ရန်ကုန်၊ ဇန်နဝါရီ ၁၀
ပဲခူးတိုင်း၊ ညောင်လေးပင်မြို့နယ်၊ ထိန်တပင်ကျေးရွာနှင့် ကလိမ်ခင်ကျေးရွာရှိ အကြမ်းဖက် စစ်တပ် စခန်းများကို ဝင်ရောက်တိုက်ခိုက်ခဲ့ကြောင်း တောကျီးကန်းစစ်ကြောင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။
ဇန်နဝါရီလ ၉ ရက်နေ့ နံနက်အစောပိုင်းတွင် ညောင်လေးပင်မြို့နယ်၊ ထိန်တပင်ကျေးရွာနှင့် ကလိမ်ခင်ကျေးရွာရှိ အကြမ်းဖက် စစ်တပ် စခန်းများကို ပဲခူးတိုင်းစစ်ဌာန ပြည်သူ့ကာကွယ်ရေးတပ်ဖွဲ့ဝင်များက ပူးပေါင်းတိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ အရာရှိများ အပါအဝင် ထိခိုက်သူများပြာပြီး သေဆုံးသူ အရေအတွက်ကို အတည်ပြုနိုင်ခြင်းမရှိသေးကြောင်း သိရှိရသည်။
ထိုသို့ တိုက်ခိုက်မှုပြုလုပ်ပြီးနောက် တော်လှန်ရေး တပ်ဖွဲ့များက ရန်ကုန်-မန္တလေး လမ်းဟောင်းပေါ်တွင် လုံခြုံရေးဆိုင်ရာ စစ်ဆေးမှုများကိုလည်း ဆောင်ရွက်နိုင်ခဲ့ကြောင်း၊ ထို တိုက်ခိုက်မှုကို အမှတ်(၂) စစ်ဒေသ၊ ပဲခူးတိုင်းစစ်ဌာန၏ စစ်တောင်းမြစ်ဝှမ်းဒေသ၊အောင်မြင်စစ်ဆင်ရေး၏ ပူးပေါင်းစစ်ဆင်ရေးတစ်ခုလည်းဖြစ်ကြောင်း သိရသည်။
“အဲစခန်းမှာ တပ်စွဲထားတာက စစ်ခွေး အင်အား စုစုပေါင်း ၆၀ ကျော်ပါတယ်။ သူတို့ဘက်က ၄ ယောက်ဒဏ်ရာရတယ်။ ၂ ယောက်ကတော့ စိုးရိမ်ရတယ်။ စိုးရိမ်ရတဲ့အထဲမှာ စစ်ဗိုလ်အဆင့် ၁ ကောင်းပါတယ်လို့ သတင်းရထားပါတယ်” ဟု တောကျီးကန်းစစ်ကြောင်းမှ တာဝန်ရှိသူက ပြောဆိုသည်။
အဆိုပါတိုက်ခိုက်မှုကို ပြည်သူ့ကာကွယ်ရေးတပ်မတော်၊ ပဲခူးတိုင်းစစ်ဌာန ဗျူဟာ (၂၆) တပ်ရင်းများဖြစ်သော တောကျီးကန်းတပ်ရင်း၊ ပဲခူးခရိုင်အမှတ် (၃) မီးနဂါး(3703)တပ်ရင်းတို့နှင့်အတူ တော်ဝင်ဒေါင်းတပ်ရင်းတို့မှ တပ်ဖွဲ့ဝင်များပူးပေါင်းက ပြုလုပ်ခဲ့ခြင်းဖြစ်ကြောင်းသိရှိရသည်။
ထို့ပြင် စစ်ကိုင်းတိုင်း၊ ချောင်းဦးမြို့ ဘုရင်ဂျီရပ်ကွက်တွင် ကင်းပတ်ရန်ထွက်လာသော အကြမ်းဖက် စစ်တပ်ကို မိုင်းဆွဲတိုက်ခိုက်ခဲ့ရာ စစ်တပ်ဘက်မှ ၂ ဦး ထိခိုက်ဒဏ်ရာရရှိခဲ့ကြောင်း BLDF တပ်ခွဲ အညာမိုင်း မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသိုပြောဆိုသည်။
ဇန်နဝါရီလ ၉ ရက်နေ့ ညနေ့ ၄ နာရီခန့်တွင် ချောင်းဦးမြို့ ဘုရင်ဂျီရပ်ကွက်တွင် အကြမ်းဖက် စစ်တပ်၏ အတုယောင်ရွေးကောက်ပွဲကို လုံခြုံရေးယူပေးရန်အတွက် ကင်းပတ်ရန်ထွက်လာသော စစ်သား ၆ ဦးကို BLDF တပ်ခွဲ အညာမိုင်းမှ ရဲဘော်များက ဘုရင်ဂျီ သုတ်သန် အနီးတွင် မိုင်းဆွဲတိုက်ခိုက်ခဲ့ကြောင်း၊ အဆိုပါ မိုင်းဆွဲတိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၂ ဦးထိခိုက်ဒဏ်ရာရရှိကာ ချောင်းဦးမြို့သို့ ပြန်လည် ဆုတ်ခွာသွားကြောင်း၊ တိုက်ခိုက်မှု ပြုလုပ်ပြီးနောက် တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရှိရသည်။
“စစ်ခွေးက ဒဏ်ရာရရှိတာပဲရှိတာပါ။ မိုင်းက ၂ လုံးပါ။ ၉ ရက်နေ့ ညနေ ၄ နာရီလောက်မှာ မိုင်းဆွဲ တိုက်ခိုက်ခဲ့တာပါ။ မိုင်းဆွဲ တိုက်ခိုက်ပြီးနောက်မှာ စစ်ခွေးတွေက ပြည်သူတွေကို ဓားစာခံအနေနဲ့ ဖမ်းသွားတာလည်းရှိတယ်။ ဘယ်နှဦး ဖမ်းဆီးခံရလဲဆိုတာတော့ ကျနော်တို့လည်း အတည်မပြုနိုင်ဘူး။ မိုင်းဆွဲတာက ချောင်းဦးမြို့ နောက်ချောင်းဦး ရပ်ကွပ်ထဲကပါ” ဟု BLDF တပ်ခွဲ အညာမိုင်း မှ တာဝန်ရှိသူက ပြောဆိုသည်။
