ရန်ကုန်၊ ဇန်နဝါရီ ၂၇
ကရင်နီပြည်၊ မယ်စဲ့ အကျဉ်းထောင်မှ လွတ်မြောက်လာသော စစ်သုံ့ပန်း စစ်သား ၆၈ ဦးကို ထိုင်းစစ်တပ်က မြန်မာစစ်တပ်ထံသို့ ပြန်လည် လွှဲပြောင်းပေးလိုက်ကြောင်း ထိုင်း-မြန်မာနယ်စပ် သတင်းရင်းမြစ်များထံမှ သိရှိရသည်။
ဇန်နဝါရီလ ၁၈ ရက်နေ့ နံနက် ၁ နာရီခန့်အချိန် မယ်စဲ့မြို့နယ်ရှိ အကျဉ်းထောင်တွင် စစ် တပ်ဘက်မှ စစ်သုံ့ ပန်း အကျဉ်းသား ၈၂ ဦး ဝန်းကျင်ခန့်မှာ လက်နက်ငယ် ၉ လက်နှင့်အတူ ထွက်ပြေးလွတ်မြောက် သွားခဲ့ကြောင်း၊ ထိုသို့ ထွက်ပြေးသွားသူများအနက် စစ်အရာရှိပိုင်စိုးသူ အပါအ၀င် စစ်သုံ့ပန်း ၆၈ ဦးမှာ ထိုင်းဘက်သို့ ရောက်ရှိသွားကြောင်း၊ အဆိုပါ ထွက်ပြေးသွားသော စစ်သုံ့ပန်း ၆၈ ဦးကို ထိုင်းအာဏာပိုင်များက ဇန်နဝါရီလ ၂၆ ရက်နေ့ မွန်းလွဲပိုင်း မြ၀တီ-မဲဆောက် အမှတ် ၂ ချစ်ကြည်ရေးတံတားမှ တဆင့် မြန်မာစစ်တပ်ထံသို့ ပြန်လည် လွှဲပြောင်းပေးလိုက်ကြောင်း သိရှိရသည်။
“လွှဲပြောင်းမှုမှာ အဓိက ထိုင်းစစ်တပ်က ဦးဆောင်ပြီး ပြန်လွှဲပေးတာလို့ သိရတယ်။ စစ်သုံ့ပန်းတွေဆီက လက်နက်တချို့ကိုတော့ သိမ်းလိုက်တယ်လို့သိရတယ်” ဟု ထိုင်း-မြန်မာနယ်စပ် သတင်းရင်းမြစ်က ပြောဆိုသည်။
ကရင်နီပြည်၊ မယ်စဲ့ထောင်မှာ တော်လှန်ရေးကာလဖြစ်သောကြောင့် သစ်သား၊ ဝါး၊ သံဆူး ကြိုးများသာ ကာရံထားသည့် အကျဉ်းထောင်တစ်ခုဖြစ်ပြီး စစ်ကောင်စီတပ်ဖွဲ့၏ လေ ကြောင်း ရန်ကို ကာကွယ်နိုင်ရန်အတွက်လည်း ပြင်ဆင်ထားရသောကြောင့် အဆောက် အအုံများမှာ ခိုင်ခံမှု အားနည်းကြောင်း၊ ထို့အပြင် အကျဉ်းထောင်ဝန်ထမ်းအင်အားနည်းပါးမှုကြောင့်လည်း ယခုကဲ့သို့ ထွက်ပြေးသွားခဲ့ခြင်းဖြစ်ကြောင်း ကရင်နီပြည်ကာလအုပ်ချုပ်ရေးကောင်စီ -IEC အထွေထွေအတွင်း ရေးမှူး -၂ ဗညား ခွန်အောင်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယင်းအကျဉ်းထောင်အတွင်းမှ ထွက်ပြေးသွားသည့် စစ်သုံ့ပန်းများမှာ တပ်မ ၆၆ မှ လက်အောက်ခံ တပ်များမှ စစ်သားများဖြစ်ပြီး မယ်စဲ့မြို့သိမ်းတိုက်ပွဲတွင် ဖမ်းဆီးရရှိခဲ့သော စစ်သုံ့ပန်းများ ဖြစ်ကြောင်း သိရှိရသည်။
