ကရင်နီပြည်တွင် စစ်တပ်၏ အတုအယောင်ရွေးကောက်ပွဲ ဝင်ရောက်ယှဉ်ပြိုင်မည့် ကိုယ် စားလှယ် လောင်းများကို အမျိုးသားသစ္စာဖောက်အဖြစ် အပြစ်ပေးအရေးယူမည်ဖြစ်ကြောင်း ကရင်နီပြည် လူငယ် အင်အားစု ကိုယ်စားလှယ် ခွန်သောမတ်စ်က ရန်ကုန်ခေတ်သစ်သတင်းဌာနထံသို့ ပြောကြားသည်။
ဒီဇင်ဘာလ ၁၈ ရက်နေ့မှ ဒီဇင်ဘာလ ၂၀ ရက်နေ့အထိ ကရင်နီပြည်လူငယ်ထု တွေ့ဆုံ နှီးနှောဖလှယ်ပွဲကို ကရင်နီပြည်၊ မြေပြင်တစ်နေရာတွင် ကျင်းပပြုလုပ်ခဲ့ပြီး အဆိုပါ ဆွေးနွေးပွဲက ယင်းကဲ့သို့ လွှတ်တော်အမတ်လောင်းများကို အမျိုးသားသစ္စာဖောက်များအဖြစ် သတ်မှတ်အရေးယူရန် ဆုံးဖြတ်ခဲ့ခြင်းဖြစ်သည်ဟု သိရှိရသည်။
စစ်တပ်၏ အတုအယောင်ရွေးကောက်ပွဲ ဝင်ရောက်ယှဉ်ပြိုင်မည့် ကိုယ်စားလှယ်လောင်းများကို ကရင်နီအမျိုးသား သစ္စာဖောက်အဖြစ် သတ်မှတ်လိုက်ပြီး ဥပဒေ အကြောင်းအရ အပြစ်ပေး အရေးယူမည်ဖြစ်ကြောင်း၊ ကရင်နီပြည်တွင်းရှိ လွှတ်တော်အမတ်လောင်း များကို ကရင်နီအမျိုးသားသစ္စာဖောက် အဖြစ် ကရင်နီပြည်လူငယ်ထုများက သတ်မှတ်ကြောင်း၊ စစ်ကော်မရှင်က ပြု လုပ်သော အတုအယောင် ရွေးကောက်ပွဲကို ကရင်နီပြည်လူငယ်ထုများအနေဖြင့် လုံးဝကန့်ကွက်ရှုံ့ချပြီး ပြည်သူများအနေဖြင့် စစ်တပ်၏ ရွေးကောက်ပွဲကို ပူးပေါင်းဆောင်ရွက်ခြင်းမပြုလုပ်ရန် ၎င်းက တိုက်တွန်းသည်။
“ကျနော်တို့ဘာလို့ အဲလိုသတ်မှတ်လိုက်လည်းဆိုတော့ ကရင်နီပြည်သူလူထုတင်မကဘူး ပြည်သူ လူထုတစ်ရပ်လုံးက ဒီစစ်ကော်မရှင်ကို ဘုံရန်သူလို့ သတ်မှတ်တဲ့အချိန်မျိုးမှာ စစ်ကော်မရှင်ရဲ့ အ ကျိုး စီးပွားကို ကာကွယ်ပေးနေတဲ့၊ စစ်ကော်မရှင်ရဲ့ ထောက်တိုင်အဖြစ် ပူးပေါင်းပါဝင်ပေးနေတဲ့ လူ မှန်သမျှဟာ ကျနော်တို့ရဲ့ ဘုံရန်သူပေါ့၊ အဆိုးဆုံး စစ်ကော်မ ရှင်ရဲ့ ရွေးကောက်ပွဲဝင်မယ့် ကရင်နီ ပြည်သားတွေတွေ့ရတယ်၊ အဲလိုလူအားလုံးက ကရင်နီ ပြည်လူထုကို လစ်လျူရှုပြီးတော့ စစ်ကော်မ ရှင်ထောက်တိုင်ကို အားဖြည့်ပေးနေသူအားလုံးသည် ကျနော်တို့ အမျိုးသားတစ်ခုလုံးရဲ့ ဘုံရန်သူ၊ သစ္စာဖောက်လို့ ခေါ်တာဖြစ်ပါတယ်။ သတ်မှတ်တာဖြစ်ပါတယ်၊ အဲဒီအမတ်လောင်းတွေကို ကျနော် တို့အနေနဲ့ အခုကတည်းက လူထုရှေ့မှာ တရားစီရင်နိုင်တဲ့ ကိစ္စတွေ၊ ဥပဒေနဲ့အညီ အပြစ်ပေး အရေး ယူနိုင်မယ့် ကိစ္စတွေ ကျနော်တို့ လုပ်ဆောင်သွားဖို့ရှိပါတယ်။ ဒီလိုအမျိုးသားသစ္စာဖောက်လို့ ကြေ ညာပြီးတာနဲ့ သူတို့ကို ဥပဒေလမ်းကြောင်းအရလည်း တရားစွဲဆိုဖို့ ကိစ္စတွေကို ဆက်လုပ်သွားဖို့ အစီ အစဉ်တွေရှိပါတယ်” ဟု ကရင်နီပြည် လူငယ် အင်အားစု ကိုယ်စားလှယ် ခွန်သောမတ်စ်က ရန်ကုန် ခေတ်သစ်သတင်းဌာနထံသို့ ပြောကြားသည်။
ယင်းအပြင်ကရင်နီပြည်လူငယ်ထုတွေ့ဆုံနှီးနှောဖလှယ်ပွဲက နိုင်ငံရေး တောင်းဆိုချက် ၅ ချက်ကိုလည်း တောင်းဆို ထုတ်ပြန်ခဲ့ကြောင်း သိရှိရသည်။
ကရင်နီပြည်တွင် ပြည်နယ်တပ်မတော် တစ်ခုတည်းဖြစ်ရေးကို ကရင်နီပြည်လူငယ်ထုအားလုံးက သ ဘောတူလက်ခံပြီး သက် ဆိုင်ရာ တော်လှန်ရေး လက်နက်ကိုင်အဖွဲ့အစည်းအားလုံးတို့မှ ပြည်နယ် တပ် တစ်ခုတည်းဖြစ်ရေးကို အမြန်ဆုံးအကောင် အထည် ဖော်ဆောင်ပေးရန် ကရင်နီပြည်လူငယ်ထုတွေ့ဆုံနှီးနှောဖလှယ်ပွဲက တောင်းဆို ထားသည်။
အလားတူ ကရင်နီပြည် အစိုးရတစ်ရပ်တည်းဖြစ်ရေးကို ကရင်နီပြည်လူငယ်ထုအားလုံးက သဘောတူ လက်ခံကြောင်း၊ သက် ဆိုင် ရာ ပြည်နယ်အတွင်းရှိအစုအဖွဲ့များအားလုံးတို့က ပြည်နယ်အစိုးရတစ်ရပ် ဖြစ်ပေါ်ရေးကို အမြန်ဆုံးအကောင် အထည်ဖော်ဆောင်ရန်နှင့် ကရင်နီပြည်၏ အုပ်ချုပ်ရေး၊ တရားစီ ရင်ရေး၊ ဥပဒေပြုရေးစသည့် မဏ္ဍိုင်အသီးသီးတွင် လူငယ်များ ပါဝင်ဆုံး ဖြတ်နိုင်သည့် အခင်းအကျင်း ကို သက်ဆိုင်ရာအစုအဖွဲ့များမှ အထူးအစီအမံအဖြစ် ထားရှိပေးရန် ကရင်နီပြည် လူငယ် အင်အားစု က ထုတ်ပြန်ထားသည်။
ကရင်နီပြည်လူငယ် တွေ့ဆုံနှီးနှောဖလှယ်ပွဲသို့ ကရင်နီပြည်အတိုင်ပင်ခံကောင်စီ- KSCC လူငယ်ကိုယ်စားလှယ်များ၊ ကရင်နီပြည် လူငယ်ရေးရာကော်မတီကိုယ်စားလှယ်များ၊ ကရင်နီပြည်ကြားကာလအုပ်ချုပ်ရေး ကောင်စီ၏ လူငယ်ရေးရာဌာန- DoYA ကိုယ် စားလှယ်များ၊ ကရင်နီပြည်လူငယ်များသမဂ္ဂ- UKSY ကိုယ်စားလှယ်များ၊ ကျောင်းသားလူ ငယ် ကိုယ်စားလှယ်များ၊ အရပ်ဖက်လူငယ်အဖွဲ့အစည်း ကိုယ်စား လှယ်များနှင့် ကရင်နီပြည်ရှိ ဌာနေတိုင်းရင်းသားလူမျိုးစုလူငယ် အသီးသီးတို့မှပါဝင်ပြီး အမျိုးသား ၆၂ ဦး၊ အမျိုးသမီး ၄၄ ဦး၊ LGBT ၂ ဦး၊ စုစုပေါင်း ၁၀၈ ဦး ပါဝင်တက်ရောက်ခဲ့ကြောင်း သိရသည်။
အဆိုပါ တွေ့ဆုံပွဲတွင် လက်ရှိကရင်နီပြည်၏ နိုင်ငံရေး၊ စစ်ရေးအခြေအနေများကို သုံးသပ်ဆွေးနွေး ခြင်း၊ ကရင်နီပြည်၏ ဒေသအလိုက် လူငယ်အခြေအနေကိုသုံးသပ်ခြင်း၊ ကရင်နီပြည်လူငယ်ရေးရာ မူဝါဒ ချပြဆွေးနွေး အကြံပြုချက်များရယူခြင်း၊ ရှေ့လုပ်ငန်း စဉ်များချမှတ်ခြင်းနှင့် လူငယ်များ၏ ဘုံ သဘောထားရပ်တည်ချက်များ ဖော်ထုတ်ဆွေးနွေးခြင်းများ ပြုလုပ်ခဲ့ကြောင်း သိရသည်။
ဓာတ်ပုံ- ၂၀၂၀ ခုနှစ်တွင် ပြုလုပ်ခဲ့သော ကရင်နီပြည်လူငယ်ထု တွေ့ဆုံ နှီးနှောဖလှယ်ပွဲ။ (ပုံအဟောင်းကို အသုံးပြုထားပါသည်။)
