မကွေးတိုင်း၊ ပခုက္ကူမြို့၊ ပခုက္ကူ-ရေစကြို လမ်းပိုင်းတွင် ဆက်ကြေးကောက်နေသော အကြမ်းဖက် စစ်တပ်ဂိတ်ကို ဝင်ရောက် တိုက်ခိုက်ရာ စစ်သား ၂ ဦးသေဆုံးခဲ့ကြောင်း ပခုက္ကူခရိုင် အမှတ် ၁၆ တပ်ရင်းကပြောဆိုသည်။
ဇန်နဝါရီလ ၆ ရက်နေ့ မွန်းလွဲ ၁၂ နာရီခန့်တွင် ပခုက္ကူမြို့၊ စက်မှုဇုန်ရှိ ပခုက္ကူ-ရေစကြို လမ်းပိုင်းတွင် စစ်သား၊ ရဲနှင့် ပျူစောထီးများ ပူးပေါင်း၍ ပြည်သူများကို ဆက်ကြေးကောက်နေသော စစ်တပ်ဂိတ်ကို တော်လှန်ရေး တပ်ဖွဲ့များက ဝင်ရောက် တိုက်ခိုက်ခဲ့ကြောင်း သိရသည်။
ထို တိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၂ ဦး မျက်မြင်သေဆုံးခဲ့ကြောင်း၊ ထို့ပြင် အကြမ်းဖက် စစ်တပ်ဘက်မှလည်း စနိုက်ပါ၊ ၄၀ မမ ဗုံးများဖြင့် ပြန်လည် ပစ်ခတ် တိုက်ခိုက်ခဲ့သောကြောင့် တော်လှန်ရေး ရဲဘော်များ ပြန်လည် ဆုတ်ခွာခဲ့ရကြောင်း သိရှိရသည်။
“ပခုက္ကူမြို့ ပခုက္ကူ-ရေစကြို လမ်းပိုင်းမှာ စစ်ခွေး၊ ရဲခွေးနဲ့ ပျူခွေးတွေ ပူးပေါင်းပြီး ပြည်သူတွေကို ဆက်ကြေး ကောက်ခံနေတဲ့ဂိတ်ကို သွားရောက် ပစ်ခတ် တိုက်ခိုက်ခဲ့တာ ပစ်ခတ်မှုအတွင်းမှာ စစ်ခွေး ၂ ကောင် မျက်မြင်လဲကျတယ်။ စစ်ခွေးတွေက စနိုက်ပါ၊၄၀ မမ ဗုံးတွေနဲ့ ပြန်လည်ပစ်ခတ် တိုက်ခိုက်ခဲ့လို့ ရဲဘော်တွေ စစ်ဝတ်တန်ဆာ အပြည့်အစုံမရှိလို့ ကျည်မလုံလောက်မှုတွေကြောင့် ပြန်လည်ဆုတ်ခွာခဲ့ရတယ်။ ရဲဘော်တွေတော့ အထိအခိုက်မရှိပါဘူး” ဟု ပခုက္ကူခရိုင်၊အမှတ်(၁၆)တပ်ရင်းက ပြောဆိုသည်။
အဆိုပါ တိုက်ခိုက်မှုကို ပခုက္ကူခရိုင်၊ အမှတ် (၁၆) တပ်ရင်း ၊ANYAR AYEYAWADDY REVOLUTION FORCE (AARF) နှင့် GOLDEN EGALE (PDF) တို့က ပူးပေါင်း လုပ်ဆောင်ခဲ့ကြောင်း သိရသည်။
