ရန်ကုန်မြို့တွင် ယနေ့ ညပိုင်း ငလျင်လှုပ်ခတ်ခဲ့ပြီး သိသာစွာ ခံစားခဲ့ရကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဇန်နဝါရီလ ၁၉ ရက်နေ့ ည ၁၀ နာရီကျော်ခန့်တွင် ရန်ကုန်မြို့၌ ငလျင်လှုပ်ခတ်ခဲ့ပြီး မြို့နယ် အများအပြားမှ ပြည်သူများ သိသာစွာခံစားခဲ့ရကြောင်း၊ ထို့ပြင် အထပ်မြင့်တိုက်ပေါ်တွင် နေထိုင်သော ပြည်သူများလည်း လမ်းမပေါ် ပြေးဆင်းမှုများ ရှိကြောင်း သိရသည်။
“ငလျင်လှုပ်တာ အိမ်က ရမ်းနေတာ ပထမတော့ ခေါင်းမူးနေတယ်ထင်တာ ရပ်ကွက်ထဲ ငလျင်လှုပ်တယ် အော်တော့မှ အိမ်ပေါ်ကနေ ပြေးဆင်းရတယ်။ အိမ်တွေလည်း ရမ်းသွားတယ်။ အထပ်မြင့်တိုက်ပေါ်က လူတွေလည်း ပြေးဆင်းလာတာတွေရှိတယ်” ဟု လှိုင်သာယာမြို့နယ်နှင့် မြောက်ဥက္ကလာမြို့နယ်တွင် နေထိုင်သော ပြည်သူများက ပြောဆိုသည်။
အဆိုပါ ငလျင်သည် ပဲခူးတိုင်း၊ မိုးညိုမြို့အနီး၊ မြေအောက်အနက် ၁၁၀ ကီလိုမီတာကိုဗဟိုပြု လှုပ်ခတ်ခဲ့ခြင်းဖြစ်ပြီး ရစ်ခ်တာစကေး ၄.၅ အဆင့်နှင့် အင်အားအတော်အသင့်ရှိသော မြေငလျင်တစ်ခု ဖြစ်ကြောင်း NUG အစိုးရ လူသားစာနာဌာနက ထုတ်ပြန်ထားသည်။
အလားတူ ဇန်နဝါရီလ ၁၅ ရက်နေ့ ညနေ ၆ နာရီ ၄၂ မိနစ်ခန့်ကလည်း မန္တလေးမြို့တောင်ဘက် ၉၈ ကီလိုမီတာအကွာ ဝမ်းတွင်းမြို့အနီး မြေအောက်အနက် ၃၅ ကီလိုမီတာကို ဗဟိုပြု၍ ရစ်ခ်တာစကေး ၅ အဆင့်နှင့် အင်အားအတော်အသင့်ရှိသည့် မြေငလျင်တစ်ခု လှုပ်ခတ်ခဲ့ကြောင်း၊ ထိုငလျင်လှုပ်ခတ်မှုကို နေပြည်တော်၊ တောင်ကြီး၊ မိတ္ထီလာ နှင့် မန္တလေးမြို့ပေါ်မှ ပြည်သူများ သိသာစွာခံစားခဲ့ရသည်။
မြန်မာနိုင်ငံတွင် မတ်လ ၂၈ ရက်နေ့ ပြင်းအား ၇ ဒသမ ၇ အဆင့်ရှိ စစ်ကိုင်းငလျင်ကြီးကြောင့် မန္တလေး၊ စစ်ကိုင်း၊ နေပြည်တော် အပါအဝင် မြို့ကြီးများမှ ပြည်သူထောင်ချီ သေဆုံးခဲ့ကြောင်း၊ ထိုသို့ ငလျင်ကြီး လှုပ်ခတ်ပြီးနောက် နောက် ဆက်တွဲ ငလျင် စုစုပေါင်း အကြိမ်ရေ ၂၀၀ ကျော် နီးပါး လှုပ်ခတ်ခဲ့ကြောင်း သိရသည်။
ဓာတ်ပုံ – ရန်ကုန်မြို့တွင် ညအချိန် ငလျင်လှုပ်ခတ်၍ အထပ်မြင့်တိုက်တာများမှ ပြေးဆင်းကြသော ပြည်သူတချို့ (ပုံအဟောင်းဖြစ်သည်)
