မကွေးတိုင်း၊ တောင်တွင်းကြီးမြို့နယ်၊ ညာတောကျေးရွာအုပ်စုတွင် ပြည်သူများကို နည်းမျိုးစုံနှိပ်စက်နေသော အုပ်ချုပ်ရေးမှူးဟောင်း ကြည်ဝင်း အပါအဝင် ၃ ဦးကို ပစ်ခတ်တိုက်ခိုက်ရာ ၃ ဦးလုံးသေဆုံးခဲ့ကြောင်း မကွေးတောင်တွင်းကြီး အထူးပြောက်ကျားတပ်ဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
နိုဝင်ဘာလ ၂၆ ရက်နေ့ ညပိုင်းတွင် တောင်တွင်းကြီးမြို့နယ်၊ ပရပ်ကြယ်တိုက်နယ်၊ ညာတောကျေးရွာအုပ်စု၊ သစ်ခုတ်ကွင်းကျေးရွာတွင် စစ်တပ် သတင်းပေးအဖြစ် လုပ်ကိုင်နေသော အုပ်ချုပ်ရေးမှူးဟောင်း ကြည်ဝင်း ဆိုသူသည် ကျေးရွာနေ ပြည်သူများကို စစ်တပ်ခေါ်လိုက်ရမလားဟု ခြိမ်းခြောက်ပြောဆိုပြီး အနိုင်ကျင့်နှိပ်စက်နေ၍ ၎င်းနေအိမ်အတွင်း တော်လှန်ရေးတပ်ဖွဲ့များက ဝင်ရောက် ပစ်ခတ် တိုက်ခိုက်ရာပွဲချင်းပြီး သေဆုံးခဲ့ကြောင်း သိရသည်။
အလားတူ သစ်ခုတ်ကွင်းကျေးရွာတွင် စစ်တပ် သတင်းပေးအဖြစ် လုပ်ကိုင်နေသော မင်းဇော်ဦး နှင့် ဇနီးဖြစ်သူ ခင်ကြိုင် တို့သည်လည်း တော်လှန်ရေးရဲဘော် ၁ ဦးကို စစ်တပ်ထံ သတင်းပေး ဖမ်းဆီးစေခိုင်းခြင်း၊ တော်လှန်ရေးရဲဘော်များကို စစ်တပ်ထံ သတင်းပေးတိုင်ကြားခြင်းများကြောင့် ယင်းနေ့တွင် ၎င်းတို့ နေအိမ်အတွင်း ထပ်မံ ဝင်ရောက် တိုက်ခိုက်ခဲ့ရာ ၂ ဦးလုံးပွဲချင်းပြီးသေဆုံးခဲ့ကြောင်း သိရှိရသည်။
ထိုသို့ ပစ်ခတ် တိုက်ခိုက်မှု လုပ်ဆောင်ခဲ့သော အုပ်ချုပ်ရေးမှူးဟောင်း ကြည်ဝင်း အပါအဝင် ၃ ဦးကို တော်လှန်ရေး တပ်ဖွဲ့များက အကြိမ်ကြိမ် သွားရောက်တွေ့ဆုံ၍ စစ်တပ်နှင့် ပူးပေါင်းခြင်း မပြုလုပ်ရန် သတိပေး ပြောကြားခဲ့သော်လည်း လိုက်နာခြင်းမရှိဘဲ ဆက်လက်လုပ်ကိုင်နေသည်အတွက် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
“သူတို့ ၃ ဦးလုံးကို စစ်တပ် သတင်းတွေပေးတွေ မလုပ်ဖို့ အကြိမ်ကြိမ် သွားရောက် သတိပေးထားတယ်။ အဲတာကို လိုက်နာမှုမရှိဘဲ ဆက်လက် လုပ်ဆောင်နေလို့ သွားရောက် တိုက်ခိုက်ခဲ့တာပါ” ဟု မကွေးတောင်တွင်းကြီး အထူးပြောက်ကျားတပ်ဖွဲ့မှ တာဝန်ရှိသူက ပြောဆိုသည်။
အဆိုပါ တိုက်ခိုက်မှုကို မကွေးတောင်တွင်းကြီး အထူးပျောက်ကျားတပ်ဖွဲ့ နှင့် နဂါးမင်းပြည်သူ့ကာကွယ်ရေးတပ်ဖွဲ့တို့က ပူးပေါင်း လုပ်ဆောင်ခဲ့ခြင်းဖြစ်ကြောင်း၊ ဆက်လက်၍ တောင်တွင်းကြီးမြို့နယ်အတွင်း စစ်တပ်သတင်းပေး ဒလန်များ၊ ပျူစောထီးများ အနေဖြင့် စစ်တပ်ထံသို့ သတင်းပေးတိုင်ကြားခြင်း ၊ စစ်တပ်အားကိုး၍ ပြည်သူများ အပေါ် ငွေကြေးများ အတင်းအဓမ္မကောက်ခံခြင်းနှင့် စစ်တပ်မှပြုလုပ်သော အတုအယောင်ရွေးကောက်ပွဲတွင် ပါဝင်ပတ်သတ်မည်ဆိုပါက အချိန်မရွေး တိုက်ခိုက်သွားမည်ဖြစ်ကြောင်း မကွေးတောင်တွင်းကြီး အထူးပြောက်ကျားတပ်ဖွဲ့မှ တာဝန်ရှိသူက ဆက်လက်ပြောဆိုသည်။
