ရန်ကုန်၊ မတ် ၁၃
ပဲခူးတိုင်း၊ တောင်ငူမြို့ အခြေစိုက် ကေတုမတီလေတပ်နှင့် လေယာဉ်ဆီ သိုလှောင်ကန်ကို ၁၀၇ မမ ရှော့တိုက်ဒုံး ၁၈ ဖြင့် ပစ်ခတ် တိုက်ခိုက်ခဲ့ကြောင်း Brave Warriors for Myanmar (BWM) အဖွဲ့မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၁၂ ရက်နေ့ ည ၁၁ နာရီ ၈ မိနစ်ခန့်တွင် တောင်ငူမြို့အအခြေစိုက် ကေတုမတီလေတပ်နှင့် လေယာဉ်ဆီ သိုလှောင်ကန်ကို Brave Warriors for Myanmar (BWM) အဖွဲ့၏ ဦးဆောင်မှုဖြင့် Mountain Knight Civilian Defense Forces (MKCDF)। Anti-Coup People’s Liberation Force (ACPLF)အဖွဲ့တို့သည် KNLA တပ်မဟာ ၂၊ တပ်ရင်း ၅ နှင့် ပူးပေါင်း၍ ၁ဝ၇ မမ ရှော့တိုက်ဒုံး ၁၈ လုံးကို ပစ်ခတ်ရာ ၁၃ လုံးကို အောင်မြင်စွာကျရောက်ပေါက်ကွဲခဲ့ကြောင်း သိရသည်။
BWM အဖွဲ့နှင့် မဟာမိတ်များ၏ စည်းလုံးမှုနှင့် နယ်မြေခံအဖွဲ့တို့၏ အမာခံ ကူညီမှုများကြောင့် အကြမ်းဖက် စစ်အုပ်စုက အထပ်ထပ်ပိတ်ဆို့ ကာဆီးထားသည့် ကြားမှ ခက်ခဲစွာ ဝင်ရောက်ပစ်ခတ် နိုင်ခဲ့ခြင်းဖြစ်ကြောင်း၊ ယင်းတိုက်ခိုက်မှုအပြီး ထိခိုက်မှု ကြီးမားသည်ဟု လေတပ်တွင်းမှ သတင်းပေးပို့ပြီး တိုင်းမှူးအသစ်ဖြစ်သူ သူရဇော်လွင်စိုး ယနေ့ နံနက်အစောပိုင်းတွင် လာရောက်စစ်ဆေးပြီး လေတပ်တော်ဝင်နေချိန်ဖြစ်၍ သတင်းအစအန အပြင်မထွက်ရန် ပြင်းပြင်းထန်ထန် သတိပေးကြောင်း ကြားသိရသည်ဟု Brave Warriors for Myanmar (BWM) အဖွဲ့မှ တာဝန်ရှိသူက ပြောဆိုသည်။
အကြမ်းဖက် စစ်ကောင်စီကို အဓိက လေယာဉ်ဆီ ရောင်းချပေးနေသော အီရန် အာဏာရ အဖွဲ့အစည်း ခေါင်းဆောင်များ ချေမှုန်း ခံရပြီးသည့်နောက် လက်ရှိအချိန်တွင် လေယာဉ်ဆီ ဆက်လက်ရရှိရန် စစ်ကောင်စီ အတွက် အကြပ်ရိုက်နေချိန်ဖြစ်ကြောင်း၊ ပြည်သူများနှင့် တော်လှန်ရေး အဖွဲ့များကို ဆက်လက်တိုက်ခိုက်ရန်အတွက် အာရပ်နိုင်ငံများကို ကြိုးစားဆက်သွယ် နေသည်ဟုကြားသိရပြီး ထိုအခွင့်အရေးကို အခွင့်ကောင်းယူ၍ လေတပ်နှင့် ဆီကန်တို့ကို ကြိုးစားတိုက်ခိုက်သည့်အနေဖြင့် မဟာမိတ်တို့နှင့် ပူးပေါင်းကာ တောင်ငူလေတပ်၏ လေယာဉ်ဆီလှောင်ကန်နှင့် အရေးကြီး ပစ်မှတ်ထား၍ BWM ၏ Mission 51 အဖြစ် ဖော်ဆောင်ရခြင်းဖြစ်ကြောင်း သိရှိရသည်။
“၃ နေရာခွဲပြီး ၆ လုံးစီ တပြိုင်တည်း ပစ်ခဲ့ပါတယ်။ ၁၃ လုံးကတော့ အောင်အောင်မြင်မြင် ပစ်နိုင်ခဲ့တယ်။ ညကလည်း စစ်ခွေးတွေက လက်နက်ကြီးနဲ့ ၆ လုံးချက်ချင်းပြန်ပစ်တယ်။ လက်နက်ငယ်တွေနဲ့လည်း ပြန်ပစ်တာတွေရှိတယ်။ အခုစစ်ခွေး တိုင်းမှူး အသစ် ကြည့်ပြီး စစ်ဆေးနေတယ်လို့ ကြားတယ်။ စစ်ရှုံးကောင်စီရဲ့ လေယာဉ်ဆီ အကြပ်အတည်းအချိန်တွင် ကျွန်ုပ်တို့ တော်လှန် ရေးအဖွဲ့အစည်းများ အခွင့်အရေးကို အမိအရယူပြီး စကစ၏ လေတပ် များ၊ ဆီကန်များကို ပိုမိုကြိုးစားတိုက်ခိုက်ဖို့ တိုက်တွန်းလိုပါတယ်” ဟု Brave Warriors for Myanmar (BWM) အဖွဲ့မှ တာဝန်ရှိသူက ပြောဆိုသည်။
အပြစ်မဲ့ ပြည်သူများနှင့် တော်လှန်ရေးအဖွဲ့များကို အဓိက ပစ်မှတ်ထား၍ တိုက်ခိုက်နေသော စစ်ကောင်စီ၏ အဓိက အားထားနေသော လေတပ် အကြပ်ရိုက်ချိန်ကို အခွင့်ကောင်းယူပြီး လေတပ်နှင့် လေယာဉ်ဆီလှောင်ကန်များ ဖျက်ဆီးရေး မစ်ရှင်များကို အင်တိုက်အားတိုက်ဖော်ဆောင်ကြလျှင် တော်လှန်ရေး အမြန်ဆုံးအောင်နိုင်မည်ဖြစ်ကြောင်း BWM အဖွဲ့မှ တာဝန်ရှိသူက ဆက်လက်ပြောဆိုသည်။
