အာဆီယံဥက္ကဋ္ဌ ဖိလစ်ပိုင်က မြန်မာအရေး အစည်းအဝေး တစ်ရပ် ကျင်းပခဲ့ပြီး မြန်မာစစ်တပ် မပါဝင်ဘဲ အရေးပါသော နိုင်ငံရေး အဖွဲ့အစည်းများ တက်ရောက်ဟု ဖိလစ်ပိုင်နိုင်ငံခြားရေး ဝန်ကြီး ထုတ်ပြော

ရန်ကုန်၊ ဇန်နဝါရီ ၂၂

အာဆီယံဥက္ကဋ္ဌ ဖိလစ်ပိုင်က မြန်မာအရေး အစည်းအဝေးတစ်ရပ် ကျင်းပခဲ့ပြီး မြန်မာစစ်တပ် မပါဝင်ဘဲ အရေးပါသော နိုင်ငံရေးအဖွဲ့အစည်းများ တက်ရောက်ခဲ့ကြောင်း ဖိလစ်ပိုင်နိုင်ငံခြားရေး ဝန်ကြီးMa. Theresa Lazaro က ထုတ်ဖော်ပြောဆိုသည်ဟု ရိုက်တာသတင်းတစ်ရပ်အရ သိရှိရသည်။

အာဆီယံ လက်ရှိဥက္ကဋ္ဌ ဖိလစ်ပိုင်နိုင်ငံက မြန်မာ့ငြိမ်းချမ်းရေး လမ်းကြောင်းကို ပြန်လည် အသက်သွင်းနိုင်ရေး အရေးပါသည့် နိုင်ငံရေးအဖွဲ့အစည်းများ ပါဝင်သော မြန်မာ့အရေးဆွေးနွေးပွဲ (Stakeholder Meeting)ကို ယခုအပတ်အတွင်း လက်ခံကျင်းပခဲ့ကြောင်း သိရှိရသည်။

အဆိုပါအစည်းအဝေးကို ဖိလစ်ပိုင် နိုင်ငံခြားရေးဝန်ကြီး Ma. Theresa Lazaro က ဦး ဆောင်ခဲ့ပြီး အဆိုပါ အစည်းအဝေးတွင်အကြမ်းဖက်မှု လျော့ချရေး၊ လူသားချင်းစာနာမှု အကူအညီများ လွယ်ကူစွာ ပို့ဆောင်နိုင်ရေးနှင့် နိုင်ငံရေးဆွေးနွေးပွဲများပြန်စနိုင်ရေး အဓိကထား ဆွေးနွေးခဲ့ကြကြောင်း သိရှိရသည်။

ဖိလစ်ပိုင် နိုင်ငံခြားရေးဝန်ကြီး Ma. Theresa Lazaro က “အာဆီယံ ငါးချက်ညီလာခံ (Five-Point Consensus) ကို ဘယ်လို လက်တွေ့ကျကျ အကောင်အထည်ဖော်မလဲဆိုတာကို အားလုံးက တက်ကြွပြီး အဓိပ္ပါယ်ရှိရှိ အမြင်ဖလှယ် ဆွေးနွေးခဲ့ကြပါတယ်” ဟု သူမ၏ လူမှုကွန်ရက်မှတစ်ဆင့် သတင်းထုတ်ပြန်ထားသည်။

ဖိလစ်ပိုင် နိုင်ငံခြားရေးဝန်ကြီး Ma. Theresa Lazaro က ဇန်နဝါရီလအတွင်း မြန်မာနိုင်ငံသို့ သွားရောက်ခဲ့ပြီး အကြမ်းဖက် စစ်ခေါင်းဆောင် မင်းအောင်လှိုင်နှင့်တွေ့ဆုံခဲ့သည်။

ဖိလစ်ပိုင် နိုင်ငံခြားရေးဝန်ကြီးဌာန တာဝန်ရှိသူ Dominic Xavier Imperial က မြန်မာ့အရေးဆွေးနွေးပွဲတွင် စစ်တပ်ဘက်မှ ကိုယ်စားလှယ် မပါဝင်ခဲ့ကြောင်း အတည်ပြုပြောကြားပြီး၊ ပါဝင်သူများကို ၎င်းတို့ဆန္ဒအရ အမည်ထုတ်ဖော်ခြင်းမရှိဘဲ အရေးပါသည့် နိုင်ငံရေးအဖွဲ့အစည်းများ ပါဝင်ကြောင်း ထုတ်ဖော်ပြောဆိုထားသည်။

သို့ရာတွင် ချင်းအမျိုးသားတပ်ဦး (Chin National Front) က ဖိလစ်ပိုင်တွင် ပြုလုပ်သည့် မြန်မာ့အရေးဆွေးနွေးပွဲ တက်ရောက်ခဲ့ကြောင်း အတည်ပြုထားပြီး အာဆီယံ အထူးကိုယ်စားလှယ် ဖိလစ်ပိုင်နိုင်ငံခြားရေးဝန်ကြီး Lazaro အနေဖြင့် ဘက်စုံ တွေ့ဆုံဆွေးနွေးရန် ကြိုးစားနေခြင်းကို အပြုသဘောဖြင့် ကြိုဆိုကြောင်း ချီးကျူးပြောဆိုထားသည်။

ရန်ကုန်ခေတ်သစ်သတင်းဌာနက အမျိုးသားညီညွတ်ရေးအစိုးရ-NUGထံသို့ ဆက်သွယ်မေးမြန်းသော်လည်း ဖိလစ်ပိုင်တွင် ပြုလုပ်သည့် မြန်မာ့အရေး ဆွေးနွေးပွဲသို့ NUG က တက်ရောက်ခြင်းရှိ၊ မရှိ မပြောနိုင်သေးဟုသာ တုံ့ပြန်ပြောဆိုသည်။

အာဆီယံက မြန်မာ့အရေး ကြိုးပမ်းမှုများ ရှိနေသာ်လည်း မြန်မာနိုင်ငံတွင် စစ်ဘေးရှောင်ဦးရေ ၃ ဒသမ ၆ သန်းအထိ ရှိလာကြောင်း ကုလသမဂ္ဂက ထုတ်ပြန်ထားသည်။

ဓာတ်ပုံ- Rappler။