အကြမ်းဖက်စစ်အုပ်စုက ယခုဒီဇင်ဘာလအတွင်းတွင်မှ အသစ်ဖွင့်လိုက်သော MRTV နှင့် MRN သတင်းပေ့ချ်များကို Facebook က ထပ်မံဖယ်ရှားလိုက်ပြန်သည့်အတွက် ယင်းသည် မြန်မာစစ်အုပ်စု ဝါဒမှိုင်းဖြန့်ယန္တရားအတွက် နောက်ထပ်ထိုးနှက်ချက်တစ်ခုဖြစ်စေခဲ့ကြောင်း Justice For Myanmar အဖွဲ့က ယနေ့ထုတ်ပြန်သည်။
Facebook သည် MITV နှင့် ရတနာပုံသတင်းစာတို့၏ စာမျက်နှာများကို အစောပိုင်းကတည်းက ဖယ်ရှားခဲ့ပြီးဖြစ်သော်လည်း ပြီးခဲ့သည့်ရက်ပိုင်းအတွင်း YouTube၊ Twitch နှင့် Kick တို့က ၄င်းတို့ပလက်ဖောင်းပေါ်ရှိ အဆိုပါ MRTV တိုက်ရိုက်ထုတ်လွှင့်မှုများအား ပိတ်ပင်မှုများ ရှိလာခဲ့ပြီးနောက်တွင် Facebook က ယခုကဲ့သို့ MRTV နှင့် MRN စာမျက်နှာအသစ်များကိုပါ ထပ်မံဖယ်ရှားခဲ့ခြင်း ဖြစ်သည်။
Facebook ၏ မိခင်ကုမ္ပဏီ Meta သည် ၂၀၂၁ ခုနှစ်မှစတင်၍ မြန်မာစစ်တပ်၊ စစ်အုပ်စုဆက်နွှယ် စီးပွားရေးလုပ်ငန်းများနှင့် စစ်အုပ်စုထိန်းချုပ်ထားသော နိုင်ငံပိုင်အဖွဲ့အစည်းများနှင့်မီဒီယာများကို Facebook နှင့် Instagram ပလက်ဖောင်းများပေါ်တွင် အသုံးပြုခွင့်ပိတ်ပင်ထားသည့် မူဝါဒကို ချမှတ်ကျင့်သုံးလျက်ရှိကြောင်း သိရသည်။
ယခု Facebook ၏ အရေးယူမှုအပြီးတွင် Justice For Myanmar က နည်းပညာကုမ္ပဏီအားလုံးအနေဖြင့် စစ်အုပ်စု၏ ဝါဒမှိုင်းဖြန့်အကောင့်များအား ဖြုတ်ချရန်နှင့် ၄င်းတို့၏ ပလက်ဖောင်းများအား စစ်အုပ်စုက အသုံးပြုနေခြင်းကို ပိတ်ပင်ရန် တောင်းဆိုကြောင်း ထုတ်ပြန်ခဲ့သည်။
အကြမ်းဖက်စစ်အုပ်စုသည် ၄င်းတို့၏အတုအယောင် ရွေးကောက်ပွဲအား ပြည်တွင်း ပြည်ပမှအသိအမှတ်ပြုမှု ရရှိရန်အတွက် ကြိုးပမ်းရာတွင် အဆိုပါ သတင်းပေ့ချ်များနှင့် ရုပ်သံတိုက်ရိုက်ထုတ်လွှင့်များသည် အရေးပါသော အခန်းကဏ္ဍတစ်ခုမှ ပါဝင်နေပြီး၊ ယခုအခါ အဆိုပါ ပလက်ဖောင်းများကို နိုင်ငံတကာနည်းပညာကုမ္ပဏီကြီးများက ပိတ်ပင်လိုက်သည့်အတွက် စစ်အုပ်စုအတွက် ၎င်းတို့၏ အတုအယောင်ရွေး ကောက်ပွဲမတိုင်မီ နေ့ရက်များကို MRTV သတင်းပေ့ချ်များနှင့် တိုက်ရိုက်ရုပ်သံလွှင့် ပလက်ဖောင်းများမရှိဘဲ ထပ်မံဖြတ်သန်းရတော့မည်ဖြစ်ကြောင်း JFM ဆိုသည်။
ထိုသို့ စစ်အုပ်စုက အသစ်ဖွင့်လှစ်ခဲ့သည့် MRTV နှင့် MRN ပေ့ချ်တို့ကို ဖယ်ရှားပိတ်သိမ်းလိုက်သည့် Facebook ၏ အရေးယူဆောင်ရွက်မှုအပေါ် ကြိုဆိုကြောင်းနှင့် အဆိုပါဝါဒမှိုင်းဖြန့် စာမျက်နှာများအကြောင်း ၄င်းတို့ထံ သတင်းပေးခဲ့ကြသူအားလုံးကိုလည်း ကျေးဇူးတင်ကြောင်း Justice For Myanmar ကထုတ်ပြန်ခဲ့သည်။
