ဒေါ်အောင်ဆန်းစုကြည်နှင့် ဦးဝင်းမြင့်ကို မူလရာထူး နိုင်ငံတော်အတိုင်ပင်ခံပုဂ္ဂိုလ်နှင့် သမ္မတအဖြစ် ပြင်သစ်နိုင်ငံက ဆက်လက်ခေါ်ဝေါ်သုံးစွဲပြီး ချက်ချင်းပြန်လွှတ်ပေးရန် ကုလသမဂ္ဂလုံခြုံရေးကောင်စီတွင် တောင်းဆို

စစ်တပ်၏ ရွေးကောက်ပွဲမှာ အတုအယောင် ဟန်ပြသာဖြစ်ပြီး နိုင်ငံ တကာစံနှုန်း ပြည့်မီခြင်းမရှိ၍ ပြင်သစ်နိုင်ငံက အသိအမှတ်မပြုဘဲ ပယ်ချ

ရန်ကုန်၊ မတ် ၁၀

စစ်တပ်က မတရားဖမ်းဆီးထားသော ဒေါ်အောင်ဆန်းစုကြည်နှင့် ဦးဝင်းမြင့်ကို မူလရာထူး နိုင်ငံတော်အတိုင်ပင်ခံပုဂ္ဂိုလ်နှင့် သမ္မတအဖြစ် ပြင်သစ်နိုင်ငံက ဆက်လက်ခေါ်ဝေါ်သုံးစွဲပြီး ချက်ချင်းပြန်လွှတ် ပေးရန် ကုလသမဂ္ဂလုံခြုံရေးကောင်စီတံခါးပိတ်အစည်းအဝေးတွင် တောင်းဆိုလိုက်သည်။

မတ်လ ၆ ရက်နေ့ အမေရိကန်ပြည်ထောင်စု၊ နယူးယောက်မြို့ရှိ ကုလသမဂ္ဂဌာနချုပ်၊ ကုလသမဂ္ဂလုံခြုံရေးကောင်စီတွင် ပြုလုပ်သည့် မြန်မာ့အရေး တံခါးပိတ် ဆွေးနွေးပွဲ၌ ကုလသမဂ္ဂဆိုင်ရာ ပြင်သစ်ဒုတိယအမြဲတမ်းကိုယ်စားလှယ် Mr. Jay Dharmadhikari က မြန်မာစစ်တပ်၏ ဖမ်းဆီးထိန်း သိမ်းမှုခံထားရသည့် မြန်မာခေါင်းဆောင်များကို ၎င်းတို့၏ မူလရာထူးအမည်များဖြစ်သော “နိုင်ငံတော်အတိုင်ပင်ခံပုဂ္ဂိုလ်” နှင့် “နိုင်ငံတော်သမ္မတ” အဖြစ် တရားဝင် ဆက်လက်သုံးနှုန်းခေါ်ဝေါ်ခဲ့ပြီး၊ စစတပ်ဖြင့် ၎င်းတို့ကို မတရားဖမ်းဆီးထားရာမှ ချက်ချင်းပြန်လည်လွှတ်ပေးရန် ပြင်းပြင်းထန်ထန် တောင်းဆိုခဲ့ခြင်းဖြစ်သည်။

ကုလသမဂ္ဂဆိုင်ရာ ပြင်သစ်ဒုတိယအမြဲတမ်းကိုယ်စားလှယ် Mr. Jay Dharmadhikari က မြန်မာအကြမ်းဖက်စစ်အုပ်စု၏ အာဏာသိမ်းမှုကို “ရက်စက်ကြမ်းကြုတ်သော လုပ်ရပ်” ဟု သတ်မှတ်ခဲ့ပြီး၊ ဒီမိုကရေစီနည်းကျ ရွေးကောက်တင်မြှောက်ထားသည့် ခေါင်းဆောင်များကို မူလရာထူးအမည်များဖြင့် သာ သုံးစွဲသွားခြငးဖြစ်သည်။

“ပြင်သစ်နိုင်ငံအနေနဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် (State Counsellor Daw Aung San Suu Kyi)၊ နိုင်ငံတော်သမ္မတ ဦးဝင်းမြင့် (President U Win Myint) နဲ့ အခြားသော မတရားဖမ်းဆီးခံထားရတဲ့ သူ အားလုံးကို စစ်အုပ်စုက ချက်ချင်းပြန်လည်လွှတ်ပေးဖို့ တောင်းဆိုပါတယ”ဟု Mr. Jay Dharmadhikari ကပြောဆိုသည်။

ယခုကဲ့သို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သမ္မတဦးဝင်းမြင့်တို့ကို မူလရာထူးအမည်များကို အသုံးပြု၍ တောင်းဆိုခြင်းမှာ စစ်အုပ်စု၏ အာဏာသိမ်းမှုကို အသိအမှတ်မပြုဘဲ ၂၀၂၀ ရွေးကောက်ပွဲရလဒ်နှင့် ပြည်သူ့ဆန္ဒကိုသာ ပြင်သစ်နိုင်ငံက ဆက်လက်ရပ်တည်နေကြောင်း ပြသလိုက်ခြင်းလည်း ဖြစ်သည်။

စစ်အာဏာသိမ်းပြီး ၅ နှစ်တာကာလအတွင်း မြန်မာပြည်သူများ၏ ဒီမိုကရေစီမျှော်လင့်ချက်များ နင်းခြေခံထားရပြီး စစ်အုပ်စုသည် နိုင်ငံတကာဥပဒေများကို စနစ်တကျချိုးဖောက်ကာ အရပ်သားများ၊ စာသင်ကျောင်းများနှင့် ဆေးရုံများကို ခွဲခြားမှုမရှိဘဲ ဗုံးကြဲတိုက်ခိုက်နေကြောင်း ပြင်သစ်ကိုယ်စားလှယ်က ထောက်ပြခဲ့သည်။

ထို့ပြင် စစ်အုပ်စုက မကြာသေးမီက ပြုလုပ်ခဲ့သည့် ရွေးကောက်ပွဲမှာလည်း ဟန်ပြသာဖြစ်ပြီး နိုင်ငံတကာစံနှုန်း တစ်ခုကိုမျှ ပြည့်မီခြင်းမရှိဟုဆိုကာ စစ်တပ်၏ ရွေးကောက်ပွဲကို ပယ်ချခဲ့သည်။

ပြင်သစ်နိုင်ငံအနေဖြင့် ကုလသမဂ္ဂလုံခြုံရေးကောင်စီတွင် မြန်မာ့အရေးနှင့်ပတ်သက်၍ အကြမ်းဖက်မှုနှင့် ဗုံးကြဲတိုက်ခိုက်မှုများ ချက်ချင်းရပ်တန့်၍ တစ်နိုင်ငံလုံး အပစ်အခတ်ရပ်စဲရန်၊ လူသားချင်းစာနာမှုဆိုင်ရာ အကူအညီများကို အတားအဆီးမရှိ ပေးအပ်ခွင့်ပြုရန်၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် သမ္မတ ဦးဝင်းမြင့်အပါအဝင် နိုင်ငံရေးအကျဉ်းသားအားလုံးကို လွှတ်ပေးပြီး အားလုံးပါဝင်သော နိုင်ငံရေးဆွေးနွေးပွဲများ စတင်ရန်၊ လူ့အခွင့်အရေးချိုးဖောက်မှုများအတွက် ပြစ်ဒဏ်ကင်းလွတ်နေမှုကို တိုက်ဖျက်ရန်၊ ရိုဟင်ဂျာများအပေါ် ခွဲခြားဆက်ဆံမှုရပ်တန့်၍ ၎င်းတို့ ဘေးကင်းစွာ နေရပ်ပြန်နိုင်ရေး စီစဉ်ရန် တို့ကို တောင်းဆိုသည်။

ပြင်သစ်နိုင်ငံသည် မြန်မာ့အရေးဖြေရှင်းရာတွင် အာဆီယံ၏ ကြိုးပမ်းမှုများကို ထောက်ခံကြောင်းနှင့် ကုလသမဂ္ဂလုံခြုံရေးကောင်စီအနေဖြင့် မြန်မာနိုင်ငံတွင် ရေရှည်တည်တံ့သော ငြိမ်းချမ်းရေးရရှိစေရန် အာဆီယံနှင့်အတူ ပူးပေါင်း၍ ဆက်လက်ကတိကဝတ်ပြု လုပ်ဆောင်သွားရန် တိုက်တွန်းသည်။

(ပြင်သစ်နိုင်ငံ၏ ထုတ်ပြန်ချက် အပြည့်အစုံကို https://onu.delegfrance.org/depuis-cinq-ans-les… တွင်သွားရောက် ဖတ်ရှုနိုင်ပါသည်။)