ရန်ကုန်၊ မတ် ၁၀
မြန်မာနိုင်ငံတွင် စစ်အာဏာသိမ်းပြီးနောက် ဖြစ်ပေါ်လာသော စစ်ပွဲများနှင့် ပြည်တွင်း ပဋိပက္ခများကြောင့် လူသားချင်းစာနာမှု အကျပ်အတည်း ဆိုးရွားလာနေပြီး ၂၀၂၆ ခုနှစ်အတွက် အမေရိကန်ဒေါ်လာ ၈၉၀ သန်း အရေးပေါ်လိုအပ်နေကြောင်း ကုလသမဂ္ဂက ထုတ်ပြန်ပြောဆိုသည်။
မြန်မာနိုင်ငံအလယ်ပိုင်း၊ မကွေးတိုင်းဒေသကြီးအတွင်းရှိ ကုန်သွယ်ရေးလမ်းဆုံတစ်ခုကို စစ်ကောင်စီက လေကြောင်းမှ ထပ်မံတိုက်ခိုက်ခဲ့ရာ လူပေါင်း ၂၅ ဦးထက်မနည်း သေဆုံးပြီး ၂၀ ဦးခန့် ဒဏ်ရာရရှိခဲ့သည့် သတင်းများ ထွက်ပေါ်လာပြီးနောက်၊ မြန်မာနိုင်ငံ၏ လူသားချင်းစာနာမှုဆိုင်ရာ အခြေအနေမှာ ပိုမိုဆိုးရွားလာနေကြောင်း ကုလသမဂ္ဂက သတိပေးချက် ထုတ်ပြန်လာခြင်းဖြစ်သည်။
ကုလသမဂ္ဂ၏ လူသားချင်းစာနာမှုဆိုင်ရာ ကူညီကယ်ဆယ်ရေးအဖွဲ့ (OCHA) က မတ်လ ၉ ရက်နေ့ ထုတ်ပြန်သည့် ကြေညာချက်၌ “လက်ရှိဖြစ်ပွားနေသော ပဋိပက္ခများ၊ ထပ်ခါတလဲလဲ ကြုံတွေ့နေရသော ဘေးအန္တရာယ်များနှင့် တည်ငြိမ်စွာ ကျဆင်းနေသော စီးပွားရေးအခြေအနေတို့ကြောင့် လူသားချင်းစာနာမှုဆိုင်ရာ အခြေအနေမှာ နှစ်စဉ်နှင့်အမျှ ပိုမိုဆိုးရွားလာနေသည်” ဟု ဖော်ပြထားသည်။
ပြီးခဲ့သည့် ၂၀၂၅ ခုနှစ်အတွင်း လူပေါင်း ၆.၃ သန်းထံ ကူညီကယ်ဆယ်ရေးအဖွဲ့များက ရောက်ရှိခဲ့သော်လည်း (မတ်လအတွင်းက လှုပ်ခတ်ခဲ့သော အင်အားပြင်းငလျင်ဘေးကြောင့် ထိခိုက်သူ ၁.၇ သန်း အပါအဝင်)၊ လက်ရှိတွင် သွားလာခွင့်အခက်အခဲများ၊ ရန်ပုံငွေ ကျဆင်းလာမှုနှင့် မလုံခြုံမှုများကြောင့် လုံလောက်သော ထောက်ပံ့မှုပေးရန် ပိုမိုခက်ခဲလာနေသည်ဟု ဆိုသည်။
တစ်နိုင်ငံလုံးအတိုင်းအတာဖြင့် နေရပ်စွန့်ခွာရသူ ၃ ဒသမ ၆ သန်းကျော်ရှိနေပြီး ၂၀၂၆ ခုနှစ်တွင် လူသားချင်းစာနာမှုအဖွဲ့များသည် အလွန်အမင်း လိုအပ်ချက်ရှိနေသူ ၂ ဒသမ ၆ သန်းကို အဓိကထား ကူညီရန် လျာထားသည်ဟု သိရှိရသည်။
၂၀၂၆ ခုနှစ် လူသားချင်းစာနာမှုဆိုင်ရာ လိုအပ်ချက်နှင့် တုံ့ပြန်ရေးအစီအစဉ် (HNRP) အနေဖြင့် လူပေါင်း ၄.၉ သန်းထံ အသက်ကယ်ဆယ်ရေး အကူအညီများနှင့် ကာကွယ်ရေး ဝန်ဆောင်မှုများ ပေးအပ်နိုင်ရန်အတွက် အမေရိကန်ဒေါ်လာ ၈၉၀ သန်း ရရှိရန် အလှူရှင်များကို တောင်းဆိုထားသည်။
ရန်ပုံငွေ မလုံလောက်ပါက မြန်မာပြည်သူများအနေဖြင့် အသက်ရှင်သန်နိုင်ရေးအတွက် “မဖြစ်နိုင်သော ရွေးချယ်မှုများ” ကို ပြုလုပ်လာရကာ မိမိတို့ကိုယ်ကို ကြီးမားသောအန္တရာယ်များအတွင်းသို့ တွန်းပို့သကဲ့သို့ ဖြစ်လာနိုင်ကြောင်း OCHA က သတိပေးသည်။
စစ်မက်ဖြစ်ပွားမှုများတွင် လေကြောင်းတိုက်ခိုက်မှုများနှင့် အပြည်ပြည်ဆိုင်ရာ လူသားချင်းစာနာမှုဆိုင်ရာ ဥပဒေများကို ချိုးဖောက်မှုများ ရှိနေပြီး ယင်းတို့ကြောင့် အစုလိုက်အပြုံလိုက် နေရပ်စွန့်ခွာမှုနှင့် အရပ်သားများ ထိခိုက်နစ်နာမှုများ ဆက်တိုက် ဖြစ်ပေါ်နေသည်။
ကူညီကယ်ဆယ်ရေး မိတ်ဖက်အဖွဲ့အစည်းများသည် အခက်အခဲများကြားမှ လူသန်းပေါင်းများစွာကို အသက်ကယ်ဆယ်ရေး အကူအညီများ ပေးနေသော်လည်း၊ ပေးအပ်နိုင်သည့် အကူအညီ၏ အတိုင်း အတာနှင့် အကြိမ်ရေမှာ များစွာသော အခြေအနေများတွင် မလုံလောက်မှုများ ရှိနေသည်။
အထူးသဖြင့် ၂၀၂၅ ခုနှစ် ငလျင်တုံ့ပြန်ရေးတွင် ခေတ္တခဏရရှိခဲ့သည့် သွားလာခွင့် အစီအစဉ်များကို အသုံးချကာ လူပေါင်း ၁ ဒသမ ၇ သန်းထံ အမြန်ဆုံး ရောက်ရှိနိုင်ခဲ့သော်လည်း ယင်းမှာ ရေရှည်အတွက် မသေချာသေးပေ။
လက်ရှိတွင် ရန်ပုံငွေ နည်းပါးမှု၊ ကုန်ဈေးနှုန်း ကြီးမြင့်မှု၊ သွားလာခွင့် ကန့်သတ်ချက်များနှင့် ဝန် ဆောင်မှုများ ပြတ်တောက်နေမှုတို့ကြောင့် မိသားစုများမှာ ထမင်းနပ်ကျော်ခြင်း၊ အသက်ရှင်သန်ရန်အတွက် အန္တရာယ်ရှိသော ခရီးစဉ်များကို သွားလာနေရခြင်းတို့ဖြင့် ရင်ဆိုင်နေရသည်။
ကမ္ဘာတစ်ဝန်းတွင် အသက်ကယ်ဆယ်ရေး အကူအညီများ အမြန်ဆုံးလိုအပ်နေသည့် လူပေါင်း ၈၇ သန်းအနက် မြန်မာနိုင်ငံမှ ၂ ဒသမ ၆ သန်းကို ၂၀၂၆ ခုနှစ်အတွက် အထူးဦးစားပေးအဖြစ် သတ်မှတ်ထားကာ၊ နိုင်ငံတကာ အလှူရှင်များအနေဖြင့် ဒေါ်လာ ၈၉၀ သန်းကို ကူညီထောက်ပံ့ပေးရန် ကုလ သမဂ္ဂ OCHA က အရေးပေါ် တောင်းဆိုထားသည်။
ဓာတ်ပုံ- စစ်တပ်၏ စစ်ကြောင်းထိုးမှုကြောင့် ထွက်ပြေးတိမ်းရှောင်နေရသော ပြည်သူများ။
