်းရရှိခဲ့ကြောင်း ပခုက္ကူမြို့နယ်ပြည်သူ့ကာကွယ်ရေးတပ်ဖွဲ့ (ပကဖ) မှ သတင်းနှင့် ပြန်ကြားရေးတာဝန်ခံ ရဲဘော်မှိုင်းက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၉ ရက်နေ့ နံနက် ၁၁ နာရီခန့်တွင် မြင်းခြံမြို့နယ် ပြည်သူ့စစ်ခေါင်းဆောင် သီတာယုမွန်မှ ပျူစောထီးများ လိုက်ပါလာသောကားကို Pakokku Special Task Force ပခုက္ကူမြို့နယ် တပ်ရင်း ၁ မှ ရဲဘော် ဒီး နှင့် ရဲဘော် ဓာတ်ဗူး ဦးဆောင်သည့် အဖွဲ့က ညောင်ဦး-မြင်းခြံလမ်းပိုင်း တနေရာအရောက်တွင် ကြားဖြတ်တိုက်ခိုက်ခဲ့ကြောင်း သိရှိရသည်။
ထိုတိုက်ခိုက်မှုအတွင်း ပျူစောထီး ၅ ဦး ပွဲချင်းပြီး သေဆုံးကာ G4 သေနတ် ၁ လက် ၊ ကာဘိုင် ၂ လက်နှင့် ကျည်အများအပြား သိမ်းဆည်းရရှိခဲ့ကြောင်း၊ တိုက်ခိုက်မှု ပြုလုပ်ပြီးနောက် တော်လှန်ရေး တပ်ဖွဲ့များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရသည်။
“ပါလာတဲ့ ၅ ယောက်လုံး အကုန်သေတာ။ စစ်ခွေး ၅ ဦးက နေရာတင် ပွဲချင်းပြီး သေဆုံးပါတယ်။ စစ်ကော်မရှင်အနေနဲ့ ပြည်သူတွေမကြည်ဖြူဘူးဆိုရင် ဘယ်နေရာမှာပဲနေနေ လုံခြုံမှုမရှိဘူးဆိုတာ ကို အသိပေးချင်ပါတယ် ” ဟု ပခုက္ကူမြို့နယ် ပြည်သူ့ကာကွယ်ရေးတပ်ဖွဲ့ (ပကဖ) မှ သတင်းနှင့်ပြန်ကြားရေး တာဝန်ခံ ရဲဘော်မှိုင်းက ရန်ကုန်ခေတ်သစ် သတင်းဌာနထံသို့ ပြောဆိုသည်။
