ရန်ကုန်၊ ဒီဇင်ဘာ ၂၁
မြန်မာနိုင်ငံတွင် ဒီမိုကရေစီစနစ်ကို အုတ်မြစ်ချပေးပြီး ခိုင်မာအောင် စစ်တပ်က တည့်မတ်ပေးနေ၍ စစ်တပ်နှင့်လက်တွဲနိုင်သူများကိုသာ ဆန္ဒမဲပေး ရွေးချယ်ရန်လိုအပ်ကြောင်း အကြမ်းဖက် မင်းအောင်လှိုင်က ပြောဆိုသည်။
ယမန်နေ့ မကွေးတပ်နယ်တွင် အကြမ်းဖက်စစ်တပ်မှ အရာရှိနှင့် စစ်သည်များနှင့်တွေ့ဆုံစဉ် အကြမ်းဖက် မင်းအောင်လှိုင်က ထိုသို့ ပြောဆိုလာခြင်းဖြစ်သည်။
စစ်တပ်က ၂၀၂၀ ရွေးကောက်ပွဲတွင် မဲမသမာမှုများရှိ၍ ဖွဲ့စည်းပုံအခြေခံဥပဒေ နှင့်အညီ တာဝန်များ ယူခဲ့ကြောင်း၊ ဒီမိုကရေစီလမ်းကြောင်းပေါ်တွင် ခိုင်ခိုင်မာမာဖြင့် ဆက်လက်လျှောက်လှမ်းနိုင်ရေးထိန်းသိမ်းဆောင်ရွက်ခဲ့ကြောင်း၊ မကြာမီရက်ပိုင်းအတွင်း ရွေး ကောက်ပွဲကျင်းပပြုလုပ်သွားမည်ဖြစ်ပြီး ရွေးကောက်ပွဲပြီးစီးချိန်တွင် အနိုင်ရသည့်ပါတီအား နိုင်ငံတော်တာဝန်များကို လွှဲပြောင်းပေးအပ်သွားမည်ဖြစ်ကြောင်း အကြမ်းဖက် မင်းအောင်လှိုင်က ဆိုသည်။
လာမည့် ရွေးကောက်ပွဲတွင် ဆန္ဒမဲများ ပေးရာတွင်လည်း တိုင်းပြည်နှင့်ဒေသကောင်းကျိုးကို အမှန်တကယ်ဆောင်ရွက်နိုင်သူ၊ နိုင်ငံရေးအမြင်၊ အုပ်ချုပ်ရေးအမြင်၊ စီးပွားရေးအမြင်၊ လုံခြုံရေးနှင့် တရားဥပဒေစိုးမိုးရေးအမြင်ရှိသူ၊ လွတ်လပ်ရေးရရှိပြီးကတည်းက ယနေ့ထက်တိုင် ခိုင်မာစွာတည်ရှိနေသည့် စစ်တပ်နှင့် စိတ်တူကိုယ်တူ လက်တွဲဆောင်ရွက်နိုင်သည့်သူ၊ ဒို့တာဝန်အရေးသုံးပါးကို လိုက်နာစောင့်ထိန်းနိုင်သည့်သူ၊ ဥပဒေနှင့်ပတ် သက်၍ အသိပညာရှိသူများကို ရွေးချယ်၍ဆန္ဒမဲများ ပေးနိုင်ရန်လိုကြောင်း မင်းအောင်လှိုင်က စစ်တပ်ကို အမိန့်ပေးသည်။
စစ်တပ်က နိုင်ငံတော်နှင့် အမျိုးသားရေးကို သစ္စာရှိစွာဖြင့် ခေတ်အဆက်ဆက်ဆောင်ရွက်နေသည့် အဖွဲအစည်းတစ်ရပ်ဖြစ်ကြောင်း၊ စစ်တပ်က ဒီမိုကရေစီလမ်းကြောင်းပေါ်တွင် လျှောက်လှမ်းနိုင်ရေး အုတ်မြစ်ချဆောင်ရွက်ပေးခဲ့ကြောင်း၊ ဒီမိုကရေစီစနစ်ကို စနစ် တကျ ဖြစ်ပေါ်လာအောင် ဦးဆောင်၍ ဖော်ဆောင်ပေးခဲ့သည့် အဖွဲ့အစည်းဖြစ်သကဲ့သို့ မြန်မာ့ဒီမိုကရေစီစနစ်ခိုင်မာအောင် တည့်မတ်ဆောင်ရွက်ပေးနေသည့် အဖွဲ့အစည်းတစ်ခုပင်ဖြစ်ကြောင်း၊ မင်းအောင်လှိုင်က ဆက်လက်ပြောဆိုသည်။
လက်ရှိဖြစ်ပေါ်ကြုံတွေ့ခဲ့ရသည့် နိုင်ငံရေးပဋိပက္ခများနှင့် လက်နက်ကိုင်အကြမ်းဖက်မှုများအကြားမှ နိုင်ငံတော်တည်ငြိမ်အေး ချမ်းရေးအတွက်ကိုလည်း စစ်တပ်ကသာ ဦး ဆောင်၍ ဆောင်ရွက်ရခြင်းဖြစ်ကြောင်း၊ ထို့ကြောင့် ရွေးကောက်ပွဲကျင်းပပြုလုပ်ချိန်တွင် စစ်တပ်နှင့် လက်တွဲဆောင်ရွက်နိုင်သူ၊ ဒို့တာဝန်အရေးသုံး ပါးကိုလိုက်နာစောင့်ထိန်းနိုင်သူ၊ နိုင်ငံရေး၊ စီးပွားရေးနှင့် ကာကွယ်ရေးအမြင်ရှိသူများကို ရွေးခြယ်၍ ဆန္ဒမဲပေးကြရန်လိုကြောင်း မင်းအောင်လှိုင်က ပြောဆိုသည်။
အလားတူ အကြမ်းဖက် ဒုစစ်ခေါင်းဆောင် စိုးဝင်းကလည်း ယခုရက်ပိုင်း ကချင်ပြည်နယ်အတွင်း စစ်တပ်နှင့်လက်တွဲနိုင်သူများကိုသာလျှင် ဆန္ဒမဲပေးရွေးချယ်ရမည်ဟု တပ်နယ်တွေ့ဆုံပွဲနှင့်ဌာနဆိုင်ရာတွေ့ဆုံပွဲများတွင် ပြောဆိုခဲ့သည်။
