ရန်ကုန်၊ ဒီဇင်ဘာ ၂
၁၀၂၇ စစ်ဆင်ရေးအတွင်း သိမ်းပိုက်ထားသော မိုးကုတ်-မိုးမိတ်ကို စစ်တပ်ထံ ပြန်ပေးလိုက်ရမှုကြောင့် နစ်နာသူများကို တောင်းပန်သော်လည်း ဆဲလိုသူများကို နားနားပြီးဆဲကြရန် နှင့် မိုးကုတ်ကို ပြန်လည်သိမ်းယူမှု မြင်တွေ့လိုကြောင်း တအာင်း TNLA မှ ဗိုလ်ချုပ်တာဘုန်းကျော်က လူမှုကွန်ရက်မှတစ်ဆင့် ထုတ်ဖော်ပြောဆိုသည်။
အောက်တိုဘာလ ၂၉ ရက်နေ့ တရုတ်၏ကြားဝင်စေ့စပ်မှုဖြင့် TNLA နှင့် စစ်တပ်တို့အကြား အပစ်အခတ်ရပ်စဲခဲ့ပြီး မိုးကုတ်နှင့်မိုးမိတ်မြို့တို့ကို စစ်တပ်ထံသို့ ပြန်လည်လွှဲပြောင်းပေးရန် သဘောတူညီခဲ့ကြောင်း၊ ယင်းနောက် နိုဝင်ဘာလ ၂၉ ရက်နေ့တွင် မိုးကုတ်မြို့အတွင်းသို့ အကြမ်းဖက်စစ်တပ်က ဝင်ရောက်လာခဲ့ကြောင်း ၊ မိုးကုတ်နှင့်မိုးမိတ်မြို့တို့ကို ပြန်လည်ပေးအပ်လိုက်ရမှုအတွက် နစ်နာသူများကို တောင်းပန်ကြောင်း၊ သို့ရာတွင် မိုးကုတ်မြို့မှာ တအာင်းပြည်နယ်အတွင်း ပြန်ပါရေး ကြိုးပမ်းမည်ဖြစ်ပြီး မိုးကုတ်မြို့မှာ နှစ်ပေါင်း ထောင်ချီကတည်းက တအာင်းလူမျိုးတို့ တည်လာသည့် မြို့ဖြစ်ကြောင်း ၎င်းက ဆိုသည်။
“ပထမဆုံး တကယ် ပေးဆပ်နစ်နာသူတွေကို တောင်းပန်ချင်ပါတယ်။ ရင်ထဲလှိုက်လှိုက်လှဲလှဲ နာကြင်ရတာမို့ အနူးအညွတ်တောင်းပန်ပါတယ်။ တအာင်းနိုင်ငံရေးရဲ့ ပန်းတိုင်တခုဟာ မိုးကုတ်မြို့ကို တအာင်းပြည်နယ်ထဲ ပြန်ပါအောင် ကြိုးပမ်းရေးဖြစ်တယ်။ ရှေးယခင် နှစ်ပေါင်းထောင်ချီကတည်းက တအာင်းလူမျိုးတို့တည်လာတဲ့ မိုးကုတ်(မိုဂူ;-လင်းလင်တဲ့ကျောက်) ဟာ တအာင်းလူမျိုး လက်ထဲ ပြန်ရောက်ရမယ်လို့ ရည်မှန်းထားပါတယ်။ အခုတော့ လက်ထဲရောက်တဲ့ကိတ်မုန့်ကို မစားရပဲ ပုတ်ချခံလိုက်ရသလိုမျိုး အသည်းကွဲရပါတယ်။ ကံမကုန်သေးရင်တော့ ကြိုးစားသူအတွက် ရလာဒ်ရှိစမြဲလို့ ယုံကြည်ပါတယ်။” ဟု TNLA မှ ဗိုလ်ချုပ်တာဘုန်းကျော်က ဆိုသည်။
မိုးကုတ်နှင့်မိုးမိတ်မြို့တို့ကို စစ်တပ်ထံသို့ ပြန်လည်ပေးအပ်သည့်အတွက် သစ္စာဖောက်ဟု ပြောနေသူများကို သေချာပြန်လည်သုံးသပ်စေချင်ကြောင်း၊ နွေဦးတော်လှန်ရေးတွင် ၁၀ နှစ်ကျော် တည်ဆောက်ခဲ့သည့် အရင်းအမြစ်များနှင့် အကောင်းဆုံးပံ့ပိုးပေးခဲ့ကြောင်း၊ လက်သုံးချောင်းထောင်သူများကို လစဉ် ဆန်ထောင်ကြီးပိုင်း ကျွေးမွေး မြှင့်တင်ပေးခဲ့ကြောင်း၊ ၃ နှစ်နှင့် ၄ နှစ်တာကာလအတွင်း အင်အား ထောင်ချီ ပေးဆပ် အရင်းပြုပေးခဲ့ကြောင်း၊ လက်နက်အကြွေး ဒေါ်လာ ဘီလီယံချီ အကြွေးတင်ခဲ့ကြောင်း၊ အာဏာရှင်နံရံကို ခေါင်းဖြင့် ဝင်တိုက်၍ ဦးခေါင်းတွင် သေမလောက် သွေးချင်းနီရဲနေကြောင်း၊ ဗမာများက D-Day ခေါ်သဖြင့် မီရာ အရှိန်ဖြင့် လိုက်ဖို့ ကြိုးပမ်းခဲ့ရကြောင်း ၎င်းက ဆိုသည်။
“တကယ့် တကယ် ၁၀၂၇ လုပ်တော့ ဘယ်ဒီဒေးကမှ လက်တွေ့ပါမလာဘဲ နောက်ဆုံး ကိုယ်ပဲအထီးကျန် ရွာက အိမ်သူလိုည်းတွေပါ လေယာဉ်ဗုံးဒဏ်သင့်ကြရတယ်။ ရင်ဘတ်တွေတဖြန်းဖြန်းကွဲ အသဲနှလုံးတွေ နာကြင်ရပါတယ်။ ကျည်မရှိ၊ ဘတ်ဂျတ်မရှိ သေစရာ လူသူလည်းနည်းလာတော့ မိုးကုတ်-မိုးမိတ်နဲ့ညှိပြီး အပစ်ရပ်ရတယ်။ ပွဲကမပြီးသေးပါဘူး။ ဒါပေမဲ့ အဆဲတွေက စုံလွန်းလှပါတယ်။ အိုကွယ် …မင်းတို့ ကိုကျွေးခဲ့လို့ လူဖြစ်လာတဲ့သူတွေ မိုးကုတ်ကို ပြန်သိမ်းတာ မြင်ချင်စမ်းပါတယ်။တို့ကို ဆဲလို့ မောရင်ဖြစ် နားနားပြီးဆဲ ပြီး တော့ စစ်အာဏာ,ရှင်ကိုလည်း နားနားပြီးတိုက်ပါလေ” ဟု ၎င်းက လူမှုကွန်ရက်တွင် ဆက်လက်ရေးသားထားသည်။။
တော်လှန်သူများအတွက် TNLA က အမြဲတမ်း တံခါးဖွင့်ထားမည်ဖြစ်ပြီး လိုအပ်ရင် လာရောက် နားခိုနိုင်ကြောင်း TNLA မှ ဗိုလ်ချုပ် တာဘုန်းကျော်က ရေးသားထားသည်။
“၁၀၂၇ စစ်ဆင်ရေး” အတွင်း TNLA က မိုးကုတ်၊ သီပေါ၊ ကျောက်မဲ၊ နောင်ချို၊ မိုင်းလုံ၊ မိုင်းငေါ့၊ မိုးမိတ်၊ နမ့်ဆန်၊ မန်တုံ၊ ကွတ်ခိုင်၊ နမ့်ခမ်း၊ နမ္မတူမြို့များကို သိမ်းပိုက်ရရှိခဲ့ပြီး စစ်တပ်က ကျောက်မဲ၊ နောင်ချို၊ သီပေါကို ပြန်လည် တိုက်ခိုက်သိမ်းပိုက်ခဲ့သည်။
ထို့ပြင် TNLA က မိုးကုတ်နှင့် မိုးမိတ်မြို့များကို စွန့်လွှတ်လိုက် ကြောင့် မိုင်းလုံ၊ မိုင်းငေါ့၊ နမ့်ဆန်၊ မန်တုံ၊ ကွတ်ခိုင်၊ နမ့်ခမ်းနှင့် နမ္မတူမြို့များသာ TNLA လက်ထဲတွင် ကျန်ရှိတော့မည်ဖြစ်သည်။
