ရန်ကုန်၊ ဖေဖော်ဝါရီ ၁၀
မန္တလေးတိုင်း၊ နွားထိုးကြီးမြို့နယ်၊ မြဝတီရွာတွင် စစ်တပ်က ရဲတပ်သားတစ်ဦး၏ မိခင်ကို မုဒိမ်းကျင့်ပြီး အခြားပြည်သူများနှင့်အတူ လူသားဒိုင်းအဖြစ် ဖမ်းဆီးထား ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၆ ရက်နေ့ နှင့် ဖေဖော်ဝါရီလ ၇ ရက်နေ့တို့တွင် အကြမ်းဖက် စစ်တပ် စစ်ကြောင်းက နွားထိုးကြီး မြို့နယ်၊ မြ၀တီကျေးရွာသို့ စစ်ကြောင်းထိုးဝင်ရောက်လာပြီး ရွာလုံးကျွတ် မီးရှို့ဖျက်ဆီးခဲ့ကြောင်း၊ ထိုသို့ မီးရှို့ဖျက်ဆီးခံရသော နေအိမ်များကို ကျေးရွာအတွင်း ပြန်လည်ဝင်ရောက်၍ မီးငြိမ်းသတ်ခဲ့သည့် အမျိုးသမီး တချို့ကို စစ်သားများက မုဒိမ်းပြုကျင့်ခဲ့ခြင်းဖြစ်ကြောင်း သိရသည်။
ထိုသို့ စစ်သားများက မုဒိမ်းပြုကျင့်ခဲ့သော အမျိုးသမီး ၂ ဦးအနက် တစ်ဦးမှာ ရဲတပ်သား ၁ ဦး၏ မိခင်ဖြစ်ပြီး အသက် ၅၀ နှစ်အရွယ် အမျိုးသမီးဖြစ်ကြောင်း၊ ထို့ပြင် မုဒိမ်းကျင့်ခံထားရသော အမျိုးသမီး ၂ ဦး အပါအဝင် ပြည်သူများကိုလည်း လူသားဒိုင်းအဖြစ် ဖမ်းဆီးထားပြီး ဆက်လက် စစ်ကြောင်းထိုးနေဆဲဖြစ်ကြောင်း သိရှိရသည်။
“စစ်ခွေးတွေ မုဒိမ်းကျင့်သွားတဲ့ သူတွေထဲက မ—-နဲ့ မ—– တို့ ၂ ဦးပဲ အတည်ပြုနိုင်တယ်။ ကျန်တဲ့ သူတွေကတော့ အမည်တွေ အတည်မပြုနိုင်သေးဘူး။ အဲဒီမှာ မ—-ရဲ့ သားက ရဲခွေးလုပ်နေတာ။ အခုထိ ရဲထဲကနေ မထွက်သေးဘူး။ နောက်ပြီး စစ်ခွေးတွေက လူသားဒိုင်း အဖြစ် ဖမ်းဆီးထားတဲ့ ပြည်သူတွေလည်းရှိသေးတယ်။ အရေအတွက် ဘယ်လောက်ရှိလဲတော့ မသိရသေးဘူး။ စစ်ခွေးတွေက သူတို့လူသားဒိုင်း ဖမ်းဆီးထားတဲ့ သူတွေကို ပြေးရင် ပစ်သတ်မယ်လို့ ခြိမ်းခြောက်ပြောဆိုထားတယ်လို့ သိရတယ်” ဟု ဒေသပြည်သူတစ်ဦးက ပြောဆိုသည်။
လက်ရှိချိန်တွင် မြ၀တီရွာ ၊ ကျွန်းဒေါင့်ရွာ ၊ ဆေးခင်းကြီးရွာ ၊ ရွာသာအေးရွာ၊ ဝက်လူးရွာ၊ ဇီရွာ အောင်မြေစံရွာ ၊ အောင်ချမ်းသာရွာ ၊ မန်ကျီးကုန်းရွာ ၊ ပဲချက် ရှေ့ရွာ၊ ပဲချက် နောက်ရွာတို့မှ ထောင်နှင့်ချီသော ပြည်သူများ ဘေးလွတ်ရာတိမ်းရှောင်နေရကြောင်း သိရသည်။
ဓာတ်ပုံ-နွားထိုးကြီးမြို့နယ်မှ ပျူစောထီးများ။ (ပုံအဟောင်းကို အသုံးပြုထားပါသည်။)
