ရန်ကုန်၊ ဇန်နဝါရီ ၂၇
မန္တလေးမြို့ နန်းတွင်းရှိ အကြမ်းဖက် စစ်တပ်၏ အလယ်ပိုင်းတိုင်း စစ်ဌာနချုပ် ရှော့တိုက်ဒုံးများဖြင့် ပစ်ခတ်တိုက်ခိုက်ခံရပြီး ကျယ်လောင်သော ပေါက်ကွဲသံများ ထွက်ပေါ်ခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဇန်နဝါရီလ ၂၇ ရက်နေ့ နံနက်အစောပိုင်း ၄ နာရီ ၃၀ မိနစ်ခန့်တွင် မန္တလေးမြို့ နန်းတွင်းရှိ အလယ်ပိုင်းတိုင်း စစ်ဌာနချုပ် ရှော့တိုက်ဒုံးများဖြင့် ပစ်ခတ် တိုက်ခိုက်ခံရပြီး ကျယ်လောင်သော ပေါက်ကွဲသံများ ထွက်ပေါ်ခဲ့ကြောင်း၊ ထိုသို့ ပစ်ခတ် တိုက်ခိုက်မှု ဖြစ်ပွားပြီးနောက် လက်နက်ငယ် ပစ်ခတ်သံများလည်း ထွက်ပေါ်ခဲ့ကြောင်း သိရသည်။
ယင်းသို့ တိုက်ခိုက်ခံရမှု ဖြစ်ပွားပြီးနောက် အကြမ်းဖက် စစ်တပ်က မန္တလေးမြို့ပေါ်တွင် စစ်ဆေးမှုများ တင်းကျပ်စွာ လုပ်ဆောင်နေကြောင်း၊ အရပ်ဝတ် ပျူစောထီးများလည်း အိမ်စီးကားများဖြင့် မန္တလေးမြို့ပေါ်တွင် ကင်းလှည့်နေကြောင်း သိရှိရသည်။
“ဒီနေ့ နံနက်အစောပိုင်း ၄ နာရီလောက်မှာ ပေါက်ကွဲသံတွေကြားရတာ တော်တော်ကျယ်တယ်။ မြေပါတုံသွားတယ်။ ပေါက်ကွဲသံက တော်တော်ကျယ်တယ်။ ငလျင်လှုပ်တယ်လို့ ပထမ ကထင်တာ ဆက်တိုက် ပေါက်ကွဲသံတွေ ကြားရတော့မှ နန်းတွင်းထဲ ပစ်ခံရမှန်းသိတာ” ဟု ဒေသပြည်သူတစ်ဦးက ပြောဆိုသည်။
အလားတူ ၂၀၂၅ ခုနှစ် ဒီဇင်ဘာလ ၂၈ ရက်နေ့ကလည်း မန္တလေးနန်းတွင်းရှိ အကြမ်းဖက် စစ်တပ်၏ အလယ်ပိုင်းတိုင်းစစ်ဌာနချုပ် အတွင်းသို့ ၁ဝ၇ မမ ရှော့တိုက်ဒုံး ၅ လုံးဖြင့် Brave Warriors for Myanmar (BWM) ၊ No More Dictatorship (NMD-PDF) ၊ Shadow (အညာ) နှင့် Infinity တို့ ပူးပေါင်း၍ ပစ်ခတ်တိုက်ခိုက်နိုင်ခဲ့ပြီး စစ်သား ၂ ဦးထက်မနည်းသေဆုံးကာ လူနာတင် ယာဉ်များလည်း အဝင်အထွက်ပြုလုပ်ခဲ့ကြောင်း၊ နန်းတွင်းရှိ စစ်တပ်ကလည်း လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်မှု ကြောင့် မြို့နေပြည်သူအချို့ ထိခိုက်ဒဏ်ရာရရှိခဲ့ကြောင်း သိရှိသည်။
ဓာတ်ပုံ- မန္တလေးမြို့ ၊ နန်းတွင်းရှိ အလယ်ပိုင်းတိုင်းစစ်ဌာနချုပ်ကို မြင်တွေ့ရစဉ်။ (ပုံအဟောင်းကို အသုံးပြုထားပါသည်။)
