ရန်ကုန်၊ မတ် ၁၀
မကွေးတိုင်း၊ မြိုင်မြို့နယ်ရှိ PDF များ ထိန်းချုပ်ထားသော မြိုင်မြို့နယ်၊ ဝယ်တောင်(မြောက်) ကျေးရွာရှိ အလှူပွဲတစ်ခုသို့ သွားရောက် သီချင်းဖျော်ဖြေခဲ့သော အဆိုတော်လမင်းကဗျာ (ခ) DJ Moon ကို စစ်တပ်က ယမန်နေ့ ဖမ်းဆီးပြီး လက်ရှိ စစ်ကြောရေးတွင် ပို့ဆောင်ထားကြောင်း ရဲသတင်းရင်းမြစ်က ပြောဆိုသည်။
ယမန်နေ့ မတ်လ ၉ ရက်နေ့ နံနက်ပိုင်း ရန်ကုန်မြို့၊ လှိုင်မြို့နယ်၊ ၁၆ ရပ်ကွက်၊ ဦးဖိုးမှန်လမ်းတွင် နေထိုင်သော အဆိုတော် လမင်းကဗျာ(ခ) DJ Moon (ခ) မလှလှဝင်းကို စစ်ထောက်လှမ်းရေး(စရဖ)၊ နယ်မြေခံ လှိုင်မြို့နယ်ရဲတပ်ဖွဲ့၊ နယ်မြေတပ်နယ်မှ စစ်အရာရှိများ ပါဝင်သော ပူးပေါင်းအဖွဲ့က ဝင်ရောက် ဖမ်းဆီးခဲ့ကြောင်း၊ လတ်တလော စစ်ကြောရေးသို့ ပို့ဆောင်ထားကြောင်း သိရှိရသည်။
“သူ့အိမ်ကိုရှာတာ ၂ ရက်ပါ။ ပထမရက်က အိမ်မတွေ့လို့ မနေ့က မနက် ၁၀ နာရီမှာ ဖမ်းဆီးပါတယ်။ ပထမသတင်းပေးတိုင်ကြားချက်နဲ့ရဲလုပ်ငန်းစဉ်တွေကတော့ လှိုင်မြို့မ ရဲစခန်းမှာ ဖွင့်ထားပါတယ်။ လတ်တလောက တပ်ဘက်က စစ်ကြောရေးလုပ်နေပါတယ်။ ပြီးရင်တော့ စခန်းဘက်ကို ပြန်လွှဲမယ်လို့ သိထားပါတယ်။ ပုဒ်မကတော့ အမှု မတပ်ရသေးပါဘူး” ဟု ရဲသတင်းရင်းမြစ်က ပြောဆိုသည်။
ဇန်နဝါရီလ ၂၈ ရက်နေ့ မြိုင်မြို့နယ်၊ ဝယ်တောင်(မြောက်)ကျေးရွာတွင် ပြုလုပ်သော အလှူပွဲသို့ သွားရောက် ဖျော်ဖြေခဲ့သော လမင်းကဗျာကို စစ်တပ်က ခေါ်ယူစစ်ဆေးခြင်းဖြစ်ပြီး ယင်းပွဲတွင် ဆိုင်းတီးခတ်ခဲ့သော ယောမင်းသားလေး ကျော်ဆန်းဝင်း(ရွှေမြန်မာဆိုင်း) အဖွဲ့ကိုလည်း အရေးယူရန် ညွှန်ကြားချက်ရှိ၍ အမှုဖွင့်လှစ်ထားပြီဖြစ်ကြောင်း သိရှိရသည်။
လူမှုကွန်ရက်များတွင် အဆိုတော်လမင်းကဗျာက PDF စိုးမိုးထားသော နေရာများသို့ သွားရောက် ဖျော်ဖြေခဲ့သည့် ဗီဒီယိုဖိုင်များ ပျံ့နှံ့လာပြီးနောက် စစ်လော်ဘီများက တယ်လီဂရမ်မှတစ်ဆင့် သူမကို ဖမ်းဆီးရန် လှုံ့ဆော်ကြရာမှာ နောက် ဆုံးတွင် ဖမ်းဆီးမှု ဖြစ်ပေါ်လာခြင်းဖြစ်သည်။
