အမေရိကန်-အီရန် ပဋိပက္ခကြောင့် ကမ္ဘာ့ရေနံဈေးနှင့်ရွှေစျေး ထိုးတက်ပြီး ကမ္ဘာ့စီးပွားရေးကို ရိုက်ခတ်နေ

ရန်ကုန်၊ မတ် ၂

အရှေ့အလယ်ပိုင်းမှာ ဖြစ်ပွားနေတဲ့ စစ်ရေးပဋိပက္ခတွေကြောင့် ဒီနေ့ တနင်္လာနေ့ (မတ်လ ၂ ရက်) ဈေးကွက်ဖွင့်ချိန်မှာ ကမ္ဘာ့ရေနံဈေးနှုန်းတွေ သိသိသာသာ မြင့်တက်လာပြီး စတော့ဈေးကွက်တွေလည်း အထိနာခဲ့ပါတယ်။

ရေနံစိမ်း ဈေးနှုန်းဟာ ၆ ဒသမ ၄ ရာခိုင်နှုန်းလောက်အထိ မြင့်တက်ခဲ့ပြီး တစ်စည်ကို ၇၇ ဒသမ ၅၇ ဒေါ်လာ ဖြစ်သွားပါတယ်။ ဈေးကွက်အဖွင့်မှာဆိုရင် ခေတ္တခဏအတွင်း ၈၂ ဒေါ်လာအထိတောင် ရောက် သွားခဲ့ပါသေးတယ်။ အမေရိကန်ရေနံစိမ်း ဈေးနှုန်းကလည်း ၆ ဒသမ ၂ ရာခိုင်နှုန်းတက်ပြီး တစ်စည်ကို ၇၁ ဒသမ ၁၇ ဒေါ်လာ ဖြစ်လာပါတယ်။

နိုင်ငံတကာမှာ စစ်ရေးတင်းမာမှုတွေကြောင့် လူတွေက စိတ်ချရတဲ့ ရွှေကိုပဲ ဝယ်စုလာကြလို့ ရွှေဈေးဟာလည်း ၁ ဒသမ ၆ ရာခိုင်နှုန်းတက်ပြီး တစ်အောင်စကို ၅,၃၆၀ ဒေါ်လာအထိ ဖြစ်သွားပါတယ်။

အခုအချိန်မှာ အားလုံးက ကမ္ဘာ့ရေနံကုန်သွယ်မှုရဲ့ ငါးပုံတစ်ပုံ စီးဆင်းရာ ဟော်မုဇ်ရေလက်ကြားကို စိုးရိမ်တကြီး စောင့်ကြည့်နေကြပါတယ်။

ရေလမ်းကြောင်းကို ပိတ်ဆို့ထားတာမျိုး မရှိသေးပေမဲ့ တိုက်ခိုက်ခံရမှာကို စိုးရိမ်တာကြောင့် ရေနံတင် သင်္ဘောတွေဟာ ရေလက်ကြားရဲ့ ဟိုဘက်ဒီဘက်မှာ တန်းစီစောင့်ဆိုင်းနေကြပါတယ်။

ကျွမ်းကျင်သူတွေရဲ့ အဆိုအရ လက်ရှိမှာ တစ်နေ့ကို ရေနံစည်ပေါင်း ၁၅ သန်းလောက် ဈေးကွက်ထဲကို မရောက်နိုင်ဘဲ ပိတ်မိနေသလို ဖြစ်နေတယ်လို့ ဆိုပါတယ်။

စစ်ပွဲကြောင့် ကမ္ဘာ့စီးပွားရေး ပြန်လည်ဦးမော့လာဖို့ ခက်ခဲသွားမှာကို ရင်းနှီးမြှုပ်နှံသူတွေက စိုးရိမ်နေကြပါတယ်။ စင်ကာပူ စတော့ရှယ်ယာစျေးကွက်(STI)ကတော့ အာရှမှာ အကျဆုံးဖြစ်ခဲ့ပြီး ၁ ဒသမ ၇၉ ရာခိုင်နှုန်းအထိ ကျဆင်းခဲ့ပါတယ်။

ဂျပန် (Nikkei)ရှယ်ယာစျေးကွက်က လည်းအကျဘက်ကို ထိုးဆင်းနေပါတယ်။ ဂျပန်ဟာ သူတို့သုံးတဲ့ ရေနံ ၉၅ ရာခိုင်နှုန်းကို အရှေ့အလယ်ပိုင်းကနေ ရနေတာဖြစ်လို့ ဂျပန်စတော့ဈေးကွက်ဟာလည်း ၁ ဒသမ ၃၈ ရာခိုင်နှုန်း ကျဆင်းသွားပါတယ်။

သမ္မတ ဒေါ်နယ်ထရမ့်ကတော့ ဒီစစ်ပွဲဟာ နောက်ထပ် ၄ ပတ်လောက်အထိ ကြာနိုင်ပြီး အမေရိကန်ရဲ့ ရည်မှန်းချက်တွေ မပြည့်မချင်း ဆက်တိုက်သွားမယ်လို့ ဆိုထားပါတယ်။ ဒီအတိုင်းသာ ရေနံဈေးတွေ ဆက်တက်နေမယ်ဆိုရင် ကမ္ဘာတစ်ဝန်း ကုန်ဈေးနှုန်းကြီးမြင့်မှု (Inflation) တွေ ပြန်ဖြစ်လာနိုင်တယ်လို့ စီးပွားရေးပညာရှင်တွေက သတိပေးနေကြပါတယ်။