ရန်ကုန်၊ မတ် ၃
အရှေ့တောင်အာရှတစ်ခွင်တွင် အမြစ်တွယ်နေသည့် အွန်လိုင်းငွေလိမ်ဂိုဏ်း (ကျားဖြန့်) များကို အမြစ်ပြတ်ချေမှုန်းရန် အမေရိကန်ပြည်ထောင်စု စုံစမ်းစစ်ဆေးရေးဗျူရို (FBI) နှင့် ထိုင်းရဲတပ်ဖွဲ့တို့ ပူးပေါင်းဆောင်ရွက်နေပြီဖြစ်ကြောင်း အမေရိကန် FBI ၏ သတင်းထုတ်ပြန်ချက်နှင့် ထိုင်းသတင်းဌာနများ၏ ဖော်ပြချက်အရ သိရသည်။
အမေရိကန် FBI က လူမှုကွန်ရက် X (Twitter) တို့မှတစ်ဆင့် ယင်းသို့ ပူးပေါင်းဆောင်ရွက်နေမှုကိုယနေ့ သတင်းထုတ်ပြန်လိုက်ပြီး မြန်မာနိုင်ငံဘက်ခြမ်းရှိ ကျားဖြန့်ဝင်း (Scam Compounds) များကို ထိုင်းဘက်အခြမ်းမှ ဓာတ်ပုံရိုက်ယူထားသည့် ပုံရိပ်များကိုပါ တစ်ပါတည်း ထုတ်ပြန်ထားသည်။
ဘန်ကောက်မြို့အခြေစိုက် အမေရိကန် FBI ၏ တရားဝင်ကိုယ်စားလှယ်ရုံး (Legat Bangkok) က ထိုင်းနိုင်ငံရဲတပ်ဖွဲ့အပြင် ဒေသတွင်းရှိ အခြားသော မဟာမိတ်အဖွဲ့အစည်းများနှင့် လက်တွဲကာ “Scam Compounds” ဟု ခေါ်ဆိုသည့် အွန်လိုင်းငွေလိမ်ဂိုဏ်း အခြေစိုက်စခန်းများကို တိုက်ဖျက်ရန် အရှိန်အဟုန်မြှင့် လုပ်ဆောင်နေကြောင်း သတင်းထုတ်ပြန်ထားခြင်းဖြစ်သည်။
FBI ၏ သတင်း ထုတ်ပြန်ချက် ဓာတ်ပုံများထဲတွင် မြန်မာနိုင်ငံအတွင်းရှိ ကျားဖြန့်ဝင်းများကိုပါ ပစ်မှတ်ထား ဓာတ်ပုံရိုက်ကူးနေသည့် ပုံ ၁ပုံကိုလည်း ကို ထည့်သွင်းဖော်ပြထားခြင်းဖြစ်သည်။
FBI ၏ အဆိုအရ အဆိုပါ ငွေလိမ်ဂိုဏ်းများကြောင့် တစ်ကမ္ဘာလုံးအတိုင်းအတာဖြင့် အမေရိကန်ဒေါ်လာ ဘီလီယံပေါင်းများစွာ ဆုံးရှုံးမှုများ ဖြစ်ပေါ်နေရပြီး၊ သားကောင်ဖြစ်ရသူ ပေါင်းများစွာသည်လည်း ဆိုးရွားစွာ ထိခိုက်နစ်နာနေရကြောင်း သိရသည်။
အထူးသဖြင့် အမေရိကန်ပြည်သူများကို အကာအကွယ်ပေးနိုင်ရန်အတွက် FBI သည် နိုင်ငံရပ်ခြားရှိ ထိပ်တန်းရဲတပ်ဖွဲ့များ၊ ထောက်လှမ်းရေးများနှင့် ခိုင်မာသော ဆက်ဆံရေး တည်ဆောက်ကာ ယခုကဲ့သို့ စစ်ဆင်ရေးများကို လုပ်ဆောင်လာခြင်း ဖြစ်သည်။
ယခုစစ်ဆင်ရေး၏ အသေးစိတ် အချက်အလက်များကိုမူ လုံခြုံရေးအရ FBI ဘက်က ထုတ်ဖော်ပြောဆိုခြင်း မရှိသေးသော်လည်း ဒေသတွင်းရှိ နယ်စပ်ဖြတ်ကျော် Transnational Fraud Networks (နယ်စပ်ဖြတ်ကျော် ငွေလိမ်ကွန်ရက်များ) ကို အရေးယူနိုင်ရန် နိုင်ငံတကာအဆင့် ပူးပေါင်းဆောင်ရွက်မှုများကို အမြင့်ဆုံးအဆင့်ဖြင့် လုပ်ဆောင်နေကြောင်း ထိုင်းသတင်းဌာနတချို့ က ရေးသားဖော်ပြသည်။
FBI ကိုယ်တိုင် မြန်မာနယ်စပ်ရှိ ကျားဖြန့်ဝင်းများကို ဓာတ်ပုံရိုက်ယူကာ တရားဝင်ထုတ်ပြန်လာခြင်းသည် အရှေ့တောင်အာရှရှိ ကျားဖြန့် ငွေလိမ်ဂိုဏ်းများအတွက် ပြင်းထန်သော သတိပေးချက်တစ်ခုဖြစ်နိုင်ကြောင်း ထိုင်း-မြန်မာနယ်စပ်မှ ကရင်စစ်ရေးသတင်းရင်းမြစ်ကသုံးသပ်ပြောဆိုသည်။
