စစ်ကိုင်းတိုင်း၊ ကသာမြို့သိမ်းတိုက်ပွဲ ၇ ရက်မြောက်လာချိန် စစ်တပ်စခန်းများထံသို့ သွားရောက် ပူးပေါင်းသည့် Non-CDM ဝန်ထမ်းများနှင့်မိသားစုဝင်များကိုပါ လက်နက်တပ်ဆင်ပေးပြီး စစ်တိုက်ခိုင်းနေကာ ငြင်းဆန်မရ ဖြစ်နေကြောင်း ခမရ ၃၀၉ တပ်အတွင်း ခိုလှုံရောက်ရှိနေသည့် Non-CDM ဝန်ထမ်းတချို့နှင့် အဆက်အသွယ်ရှိနေသော နေပြည်တော်ထွေ/အုပ်ဝန်ထမ်းသတင်းရင်းမြစ်က ပြောဆိုသည်။
ဒီဇင်ဘာလ ၂၈ ရက်နေ့မှစတင်ပြီး ကသာမြို့သိမ်းတိုက်ပွဲကို KIA နှင့် PDF တပ်များက ဆင်နွှဲပြီးနောက် ထွေ/အုပ်ရုံး၊ မြို့နယ်တရားရုံး၊ မြန်မာ့စီးပွားရေးဘဏ်၊ လ၀က အပါအဝင် ဌာနဆိုင်ရာ Non-CDM ဝန်ထမ်းများနှင့် မိသား စုများမှာ စစ်တပ်နှင့်ရဲများထံသို့ သွားရောက် ပူးပေါင်းခိုလှုံကြကြောင်း၊ တချို့သော Non-CDM ဝန်ထမ်းများမှာလည်း စစ်ဘေးရှောင်များနှင့်အတူ မြို့မှ ထွက်ခွာသွားကြကြောင်း၊ လက်ရှိ စစ်တပ်၊ ရဲများနှင့် အတူ သွားရောက် ပူးပေါင်းကြသော Non-CDM ဝန်ထမ်းနှင့်မိသားစု ၁၀၀ ဝန်းကျင်ရှိပြီး အဆိုပါ ဝန်ထမ်းများနှင့်မိသားစုများထံမှ အသက်ပြည့်ပြီးသော သားသမီးများ၊ ဝန်ထမ်းများကို လက်နက်တပ်ဆင်ပေးကာ လုံခြုံရေးယူခိုင်းခြင်းနှင့် စစ်တိုက်ခိုင်းခြင်းများ လုပ်ဆောင်နေကြောင်း သိရှိရသည်။
“ကသာမြို့မ ရဲစခန်းမှာ ထွေ/အုပ်နဲ့ မီးသတ်ဝန်ထမ်းတွေပါ ဝင်တိုက်နေရတယ်။ ခမရ ၃၀၉ ထဲမှာလည်း ဝန်ထမ်းတွေ ရှိတယ်။ အဲဒီမှာလည်း လူငယ်လူရွယ် အကုန် လက်နက်ထုတ်ပေးတယ်။ အထက်အမိန့်နဲ့ တိုက်ခိုင်းတာ။ ကလေးငယ်တွေနဲ့ သက်ကြီးရွယ်အိုပါတဲ့ ဝန်ထမ်းမိသားစုတွေက မပြေးတော့ဘဲ တပ်မတော်နဲ့ရဲစခန်းမှာ သွားပူးပေါင်းကြတာ။ လူငယ်နဲ့ လူလတ်ပိုင်း အမျိုးသမီး အမျိုးသားအကုန် လက်နက်ငယ် ပစ်ခတ် ဖြုတ်တပ် ချက်ချင်းသင်ပြီး တိုက်ခိုင်းတာ” ဟု လက်ရှိ စစ်တိုက်နေရသော ကသာမြို့နယ် ထွေ/အုပ် Non-CDM ဝန်ထမ်းနှင့် အဆက်အသွယ်ရရှိထားသည့် နေပြည်တော်ထွေ/အုပ်သတင်းရင်းမြစ်က ပြောဆိုသည်။
စစ်တပ်က ကသာမြို့တွင်းရဲစခန်း၊ အကျဉ်းထောင်၊ ဌာနဆိုင်ရာရုံးတချို့တွင် ဆက်လက် တပ်စွဲပြီး Non-CDM ဝန်ထမ်းတချို့နှင့်အတူ ခုခံတိုက်ခိုက်နေကြောင်း၊ ခမရ ၃၀၉ တပ်ရင်းတွင်လည်း တော်လှန်ရေးတပ်များ၏ ၀ိုင်းဝန်းတိုက်ခိုက်မှု ကို ခံနေရကြောင်း၊ တော်လှန်ရေးတပ်များက မြို့အဝင်ဂိတ်၊ ကားကြီးဝင်း၊ ပညာရေးကောလိပ်၊ အထက်တန်းကျောင်းနေရာများကို သိမ်းပိုက်ရရှိထားကြောင်း၊ တိုက်ပွဲများ ဆက်လက်ပြင်းထန်နေဆဲဖြစ် ကြောင်း သိရှိရသည်။
ဓာတ်ပုံ-ကသာမြို့ ။ (ပုံအဟောင်းကို အသုံးပြုထားပါသည်။)
